55
Tinioko te Tamasa koari na Tie Memehadi na Oviadi
1 “Mae, gamu doduru pu memeha,
mae koari na kolo;
meke agoi pu loke mua poata,
mae, holu mamu henahena!
Mae, holu vaeni meke meleke
lopu pa poata meke loke hinoluna, vagi moka i mo.
2 Pude vea ke okipalae poata koa sa pu lopu na bereti,
meke sa mua tinabara si la koari ginani sapu lopu variva deṉa?
Va avoso, avoso mae koa Rau, mamu hena ia sa ginani sapu kote leana nia goi,
meke sa maqomaqomu si kote qetu nia sa ginani sapu leanana.
3 Tukeli taliṉamu, mamu mae koa Rau;
avoso Au, pude toa sa maqomaqomu.
Kote tavetia Rau koa goi si keke vinariva egoi sapu koa hola ninae rane,
asa sa Qua tataru nabuna sapu va tatara nia Rau koe Devita.
4 Doṉo la, ele va turua Rau si asa pude na Qua tie va sosode koa ri na tinoni,
na tie tuturaṉa, na koimata koari na tie.
5 Hinokara kote tioko vagi goi sari na butubutu sapu lopu gilani goi,
meke sari na butubutu sapu lopu gilana igo si kote bebeno atu koa goi,
sina koa gua koe Zihova sa mua Tamasa,
Asa pu Hopena pa Izireli,
ura na ele va sari nigo Sa sa tinolava.”
6 Mi hata ia se Zihova sipu korapa boka ta dogoro si Asa,
mi tioko la ia sipu korapa koa tata si Asa.
7 Sari tie kaleadi si madi veko pani sari dia hahanana
meke gua tugo sari binalabala seadi.
Madi kekere la koe Zihova si arini, pude madi ta tatarue koa Sa,
meke koasa nada Tamasa, sina kote taleoso ni Sa si arini.
8 “Ura sari na Qua binalabala si lopu na mia binalabala,
meke sari na mia hahanana si lopu na Qua hahanana,”
zama vura gua se Zihova.
9 “Gua sapu sa maṉauru si ululu hola nia sa popoa pepeso,
gua tugo asa sari Qua hahanana si ululu hola nia sa mia hahanana,
meke sari Qua binalabala si lopu na mia binalabala.
10 Gua sa ruku meke na sinou
sapu hoqa gore mae gua pa galegalearane,
meke lopu sage pule la vasina
osolae ponia kolo rini sa popoa pepeso,
meke va vura liho na va toqoli sari linetelete,
pude ponia kiko sa tie uma meke na bereti tanisa tie hiva henahena,
11 ke gua tugo sa zinama sapu vura pa Ṉuzuqu. Lopu kaqu papona meke pule mae koa Rau si asa,
ba kaqu va gorevura ia sa sa Qua hiniva
meke kaqu vagi ia sa sa laena gua sapu ta garunu la nia sa.
12 Kote vura taloa si gamu pa qinetuqetu
meke ta turaṉa vura pa binule;
sari na toqere na toa
si kote poraka vura pa kinerakera pa kenumu,
meke doduru huda koari na pezara
si kote popoharani lima dia.
13 Na huda leana si kote toqolo vasina meke lopu na huda rakirakihi,
meke na huda arilaedi lopu na hilibubuku.
Sari na ginugua arini si pude ovulu sage nia sa Pozana e Zihova,
pude na vina gilagila sapu loke vina betona,
meke sapu lopu kaqu ta huara.”