66
Pitui Zihova sari na Butubutu
1 Hiera gua si zama nia e Zihova,
“Maṉauru si na Qua habohabotuana baṉara,
meke sa popoa pepeso si na Qua hakehakeana nene.
Avei sa vetu kote kuri poni Au gamu?
Pavei si kote la magogoso si Arau?
2 Vea lopu sari Limaqu tu tavetia sa maṉauru meke sa pepeso
meke sari doduru pu koa pa varikorapadi si Taqarau?”
zama vura gua se Zihova.
“Guahe sa tie sapu qetu nia Rau:
Asa pu va pepekae pule nia meke kekere koa ri nana sinea,
meke pamaṉa nia sa sa Qua zinama.
3 Ba asa pu va vukivukihi nia sa bulumakao
si kekeṉoṉo gua sa tie pu va mate tie,
meke asa pu va vukivukihi nia sa lami
si kekeṉoṉo gua mo sa tie pu liloho mokua sa ruana sa siki;
asa pu la variponi kiko huiti pa hope
si kekeṉoṉo gua si asa pu va vukivukihi ehara boko pa hope,
meke asa pu va uququ oto huda humaṉa lea,
si gua mo sa tie pu vahesi beku.
Ele vizati rini sari hopeke dia siraṉa,
meke sari maqomaqodia si ele hapahapa ni sari dia vinahesi variva malederedi.
4 Gua ke Arau ba kaqu vizata poni tinasuna nomadi tugo,
meke sapu matagutu hola nia arini si kote tava kamo la koa rini.
Ura totoso titioko Arau, loke tie si olaṉa,
totoso zama Rau, si loke tie si va avoso.
Kaleanadi si taveti rini pa Kenuqu
meke vizati rini sapu lopu qetu ni Arau.”
5 Va avoso la koasa zinama te Zihova,
gamu pu neneqara pana avosia sa Nana zinama:
“Sari tasimia koreo si kana gamu si gamu,
meke va ilolae gamu koa gua koa sa Pozaqu, meke zama va sisirei guahe,
‘Mani tavahesi se Zihova,
pude dogoria gami sa mia qinetuqetu!’
Ba kote tava kurekure si arini.
6 Mi avoso la koa sa ṉoveoro pa vasileana lavata,
mi avoso la koa sa vevehe pa Zelepade!
Asa sa mamalaiṉi te Zihova
korapa tubehi Sa sari Nana kana.
7 Sipu lopu ele ta sigiti se Zerusalema,
si podopodo mo si asa;
sipu lopu kamo sa nana totoso
si podoa mo sa si keke koburu koreo.
8 Esei ele avoso nia sapu gugua asa?
Esei ele dogori sari ginugua gugua arini?
Boka podo si keke popoa pa keke rane
babe na binaṉara pa keke totoso hite mo?
Ba lopu seunae ta sigiti se Zaione
si podoi mo sa sari nana koburu.
9 Kaqu va kamo la nia Rau si asa pa totoso ta sigiti
meke lopu va podopodo ia tu?” nanasa gua se Zihova.
“Kaqu tukua tu Arau sa kokoana koburu
pana kamo sa totoso pude podopodo?” nanasa gua sa mia Tamasa.
10 “Mi qetu somanae koe Zerusalema;
gamu doduru pu tataru nia sa vasileana lavata asa!
Mi qetu sisigiti nia sa popoa Zerusalema,
doduru gamu pu talotaṉa nia si asa.
11 Ura kote napo si gamu meke deṉa
guana koburu sapu susu koasa tinana;
kote napo va leana hola si gamu
meke qetu nia sa sokuna gua sa minana tanisa.”
12 Ura hiera gua si zama nia e Zihova:
“Kaqu hoda ia Rau koa sa sa binule, guana ovuku,
meke sari tinagotago tadi na butubutu si kote totolo la koa sa, guana naqe;
kote kopu ni gamu sa meke paleke gamu guana koburu,
meke kuka gamu pa nana tataru.
13 Gua sa koburu sapu va mamania sa tinana,
si kaqu va mamana gamu Arau si gamu;
meke kaqu tava mamana si gamu pa laena Zerusalema.”
14 Pana dogoria gamu si asa, si kote qetu sari bulomia
meke kote toa va leana si gamu guana duduli;
sa ṉiniraṉira te Zihova si kote tava gilana la koari Nana nabulu,
ba sa Nana tinaṉaziri si kote tava dogoro la koari Nana kana.
15 Doṉo la, se Zihova si korapa mae, lulia na nika,
meke sari Nana totopili varipera si guana vivirua;
kote va gore mae ia Sa sa Nana binugoro sapu lulia tinaṉaziri,
meke Nana ginegese sapu lulia nika halalana.
16 Ura pa nika meke pa Nana vedara
si kote va kilasi e Zihova sari doduru tie,
meke kote soku arini si kote va mate i e Zihova.
17 “Arini pu koa vata kale meke va madi puleni
pude nuquru la pa inuma,
lulia sa beku sapu pa vari korapadi ri kasa pu hena boko na kurezu meke kaiqa masa kurukuru bonidi,
arini si kote mate keke gua,” gua se Zihova.
18 “Koa gua koari dia tinavete meke dia binalabala, si kote atu si Rau meke varigara ni sari doduru butubutu na vinekala, meke kote mae dogoria rini sa keanana sa Qua kalalasa.
19 Kote vekoa Rau si keke Qua vina gilagila pa vari korapa dia, meke kote garunu taloa ni Arau si ari kaiqa pu lopu mate pude la koari na butubutu, koari pa Sipeini, pa Libia, pa Lidia vasina ta avosaedi pa kali gona tupi na bokala, pa Tubala, Qurisi, meke koari na nunusa pa seu pu lopu ele avoso nia sa Pozaqu babe dogoria sa Qua ṉiniraṉira. Ari kasa vasina si kote tozi vura nia sa Qua vina lavata koari na butubutu.
20 Meke kote turaṉa pule mae ni rini sari doduru tasimia koreo, koari ninae popoa, pule mae koasa Qua toqere hopena pa Zerusalema. Kote ta turaṉa pa hose, totopili varipera, totopili susuraṉana, meke koari na kameli na miulu. Kote guana keke vinariponi la koe Zihova si arini,” gua se Zihova. “Kote vagi pule mae ni rini, kekeṉoṉo gua totoso susuraṉa mae ni ari tie Izireli sari dia vinari poni huiti pa Zelepade koari na vovoina viadi sapu tava madidi.
21 Meke kote vizati Rau si kaiqa arini pude na hiama meke na tie Livaeti,” gua se Zihova.
22 Zama pule si Asa, “Gua sapu sa maṉauru vaqurana meke sa popoa pepeso vaqurana si kote koa hola ninae rane pa Kenuqu, si sa pozamia meke sari tutimia si kaqu koa hola tugo.
23 Pa keke inevaṉa Sidara Vaqura meke kamo la pule pa keke Sidara Vaqura, meke pa keke Sabati meke kamo la pule pa keke Sabati, doduru tie si kote kamo mae meke todoṉo pa Kenuqu,” gua se Zihova.
24 “Meke totoso pule si arini si kote dogori rini sari na tini matedi tadi na tie pu va karikari mae koa Rau; sari na ulosodi rini si lopu mate, gua tugo sa nika sapu sulu i sari tinidia si kote toa ninae rane ka rane, meke kote doṉo hikare hola pa tie si arini.”