19
Sa Kinera pa Totoso Talotaṉa
1 “Tavetia keke kinera tana taruqoqo pa guguadi ri na koburu koreo tavia pa Izireli,
2 mamu zama guahe:
‘Sa tinamu si guana keke laione marilaena
koari na rovana laione!
Eko turaṉi sa sari tuna laione
meke va noma i sa sari na tuna.
3 Keke ri na tuna laione si va noma sage ia sa,
meke evaṉae na laione ṉiṉirana si asa.
Va tumatumae nia hukue
meke pude va mate tie sa.
4 Avoso nia rina butubutu si asa,
meke sipata vagi ia rini pa dia pou.
Rita nia vinetuṉu rini meke turaṉa vagia
meke la pa popoa Izipi.
5 Totoso dogoria sa sapu lopu ta evaṉa sapu rovea sa,
si vagia pule sa si keke ri na tuna laione
meke va tumatumae ia sa pude na laione ṉiṉirana.
6 Ene turaṉi sa sari na laione,
ura na laione ṉiṉirana bisa kamahire.
Tumatumaena pa hukue si asa
meke pude va mate tie tugo.
7 Huara goreni sa sari dia vasidi ṉiṉiradi
meke ilasi sa sari dia vasileana.
Sa popoa meke sari doduru pu koa pa korapana
si matagutu nia rini sa kurumuna.
8 Meke mae sari na butubutu meke raza ia rini,
sarini pa pinaqaha popoa pa vari likohaena.
Ivara aqa nia rini sa dia vaqara,
meke sipata vagi ia rini pa dia pou.
9 Rita nia vinetuṉu rini meke kave nuquru nia pa bara
meke vagi la nia koasa baṉara pa Babiloni.
Veko la nia rini pa vetu varipusi,
ke lopu ta avoso pule sa kurumuna koari na toqere pa Izireli.
10 Sa tinamu si guana huda vaeni pa mua inuma vaeni
sapu ta lete pa taqele ovuku;
vua katakata si asa meke soku lelaṉana
sina koa pa vasina sapu sokua kolo.
11 Ṉiṉiradi sari lelaṉana,
garodi pude na kolu tanisa baṉara.
Toqolo ululu hola si asa holani sari doduru lelaṉa vaeni.
Ta gilana valeana koari doduru sapu ululu hola si asa,
meke sapu soku hola sari lelaṉana.
12 Ba pa tinaṉaziri si ta rabutu si asa
meke ta gona gore la pa pepeso.
Sa givusu maṉinina pa gasa rimata va popa ia,
meke va hoqa panipani vuana;
sari lelaṉa ṉiṉiradi tanisa si harahara
meke gani na nika.
13 Kamahire si ta lete pa qega si asa,
pa pepeso popana meke memehana.
14 Gania nika si keke ṉati lelaṉa,
meke ta sulu sari na vuana.
Lopu keke ri lelaṉa ṉiṉiradi si koa hola koasa,
sari lelaṉa sapu garodi pude na kolu tanisa baṉara.’
Hie si na kinera tana taruqoqo pude kote kera nia pa haqohaqoana.”