33
Manani e Mosese sari na Tinoni Izireli
1 Hire sari na zinama tinamanae saripu zamani e Mosese sa nabulu te Tamasa koari na tinoni Izireli sipu lopu ele mate si asa.
2 Meke zama si asa,
“Gore mae guana pa toqere Saenai se Zihova;
meke gasa mae koarini pa Seira,
sapu ṉedala vura pa toqere Parani;
meke somana mae koari ka manege puta vuro mateana si Asa.
Meke taṉinia Nana pa kali lima mataona, sa nika huruṉuna.
3 Tataruni e Zihova sari Nana tinoni
meke kopuni Sa saripu tanisa.
Gua asa ke kokotuṉu pa nenena Sa si gita,
meke va tabei sari Nana tinarae.
4 Meke va tabei gami sari na tinarae saripu ponini gami e Mosese,
sapu sa tinago tanisa mami butubutu Izireli.
5 Meke va baṉaria rini se Zihova pa Zesuruni,
sipu varigara sari doduru koimata tadi na tinoni koari doduru butubutu Izireli.”
6 Meke zama guahe koasa butubutu te Rubeni se Mosese:
“Be guana lopu soku sari nana tinoni,
mani lopu mate taloa hokara sa butubutu te Rubeni.”
7 Meke zama guahe koasa butubutu te Ziuda si asa,
“Ke Zihova Mu avosia goi sa mamalaiṉina e Ziuda Mamu toka nia,
Mamu va keke pulei Goi sarini koari kaiqa votiki butubutu.
Mamu varipera tokani na lavelave hukatani Goi Zihova si arini koari na dia kana.”
8 Meke zama guahe koasa butubutu te Livae si asa:
“Ele ta poni koe Livae sa Mua Tumimi meke Urimi.
Ta podeke si asa koasa popoa sapu ta pozae Ma'asa,
meke va sosodea Goi pa kolo Meriba.
9 Meke zamani sa sari na tiatamana,
‘Namu lopu tataruni rau si arini,’ gua.
Namu lopu gilani sa sari na tasina koreo
meke sari na tuna.
Ba sari na Mua zinama mo si kopuni sa
meke kopu totoli nia sa sa Mua vinariva egoi.
10 Kaqu totozini rini sari na Mua tinoni
pude di va tabei sari na Mua tinarae
meke kaqu va vukivukihi si arini koasa Mua hope.
11 Zihova, Mu toka nia Goi sa dia butubutu pude toa va ṉiṉira,
Mamu qetuni sari na tinavete saripu taveti rini.
Mamu huara va inete pani Goi sari na dia kana.
Mamu lopu va turu pulei Goi si arini.”
12 Koasa butubutu te Benisimane si zama guahe si asa:
“Hie sa butubutu te Zihova sapu kopu nia na tataru nia Sa.
Va toṉoti Sa si arini doduru rane,
meke koa pa varikorapadia rini si Asa.”
13 Meke koasa butubutu te Zosepa si zama guahe si asa:
“Mani mana nia e Zihova sa dia popoa koasa ruku,
meke sa kolo pa kauruna sa pepeso.
14 Gua tugo sari vua huda saganadi pa korapa rimata pa dia pepeso,
sapu ta siṉie na vua huda leadi koari doduru hopeke totoso pakepakete.
15 Meke sari na toqetoqere koadi si kaqu ta siṉie na vua huda lomosodi.
16 Meke doduru tiṉitoṉa leadi mo si kaqu ta omunae sage koari na dia pepeso,
sapu ta poni mae koe Zihova.
Asa tugo sapu zama mae pa korapa nika pa popoa qega.
Sari doduru minana hire si kaqu ta evaṉa koe Zosepa,
sina keke koimata si asa koari na tasina.
17 Tolavaena guana bulumakao kokoreo podo kenuna se Zosepa,
meke sa nana ṉiniraṉira si kekeṉoṉo gua sari karua kikihona sa bulumakao pinomona,
meke kaqu va kilasi sa sari na butubutu pa doduru ia ka ia,
kekeṉoṉo gua sapu hoke hoata va mate tie sa bulumakao.
Gua tugo sari ka manege puta vuro tie te Iparemi,
meke sari na vuro tie te Manase.”
18 Meke gua pule hie si zama nia sa koasa butubutu te Zeboloni meke se Isaka:
“Mani koa mamutu nana se Zeboloni koari doduru ginugua pa sada.
Meke agoi Isaka si kaqu toqolo sage sa mua tinagotago pa mua popoa soti.
19 Kaqu tioko sage lani rini pa dia toqere sari na tinoni,
meke va vukivukihi lani rini sari na vina vukivukihi toṉotodi.
Kote vagia rini sa dia tinagotago pa kolo hokara,
meke gua tugo pa korapana sa dia popoa soti tata pa raratana onone.”
20 Meke koasa butubutu te Qadi si zama guahe si asa:
“Mani tavahesi sa Tamasa sapu poni va noma nia popoa si asa,
meke koa guana laione se Qadi sapu garata va luraia sa limana babe batuna sa nana boso.
21 Telena mo vizatia sa sa pepeso masuruna
meke ta kopue sa hinia tanisa koimata pude tanisa.
Totoso varigara sari na koimata tadi na tinoni,
si va tabei sa sari na tinarae na hiniva toṉotodi te Zihova,
meke tiqe ta tavete vura sari na vinari pitui toṉotodi koasa butubutu Izireli.”
22 Meke zama guahe si asa koasa butubutu te Dani:
“Agoi Dani si guana tuna laione sapu horuhoru vura pa popoa Basani.”
23 Meke koasa butubutu te Napitalai si zama guahe si asa:
“Ke agoi Napitalai, mamu qetuqetu nia sa vinaleana sapu ta siṉie minana te Zihova,
kaqu tagoa goi sa pepeso pa kalina la
meke kamo la gua koasa kopi Qaleli.”
24 Meke koasa butubutu te Asa si zama guahe si asa:
“Agoi Asa si tamanae hola koari kaiqa butubutu;
kaqu ta qetue hola koari na tasimu,
meke kaqu toa valeana pa mua popoa sari na huda olive.
25 Meke sa vari likohaena sa mua vasileana lavata si kaqu ta bara vari likohae aeana,
meke doduru totoso si kaqu ta kopu totoko valeana si asa.
26 Ke gamu na tinoni Izireli,
namu loke tamasa pule si kekeṉoṉo gua sa mua Tamasa,
sapu ene mae gua koari na maṉauru pude tokani gamu,
meke pa korapa galegalearane koasa Nana ṉinedala variva magasa.
27 Koe Tamasa toa holana sa mua aqoroana,
kaqu ovulu sage nigo Sa ninae rane ka rane,
meke kaqu zukuru pania Sa pa kenumu sa mua kana.
Meke zama, ‘Mu huaria!’ gua.
28 Meke kaqu koa valeana sari na tutina e Zekopi,
meke ta kopue valeana koasa popoa masuruna sapu siṉia na huiti na huda vaeni,
meke hoqa gore mae pa galegalearane sari na puni, meke gua tugo sari na kolo, sapu vura mae pa kauruna sa pepeso.
29 Ke Izireli, tamanae si goi; Esei si kekeṉoṉo gua agoi pu ta harupu koe Zihova?
E Zihova mo telena sa mua lave,
meke na mua magu varipera pude lavelave nigo
meke vatua koa goi sa minataqara.
Sari na mua kana si kaqu mae pude tepa ia sa dia tinaleosae koa goi,
ba kaqu neti va konekonei goi si arini.”