3
YAWEI garra panishim detlot Jerusalem pipul en seibum sambala
1 Wal aibin tok, “Bambai im garra brabli nogud blanga yumob nogudbala pipul deya langa Jerusalem, dumaji yumob bin gibit ola po pipul adtaim, en yumob bin gibit bekboun langa God.
2 Wen YAWEI jandim wed langa yumob, yumob nomo teiknodis en wen YAWEI bin panishim yumob blanga titjim yumob, yumob nomo bin teiknodis langa im. Yumob nomo trastim YAWEI, en yumob nomo kaman gulijap blanga weship langa im.
3 Ol yumob boswan langa Jerusalem, yumob brabli gridibala blanga gajimbat enijing, jis laik detlot laiyan weya jinginat gridiwei blanga grebum eni enimul blanga dagat. Ol yumob hu oldei kotimbat pipul jidan krulbala laik detlot dinggo. Detlot dinggo weya kilim enimul sangodantaim nomo libum eni boun blanga ailibala.
4 En yumob ola speshalwan mesinja, yumob jidan lobala men en toktokbat trubala wed, indit? Nomo. Yumob praudbala men, en yumob oldei toktokbat laiyawan wed. En yumob ola serramonimen, yumob rispek det seikridwan pleis brabliwei, en titjim God lowa langa detlot pipul olataim indit? Najing. Yumob oldei rabishim detlot seikridwan ting langa det serramoni pleis, en yumob serramonimen nomo teiknodis langa detlot lowa blanga God.
5 Bat YAWEI im jidan langa Jerusalem en im oldei dumbat rait ting, im nomo dum eni nogudbala ting. Ebri ailibala im redi blanga gibit feyago langa im pipul olabat. YAWEI oldei dum ola rait ting ebridei, bat yumob nogudbala pipul oldei dumbat ola nogudbala ting en yumob nomo sheim blanga ol detlot nogudbala ting weya yumob dumbat.”
6 Wal YAWEI im tok, “Aibin binijimap detlot pipul deya langa detlot najalot kantri. Ol detlot strongwan haus en wol bin buldan, en detlot haus ol breigimdan en nobodi wokwok langa detlot roud na. Detlot taun jidan emtiwan, nobodi jidan deya langa olabat.
7 Aibin jinggabat main pipul olabat langa Jerusalem sabi blanga tharran. Maitbi dei garra rispek langa mi na. Wen dei luk hau aibin panishim detlot najalot pipul, dei garra teiknodis langa wanim aibin titjim olabat. If dei dum lagijat ai kaan panishim olabat en binijimap olabat haus. Lagijat na aibin jinggabat. Bat wen aibin panishim detlot najalot pipul dei nomo bin len enijing. Dei bin gowei kwikbala blanga dumbat mowa nogudbala ting.
8 “If dei wandi kipgon dumbat nogudbala ting, wal dei garra weit blanga mi. Dei garra weit blanga det dei bambai wen ai garra kaman blanga dalim olabat blanga ola nogudbala ting weya aibin luk dei dumbat, dumaji ai sabi wanim ai garra dum. Langa det taim na ai garra majurrumap ola pipul brom ebri kantri en ai garra shoum olabat haumatj mi wail blanga ola nogudbala ting weya aibin luk. Ai garra wail brabliwei. Ai garra jandim faiya en dijan graun garra ol barnap.”
Bambai gudbala ting garra hepin langa yumob
9 En YAWEI im kipgon tok, “Bambai langa det taim na ai garra tjeinjim ola pipul brom detlot najalot kantri. Ai garra meigim olabat mawus gudwan, wulijim dei garra tok langa mi gudwei, en dei garra ol weship langa mi mijamet.
10 Main pipul olabat garra prei langa mi brom ola longweiwan kantri, detlot pipul langa det kantri gulum Ithiyopiya, en detlot pipul hu jidan brabli longwei najasaid langa ola riba. Ol main pipul weya jidan spredatbat ebriweya langa ola kantri garra kaman en bringimap olabat ofring langa mi.
11 Langa det dei na main pipul olabat kaan sheim langa detlot pipul hubin gibit bekboun langa mi en dumbat ola nogudbala ting. Nomo. Detlot pipul hu dum lagijat kaan jidan deya langa Jerusalem, dei kaan jidan deya langa main seikridwan hil. Ai garra deigidawei detlot praudbala pipul, ol detlot hu tok praudbalawei.
12 Bat ai garra libum ola lobala pipul hu nomo meigim miselp haibala deya langa Jerusalem. Wen dei garra bradin dei garra prei langa mi blanga lukaftumbat olabat.
13 Detlot Isreil pipul hu nomo gitkil, garra dum ola rait ting en dei garra tok trubalawei nomo laiyawei. Dei garra dagat en silip gudbinjiwei deya en nobodi kaan meigim olabat bradin, jis laik ola ship weya dagat en silip wen sambodi wotjimbat olabat.” Lagijat na YAWEI bin tok.
Bambai yumob garra gudbinji
14 Wal aibin tok,
“Bambai yumob garra sing adbala, yumob pipul!
Yumob garra jingat, yumob Isreil pipul!
Yumob garra gudbinji brabli, yumob pipul blanga Jerusalem.
15 Det taim garra kaman wen YAWEI garra stap panishimbat yumob.
Im garra andimwei yumob enami olabat.
YAWEI, det trubala God, im det king blanga yumob Isreil pipul en im garra jidan deya garram yumob.
Yumob kaan bradin blanga eni nogud ting mowa na.
16 Langa det dei bambai najalot pipul garra tok langa detlot pipul langa Jerusalem.
Dei garra tok,
‘Nomo bradin, yumob pipul blanga Saiyan.
Nomo nogudbinji en ranawei.
17 YAWEI, yumob God, im jidan garram yumob.
En im na garram det pawa blanga bidim ol yumob enami olabat.
En im garra gudbinji garram yumob brabliwei.
Im laigim yumob detmatj en im gudbinji blanga jidan garram yumob.
Im garra sing adbala, dumaji im brabli gudbinji garram yumob.’ ”
18-20 Wal YAWEI im tok,
“Bambai najalot pipul garra deigidawei yumob langa ola difrinwan kantri,
en dei kaan larram yumob blanga kambek iya en weship mi brabliwei.
Sambala langa yumob garra jidan leimbala,
en detlot najalot pipul garra mokimbat yumob en gibit yumob adtaim,
en yumob garra sheim en nogudbinji blanga tharran.”
“Bat yumob irrim dijan na!
Bambai ai garra bringimbek yumob, main pipul olabat brom ola kantri,
en ai garra meigim yumob jidan iya langa yumob ronwan kantri igin.
Ai garra lukaftumbat ol yumob leimbala pipul na.
En det taim na ai garra gibitbek yumob ola gudbala ting igin.
En ai garra meigim detlot pipul brom ola difrinwan kantri hubin gibit yumob adtaim preisim yumob.
Dei garra tok, ‘Yumob speshalwan pipul!’
Yuwai! Garram yumob ron ai yumob garra luk dijan!”
Lagijat na YAWEI bin tok.
Binij na.