140
Preya blanga jidan seifwan
Preya blanga Deibid.
1 YAWEI, yu seibum mi brom ola brabli nogudbala pipul.
Yu kipum mi seif brom ola jigibala pipul.
2 Dei oldei jinggabat blanga dumbat nogudbala ting.
Dei oldei meigimap trabul.
3 Dei tok nogudwan wed en im jis laik det poisin blanga jigiwan sneik.
4 YAWEI, yu lukaftum mi brom detlot brabli nogudwan pipul,
en yu kipum mi seifwan brom detlot pipul hu oldei faitfait,
en hu oldei meigim plen blanga binijap mi.
5 Detlot praudbala pipul bin meigim trep blanga mi.
Deibin pudumdan ola trep olawei langa det roud blanga gajim mi.
6 Mi tok langa YAWEI, “Yu main God.”
YAWEI, irrim mi jingat langa yu blanga album mi.
7 YAWEI, main boswan God,
yu na maindim mi, main strongbalawan.
Langa eni fait, yu lukaftum mi jis laiga shild.
8 YAWEI, nomo gibit detlot brabli nogudbala pipul wanim dei wandimbat.
Nomo larram olabat plen hepin.
9 Nomo larram main enami olabat win.
Meigim olabat plen blanga mi hepin langa olabat ronselp.
10 Larram brabli hotwan eshis buldan langa olabat.
Larram olabat buldan langa faiya langa det dipwan hol,
en nomo kamat igin.
11 Larram ol detlot pipul hu bleimbat najalot pipul jis fo najing nomo abum enijing gudwan hepin langa olabat.
Larram brabli nogudbala ting binijimap ola jigiwan pipul.
12 YAWEI, ai sabi yu maindimbat ola powan pipul,
en yu oldei gibit feyago langa detlot pipul hu nomo garram enijing.
13 Detlot pipul hu jidan raitwei langa yu garra preisim yu brabli trubalawei orait.
Olabat garra jidan garram yu.