40
Na Vina Manoto tadi na Tie te Tamasa
1 “Manoto, manoto gamu na Qua tinoni,”
gua sa mia Tamasa.
2 “Zama va manoto la i sari pa Zerusalema,
mamu zama vura la nia koarini
sapu sari totoso tasunadi tadirini si ele hola
sapu sari dia sinea si ele ta leosoni Sa,
sapu sari vina kilasa pu vagi sari pa Zerusalema pa limana e Zihova
si karua totoso hola ni sari dia sinea.”
3 Na mamalaiṉina keke tie si korapa titioko:
“Mi va namanama nia pa qega
sa siraṉa te Zihova;
mi va toṉotia pa korapa soloso qega
sa siraṉa tanisa nada Tamasa.
4 Doduru lolomo si kote tava siṉi sage,
doduru toqere na toa si kote tava pepeka;
meke sari na lolora si kote tava pezara,
sapu koluradi si kaqu tava memehe.
5 Keana vura mae sa kalalasana e Zihova,
meke doduru butubutu kaqu dogoria si Asa.
Ura Arau se Zihova si ele zama!”
6 Keke mamalaiṉi si zama, “Velavela vura.”
Ke nanasa si rau, “Sa si kote velavela vura nia rau?” gua si rau.
“Sari doduru tie si guana duduli;
meke doduru dia tinolava si guana havoro pa pezarana.
7 Harahara sari duduli meke hoqa sari havoro,
sina givusu kamo la koa rini sa siniṉo te Zihova.
Hinokara sari tie si gua mo na duduli.
8 Uve, harahara sari duduli meke hoqa sari havoro,
ba sa zinama te Tamasa si turu hola ninae rane.”
9 Agoi pu paleke inavoso leana la pa Zaione,
mu sage la pa keke toqere ululuna.
Agoi pu paleke inavoso leana la pa Zerusalema,
mu kukili va ululae,
mu lopu matagutu, kukili vala beto;
zama koari na vasileana pa Ziuda,
“Hierana sa mia Tamasa!” gua.
10 Doṉo la, se Zihova Baṉara si mae sana pa korapa Nana ṉiniraṉira,
meke koasa lima ṉiṉirana Tanisa si kote baṉara ni Sa.
Doṉo la, sari Nana pinia si turaṉi Sa,
meke luli koa Sa sari Nana tinoni ta harupudi.
11 Kopu ni Sa sari nana sipi guana sepati:
varigara ni Sa sari na lami pa limana
meke paleki Sa tata la pa bulona;
turaṉa hitehite ni Sa saripu ari tudia.
Sa Tamasa Lopu Ta Ṉana Kamona tadi pa Izireli
12 Vea, esei ele pada ia sa kolo lamana pa ola limana,
babe ṉava ia sa maṉauru pa limana?
Vea, esei ele tuqea sa kavuruna sa popoa pepeso pa keke huneke,
babe pada i sari na toqere pa sikele,
meke sari na toa pa padapadana mamata?
13 Vea, esei ele tumae nia sa binalabala te Zihova,
babe totoli nia si Asa guana Nana tie va tumatumae?
14 Koe sei si la nananasa se Zihova pude va bakabakala ponia si Asa,
meke esei totozi nia si Asa koasa siraṉa toṉotona?
Esei sia sapu va tumatumae ia si Asa
babe va dogoro nia si Asa koasa siraṉa gilagilana?
15 Hinokara sari na butubutu si guana keke honi kolo hite mo pa bakete;
doṉo guni ni Sa na kavuru mo pa sikele;
Asa pada i pa padapadana mamata sari na nunusa meke guana kavuru memehedi mo.
16 Doduru hudahuda pa Lebanoni si soku, ba lopu pada pude suṉani pa hope,
meke sari doduru kurukuru ṉame vasina si soku, ba lopu pada pude vukivukihi ni.
17 Pa kenuna Sa si sari doduru butubutu si loke guguadi;
doṉo guni ni Sa sapu loke laedi mo
meke na kali gore la tu pa loketoṉa.
18 Gua ke, koe sei mo kote boka padapada la nia goi sa Tamasa?
Pa kineha sa beka kote boka padapada la nia goi si Asa?
19 Ura sa beku si na tie peqopeqo mo tavetia,
meke sa tie tavetavete pa qolo mo va poko nia qolo
meke va sari nia seni siliva sa.
20 Ba sa tie sapu malaṉa sisigiti meke lopu boka i sa sapu gua arini,
si vizatia mo sa si keke huda sapu lopu kote popozu,
meke hata ia sa si keke tie bokana peqopeqo
pude peqo va turu ponia si keke beku sapu lopu kote boka hoqa.
21 Vea, lopu gilania tu gamu?
Lopu hite avoso nia tu gamu?
Lopu hite ta tozi nia tu gamu pa pinodalaena sia?
Lopu hite gilania tu gamu sia, podalae sipu ta kuri sa popoa pepeso?
22 Habotu si Asa pa Nana habohabotuana baṉara pa kali sage koasa bobolokuhaena sa popoa pepeso,
meke sari tinoni pa pepeso si doṉo guana kupokupo mo.
Repahia Sa sa maṉauru guana ṉava poko,
meke ivara vura nia Sa guana ipi pude koa ia.
23 Sari na koburu tavia si va loke laedi i Sa,
meke sari na baṉara pa kasia popoa si va loketoṉa i mo Sa.
24 Lopu seunae ta lete rini,
lopu seunae ta poṉa rini,
lopu seunae va gore karoso rini pa korapa pepeso,
si garunu lani givusu Sa meke harahara dia mo,
meke mae mo sa vivirua meke sara pani mo guana duduli popana.
25 “Ke koe sei va padapada nau gamu si Arau?
Babe esei si kekeṉoṉo gua Arau?” gua si Asa pu Hopena.
26 Eṉa sageni mata mia, mamu doṉo la pa maṉauru:
Esei va podaki sari doduru pinopino vasina?
Asa sapu turaṉa tatasa vura ni sari na pinopino,
meke hopeke poni ni pozapoza.
Koa gua koasa Nana ṉiniraṉira lavata,
ke doduru arini si koa. Lopu keke si muliuṉu.
27 Agoi Zekopi, na vea ke zama si goi,
Agoi Izireli, na vea ke nominomi si goi,
“Sa qua siraṉa si tome koe Zihova;
koari na qua tinasuna si lopu tataru nau na toka nau sa qua Tamasa,” gua?
28 Vea, lopu gilania tu gamu?
Vea, lopu hite avoso nia tu gamu?
Se Zihova, asa sa Tamasa koa hola,
sapu kuri ia sa doduruna sa popoa pepeso.
Lopu kote mabo si Asa babe malohoro,
meke sa Nana ginilagilana si loke tie kote boka ṉana kamoa.
29 Poni ni ṉiniraṉira Sa sarini pu mabo
meke va ṉiṉira i Sa sarini pu malohoro.
30 Sari tie vaqura ba mabo mo meke malohoro,
meke sari palabatu vaqura si tubaraeni meke hoqa;
31 ba arini pu raṉe la koe Zihova
si kote tava vaqura pule sa dia ṉiniraṉira.
Kote tedoro si arini guana atata;
kote haqala si arini ba lopu mabo,
kote ene si arini ba lopu malohoro.