4
Sari na Tinavete tadi na Tuna Kohati pa Butubutu Livae
1 Zama la koe Mosese se Zihova,
2 “Mu naei sari na tie pa butubutu te Livae sari na tuna koreo Kohati. Paqahi pa butubutu na tatatamana,
3 mamu kubere goreni sari doduru pozadi ri na tie, pu ka toloṉavulu meke kamoa lima ṉavulu vuahenidi, saripu bokabokadi pude tavetavete pa korapa Ipi Hopena pa kenuna e Zihova.
4 Kaqu tavetavete ni rini sari na likakalae hopedi pa hopedi.
5 Pana va namanama sa butubutu te Izireli pude taluarae la pa votiki popoa, se Eroni meke sari na tuna koreo si kaqu nuquru la pa korapa Ipi Hopena, meke kaqu vagi va gorei rini sari na poko goba pa kenuna sa Bokese Vinariva Egoi meke nobi nia koasa Bokese.
6 Kaqu va hake ulue la nia rini sa nobinobi kapu rumu, meke kaqu ivara la nia rini si keke poko bulu ṉiṉirana pa batuna meke kaqu va nuquru lani rini sari na huda palepalekeana.
7 Koasa tevolo pa kenuna e Zihova, si kaqu ivara nia rini sa poko bulu, meke kaqu vekoi rini vasina sari na peleta, meke kaiqa vovoina, na baolo, meke sari na zagi tana napo vaeni; sari na bereti si lopu kaqu makudo hake dia mo koasa tevolo.
8 Kaqu repahia rini sa poko ziṉara, meke va hake ulue ia koari doduru tiṉitoṉa hire, meke kaqu nobi nia kapu rumu, meke tiqe zukuru nuquru lani sari karua huda palepalekeana.
9 Kaqu vagia rini si keke poko bulu, meke nobia sa tuturuana zuke meke sari na zukena, turaṉae ni sari na nopihi na palepalekeana tiṉitoṉa meke sari doduru vovoina oela olive.
10 Kaqu hadei rini sari doduru likakalae arini koa keke kapu rumu meke vekoi rini koa keke tiṉitoṉa palepalekeana, pude paleki.
11 Beto asa, si kaqu ivara nia rini si keke poko bulu pa batuna sa hope qolo, meke nobi nia keke kapu rumu meke tiqe zukuru nuquru lani sari na huda palepalekeana.
12 Kaqu vagi rini sari doduru likakalae saripu tavetavete ni rini pa korapa Ipi Hopena, meke hadei koa keke poko bulu si arini, meke nobi koa keke kapu rumu si arini, meke la vekoi koa keke tiṉitoṉa palepalekeana.
13 Kaqu va vura pani rini sari na eba koasa hope boronizi tana vina vukivukihi, meke kaqu nobi nia rini sa poko pepolo pa batuna sa hope.
14 Kaqu va hakei rini koasa hope sari doduru likakalae, saripu tavetaveteni rini pa vinahesi koasa hope, sapu sari na raro boronizi pude oki pani sari na eba, sari na poka ililiriana masa, sari na raro boronizi pude tana nika, meke sari na besini boronizi pude tana sisiruana ehara, meke kaqu nobi ni koa keke kapu rumu si arini, meke va hakei koa keke tiṉitoṉa palepalekeana.
15 Meke sipu ele nobi ri Eroni meke sari na tuna koreo sari doduru likakalae arini, meke pana kamoa sa totoso pude taluarae sa butubutu te Izireli, si kaqu mae sa butubutu te Kohati meke paleki sari na tiṉitoṉa madidi. Sari na tie pa butubutu te Kohati, si lopu kaqu taṉini sari na tiṉitoṉa hopedi arini, be lopu gua si kote mate si arini.
Arini sari na tinavete tadi na tie pa butubutu te Kohati, pana tava rizu sa Ipi Hopena.
16 Sa tinavete te Eleaza, sa tuna koreo e Eroni sa hiama, si pude kopu nia sa Ipi Hopena meke sari na tiṉitoṉa tanisa meke sa doduruna sa tinavetavete koasa Ipi Hopena sapu na oela tadi na zuke, na oto huda humaṉa lea, meke na vinariponi huiti sapu kaqu ta vala doduru totoso, na oela hopena tana vina madi, meke sari doduru tiṉitoṉa pa korapa Ipi Hopena saripu ele tava madidi koe Zihova.”
