6
Sa Tinahuara Tanisa Popoa Izireli
1 Mi talotaṉa gamu pu koa va leleana pa Zaione,
meke koa gamu pu lopu koa matagutu pa toqere Sameria,
gamu na koimata noma mia koasa ṉati butubutu baṉara koari doduru,
koa gamu pu hoke mae hata tinokae sari tie pa Izireli!
2 La pa Kalane mamu la dogoria;
beto mamu la koasa vasileana nomana pa Hamati,
mamu gore la pa Qati pa popoa Pilisitia.
Vea, noma hola ni rini sari karua butubutu baṉara pa Izireli meke Ziuda?
Sari dia pepeso si noma hola ni si tamugamu?
3 Lokari! Sa rane tinahuara si koromia balabala ia,
meke va tata mae ia gamu sa rane vinaripitui variva matagutuna.
4 Eko mia koari na teqe sapu tava kadakada livo elopaniti,
zokozokoro mia pa habohabotuana malohorodi.
Lami ta vizatadi si hena i gamu
meke na tuna bulumakao nobokodi.
5 Mikemike va leana mia koari mia hapu gua e Devita
meke kera ni sari kinera vaquaradi pu taveti gamu koari na mia ivivu na hapu.
6 Na vovoina vaeni nomadi si naponi gamu
meke lumulumu ni gamu sari lumu sapu humaṉa lea,
ba lopu talotaṉa nia gamu sa tinahuara te Izireli.
7 Gua ke gamu si kote kekenu hokara ta raovo taloa;
sari mia inevaṉa na hahanana zokozokoro si kote noso.
8 Se Zihova sa Baṉara si tokotokoro pa Pozana Sa, se Zihova sa Tamasa Tadi na Qeto Minate, Asa si zama vura guahe:
“Arau kana hola ia sa vina titie te Zekopi
meke etulu i Arau sari nana vasileana ta gobadi.
Kote vala nia Rau sa vasileana lavata hie koari na kana
meke sari doduru tiṉitoṉa pa korapana,” gua si Asa.
9 Be ka manege puta tie si koa hola pa keke vetu, si kote mate tugo si arini.
10 Meke be mae si keke turaṉadia pude paleke pani pa vetu sari tinidia pude sulu i, gua, meke nanasia sa si asa sapu korapa tome vasina, “Vea, koa dia pule kaiqa tie?”
Kote olaṉa si asa, “Lokari,” gua, meke kote hinoqa zama pule sa turaṉadia, “Mokomoko! Lopu kaqu poza ia gita sa Pozana e Zihova,” kote gua.
11 Ura ele vala nia e Zihova sa ginarunu,
meke kote huara va umumu ia Sa sa vetu nomana,
meke sa vetu hitekena si kote va inete ia Sa.
12 Vea, sari hose si hoke haqala tugo pa patupatu?
Hoke la tavete inuma pa kolo lamana sari tie?
Lokari! Ba gamu ele iliri la nia pa poizini sa ṉinoṉo,
meke sa vuana sa tinoṉoto si va pasa ia gamu.
13 Qetu nia gamu sapu zau vagi ia gamu si pa Lodeba,
meke zama guahe, “Vea, lopu pa nada ṉiniraṉira soti tu vagi nia gita si pa Kanaimi?”
14 Ura zama vura guahe se Zihova sa Tamasa Tadi na Qeto Minate,
“Kei, gamu na butubutu Izireli, kote va gevuru ia Rau si keke butubutu baṉara pude mae raza igo,
kote raza na ṉoṉovala ia rini sa doduruna sa mia popoa,
podalae pa karovoana pa toqere sapu la gua pa Hamati kamo la koasa lolomo pa Ovuku Zodani,” gua si Asa.