Bbaruha Gyakubanza Ginyakuhandiikwa
Yohaana
Kwanjuura
Bbaruha gigi gyegebeerwe nka Bbaruha gya Yohaana gyakubanza, gyahandi̱i̱ki̱i̱rwe mukwenda Yohaana. Yaagi̱handi̱i̱ki̱i̱ri̱ beikiriza ba Ku̱ri̱si̱to bensei̱. Yaagi̱handi̱i̱ki̱ri̱ na bigyendeerwa bibiri: Kyakubanza yendeerye ku̱soboresya bantu banyakwikiririzanga mu Yesu̱, kwicala nibali mu b̯u̱mwei̱ na Ruhanga, na Mwana waamwe Yesu̱ Ku̱ri̱si̱to. Kandi gyahandi̱i̱ki̱i̱rwe hab̯wa kuhab̯ura bab̯wo beikiriza ba Yesu̱ kwerinda kuhondera beegesa ba b̯u̱gobya. Beegesa bab̯wo beegesyengi̱ nibakoba nti, Yesu̱ atakabbe muntu mu̱b̯wi̱zu̱lu̱, kandi atakabbe Ruhanga mu̱b̯wi̱zu̱lu̱.
Nahab̯waki̱kyo, mu ngeru gya ku̱lwani̱sya gi̱gyo nzegesya gya b̯u̱gobya, mu̱handi̱i̱ki̱ wa bbaruha gigi yaahandi̱i̱ki̱ri̱ ni̱yolokya nti, Yesu̱ Ku̱ri̱si̱to yaabyali̱i̱rwe na mubiri nka bantu bensei̱ kubabba. Kindi yaakobi̱ri̱ nti, bab̯wo bensei̱ beikiririza mu Yesu̱ Ku̱ri̱si̱to balina kuhondera biragiro bya Ruhanga, na kubba na ngonzi na bei̱ra baab̯u.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Ndagiiro 1:1-4
(ii) Kyererezi̱ na Nti̱ti̱ 1:5—2:29
(iii) Baana ba Ruhanga na ba Sitaani 3:1-24
(iv) Mananu na B̯u̱gobya 4:1-6
(v) B̯ujunaanizib̯wa b̯uli mu kubba na Ngonzi 4:7-21
(vi) Ku̱si̱ngu̱ra kuli mu Kwikiriza 5:1-21
1
Kigambu kya B̯womi
1 Tukubahandiikira kubaweera bintu bikukwatagana na yogwo Kigambu kya b̯womi munyakubbaho kuruga kadei, mu kubanza na kubanza. Yooyo yogwo gi̱twegwi̱ri̱ naakutuweera bigambu byamwe, yooyo yogwo gi̱twaweeni̱ho na mei̱so geetu̱, kandi de twamukwataho na ngalu zeetu̱.
2 Yogwo agaba b̯womi, b̯u̱yei̱zi̱ri̱ mu nsi, twamu̱weeni̱; bi̱byo bi̱twaweeni̱ byobyo bitukuheera b̯u̱kei̱so. Tukubaweera nti, yooyo b̯womi b̯utamalikaho munyakubba na Bbaa weetu̱ Ruhanga, kandi yooyo mu̱nyakwi̱za muli twe.
3 Yogwo gi̱twaweeni̱ kandi twegwa bigambu byamwe, yooyo gitukubaweeraho, aleke mubbe na b̯u̱mwei̱ natwe, hab̯wakubba tuli mu b̯u̱mwei̱ na yogwo Bbaa weetu̱ hamwei̱ na Mwana waamwe Yesu̱ Ku̱ri̱si̱to.
4 Nahab̯waki̱kyo tu̱bahandi̱i̱ki̱i̱ri̱ bibi bigambu aleke nanywe musobore kusemererwa hoi̱ hamwei̱ natwe.
Ruhanga abba Kyererezi̱
5 Bi̱byo bigambu bitukubaweera byobyo bi̱twegwi̱ri̱ Ku̱ri̱si̱to naatuweera nti, Ruhanga abba kyererezi̱, kandi muli yo tihabbamwo nti̱ti̱ kadi na kadooli̱.
6 Twabba nitukukoba nti tuli mu b̯u̱mwei̱ na Ruhanga, bei̱tu̱ kandi nitukulibatira mu nti̱ti̱, b̯u̱b̯wo tuli mu ku̱gobya; tuli kwahi mu kukora mananu.
7 Bei̱tu̱ twakabba nitukwicala mu kyererezi̱, nka Ruhanga kweicala kyererezi̱, b̯u̱b̯wo tukubba nituli mu b̯u̱mwei̱ nanywe, kandi neibbanga lya Yesu̱, Mwana waamwe, likubba litunaabyaho bibii byetu̱ byensei̱.
8 Twakabba nitukukoba nti, tituli na kibii, tuli mu kwegobyagobya, na mananu ga Ruhanga gakubba gatali muli twe.
9 Bei̱tu̱ kakubba twatula bibii byetu̱ hali Ruhanga, abba mwesigwa kandi mwinganiza kutuganyira bibii byetu̱ na kutunaabyaho b̯u̱tadoori̱ b̯wensei̱.
10 Kandi twakabba nitukukoba titukakoranga kibii, tukubba nitukufoora Ruhanga kubba mu̱gobya, na kigambu kyamwe kikubba kitali muli twe.