21
Sa Kinorokorotae pa Guguana Babiloni
1 Hie sa kinorokorotae pa guguana Babiloni, sa popoa qega tata pa raratana masa:
Gua ri na vivirua pu sara mae gua pa kali gevasa,
na qeto minate si mae gua pa qega,
mae gua pa popoa variva matagutuna.
2 Keke dinogodogorae variva matagutuna si tava dogoro nia arau:
Na tie qoraqora si qoraqora, tie huhuara si huhuara.
Gamu pa Elami, la rapata! Gamu pa Media, la koa vari likohae nia sa vasileana lavata meke raza ia!
Kote va kokoi i Rau sari doduru tinasigiti sapu evaṉi Babiloni.
3 Sipu dogoria rau sapu gua asa, si sigiti tu sa tiniqu,
keke sigiti kaleana hola kamo au, guana sinigiti podopodo tadi barikaleqe;
na viviri nia rau sa inavoso sapu kamo mae,
matagutu nia rau sapu vaquru dogoria rau.
4 Duaṉa sa buloqu,
sa minatagutu si neneqara nia rau;
hiva nia rau pude tuturei boṉi sa popoa
ba sa huporo pule tu si matagutu nia rau.
5 Va nama ni rini sari na tevolo,
ivara ni rini sari na habohabotuana,
hena si arini, meke napo si arini!
Sipu korapa gua si kamo sa zinama! “Tuturei gamu na koimata,
va namai mia lave!”
6 Hie sa zinama te Zihova koa rau:
“La va turu vekoa sa tie hakehakei
tozi nia pude kukili pana dogoria sa si keke toṉa.
7 Pana dogoro totopili varipera si asa
ta turaṉa koari na hose,
kaiqa tie si koi doṉ'ki
babe tie koi kameli,
si kaqu turu nama si asa,
turu nama eko mo.”
8 Meke kukili vura gana sa tie hakehakei,
“Qua palabatu, hopeke rane si turu hakehakei si rau;
doduru boṉi si koa si rau koasa qua tuturuana.
9 Doṉo la, hiera si keke tie pa totopili varipera,
ta turaṉa koari na hose.”
Tozia mo sa tie kopu sa inavoso:
“Babiloni si hoqa, hoqa si asa!
Doduru beku te Babiloni
si hoqa ilasa pa pepeso!”
10 Kei, gamu na qua tie pa Izireli, ele munala si gamu pa vasina vari paqaha kiko huiti koari na qaqalotodi,
na tozini gamu rau gua sapu avosia rau
koe Zihova Tadi na Qeto Minate
koasa Tamasa pa Izireli.
Sa Kinorokorotae pa Guguana Edomu
11 Hie sa kinorokorotae pa guguana Edomu d.
Keke tie pa Edomu si titioko mae koa rau,
“Tie kopu, vea seunae gua meke kote hola sa boṉi?
Tie kopu, vea seunae gua meke kote hola sa boṉi?”
12 Olaṉa sa tie kopu,
“Korapa mae sa munumunu, ba sa boṉi si kote pule mae tugo.
Be hiva nanasa si agoi, si mu nanasa;
mamu pule mae; mamu nanasa pule tugo.”
Keke Kinorokorotae pa Guguana Arebia
13 Hie sa kinorokorotae pa guguana Arebia:
Gamu kasa na tinoni pa Dedani,
pu ene koari na tokele kameli tadi na tie holuholu
meke turu ipi koasa popoa qega pa Arebia,
14 mamu paleke poni kolo saripu memeha;
gamu tie pa vasileana Tema,
paleke poni ginani saripu govete mae tome.
15 Ura, na govete nia rini sa vedara,
sa vedara ta lobusu vekona,
govete nia rini sa bokala ta ṉave vekona,
koasa maṉinina sa vinaripera.
16 Hie si zama nia e Zihova koa rau:
“Sipu lopu ele hola keke vuaheni,
gua puta pa totoso gua sapu hoke va nae ia sa nabulu sapu ta pusi pa vinariva egoi pa tinavete,
doduru tinolava pa butubutu Kedara si kote beto.
17 Sari tie varane te Keda si kote visavisa,
arini mo pu hoke ṉavei sari bokala.”
E Zihova, sa Tamasa pa Izireli si ele zama.