3
Sa Tinarae te Zone Papitaiso
(Maka 1:1-8; Luke 3:1-18; Zone 1:19-28)
1 Pa totoso asa si mae pa soloso qega pa popoa Ziudia se Zone Papitaiso, meke podalae tarae sapu guahe,
2 “Mi kekere koari mia sinea, sina sa Binaṉara Maṉauru d si tata kamo,” gua si asa.
3 E Zone mo hie si guni nia sa poropita Aisea totoso zama si asa:
“Keke tie si korapa tarae velavela guahe pa soloso qega:
‘Mi va nama nia sa siraṉa tanisa Baṉara,
mi va toṉotia vasina pu kote ene si Asa!’ gua.”
4 Sari na poko te Zone si na kalu kameli, meke sa nana dokoho sina kapu kurukuru sapu tava popana, meke gana ginani si na kupokupo meke na zipale.
5 Saripu la avosia se Zone si mae guadi pa Zerusalema, pa doduruna sa popoa Ziudia, meke sari doduru popoa tata pa Ovuku Zodani.
6 Helahelae ni rini sari na dia sinea, meke papitaiso i sa si arini pa Ovuku Zodani.
7 Ba totoso dogoria Zone sapu soku ari tie Parese d meke Sadusi d si mae hiva ta papitaiso d koa sa, si zama i sa, “Gamu na tutimia na noki. Esei va balau gamu pude govete nia sa vina kilasa te Tamasa sapu korapa nono mae?” gua.
8 “Mi vata dogoro paki nia sa vuana sa mia kinekere la koa sa Tamasa.
9 Lopu balabala ia sapu gamu si na tutina e Ebarahami, ke lopu kaqu tava kilasa. Maqu tozini gamu, e Tamasa boka vagi sari patu hire meke va podaka ni koburu pa tutina Ebarahami!
10 Sa maho vinaripitui te Tamasa si ele avaṉa nama, pude mahoi sari karosodi sari huda. Doduru huda sapu lopu leadi sari vuadi si kote ta maho gore meke ta oki la pa nika!
11 Arau si papitaiso gamu pa kolo mo, pude na vina gilagila koasa mia kinekere gamu, ba Asa pu korapa luli mudi mae koa rau si kote papitaiso gamu Sa pa Maqomaqo Hope meke sa nika te Tamasa. Asa si arilaena hola nau si rau. Na sadolo tanisa mo ba lopu garoqu pude paleke ponia.
12 Nana sevolo si palekia Sa pude vari paqahani sari doduru kiko koari qaqalotodi. Kote va naqiti Sa sari kiko pa nana vetu ginani meke sulu pani sari qaqalotodi koasa nika sapu huruṉu eko lamo,” gua si asa.
Sa Pinapitaiso te Zisu
(Maka 1:9-11; Luke 3:21-22)
13 Pa totoso arini si topue maena pa Qaleli meke kamo mae se Zisu koe Zone pa Ovuku Zodani pude ta papitaiso Nana koa sa gua.
14 Ba podekia Zone pude hobe binalabala se Zisu, ke zama la ia sa, “Arau tu si garo pude ta papitaiso koa Goi, na vea ke mae tu si Agoi koa rau?”
15 Ba olaṉa ia Zisu si asa, “Leana mo, ba kamahire mada lulia gita gua sapu kaqu va gorevura i sari doduru hiniva te Tamasa,” gua si Asa. Ke va ego ia Zone.
16 Sipu beto tugo ta papitaiso se Zisu, meke popa sage si Asa koasa kolo, si ta tukele sa Maṉauru, meke dogoria sa sa Maqomaqo Hope gore mae gua na baruku meke mae hake koa Sa.
17 Meke keke mamalaiṉi maena pa Maṉauru si zama guahe:
“Hie tugo sa tuqu koleo sapu qetu zoṉazoṉa nia Arau,” gua.