17 Meke Zama la koe Mosese meke Eroni se Zihova,
18 “Mi kopuni sari na tie pa butubutu te Kohati,
19 pude lopu tava mate, pude lopu tata mae koari na tiṉitoṉa hope pa hopedi hire si arini. Pude lopu vata evaṉia sapu gua asa, si lopu kaqu dogori rini sari na tiṉitoṉa hopedi. Se Eroni meke sari na tuna koreo si kaqu nuquru la, meke hopeke tozia koari na tie, sa tinavete sapu kote tavetia sa.
20 Ba sari na tuna Kohati si lopu kaqu nuquru la pa korapa Ipi Hope, meke dogori rini sari na hiama sipu korapa va namanama i rini sari na tiṉitoṉa madidi pude ta paleke va rizu,” gua.
Sari na Tinavete tadi na Tuna Qerisoni pa Butubutu te Livae
21 Zama la koe Mosese se Zihova,
22 “Mu naei sari na tuna Qerisoni pa butubutu te Livae, pa hopeke dia butubutu na tatamana.
23 Mamu kubere goreni sari doduru pozadi ri na tie, pu ka toloṉavulu puta vuahenidi meke kamoa lima ṉavulu vuahenidi, saripu bokabokadi pude tavetavete pa korapa Ipi Hopena pa kenuna e Zihova.
24 Sari na dia tinavete si pude paleki sari na tiṉitoṉa hire:
25 Sa Ipi Hope, sari na poko pa korapana, sari na poko pa sadana, sa poko nobi kapu rumu ṉiṉirana pa batuna, sa poko goba pa sasadana,
26 sari na gobagoba poko, meke sari na aroso pusipusiana vari likohaena sa Ipi Hopena meke sa hope, sari na poko goba pa sasadana sa pavasa, meke sari doduru tiṉitoṉa saripu kaqu tavetaveteni rini koari na gobagoba poko. Kaqu taveti rini sari doduru tinavete saripu ta hivae koari na tiṉitoṉa arini.
27 Kaqu kopuni ri Mosese meke Eroni sapu taveti ri na tuna Qerisoni sari doduru dia tinavete meke paleke betoi rini sari doduru likakalae pu va kopuni ri Eroni meke sari na tuna koreo koa rini.
28 Arini sari na tinavete koasa butubutu te Qerisoni pa Ipi Hopena. Kaqu paleki rini sari na tiṉitoṉa tanisa Ipi Hopena koasa vina toṉoto te Itamara sa tuna koreo e Eroni sa hiama.”
Sari na Tinavete tadi na Tuna Merari pa Butubutu te Livae
29 Zama se Zihova koe Mosese pude naei sari na tuna Merari pa butubutu te Livae, podalae koari na dia butubutu hitekedi na tatatamana te Merari,
30 meke kaqu kubere goreni rini pozadi sari doduru tie nomadi sapu toloṉavulu vuahenidi meke kamoa lima ṉavulu vuahenidi, sarini pu bokabokadi pa tinavete pa korapa Ipi Hopena pa kenuna e Zihova.
31 Sa dia tinavete si pude paleki sari na huda barabarana sa Ipi, sari na gaso pilipilivarata, na dedegere, meke sari na vovoina vasina turu sari na barabara tanisa Ipi Hope,
32 meke gua tugo sari na dedegeredi rina gobagoba poko vari likohaena sa pavasa, sari na dedegerena, sari na vovoina, meke sari na aroso pusipusiana, meke sari na tupili, meke sari doduru vinari hodahodaena pude tana vinaturuna. Hopeke tie si kaqu palekia gua sapu tozi nia Eroni koasa.
33 Arini sari na tinavete saripu kaqu taveti rina tuna Merari pa butubutu Livae koasa Ipi Hopena; kaqu paleki rini si arini pa vina toṉoto te Itamara, sa tuna koreo Eroni sa hiama.
Sa Ninaedi ri na Tuna Livae
34-48 Lulia Mosese meke Eroni meke sari na koimata pa butubutu Livae sa zinama te Zihova, meke naei rini sari ka ṉeta butubutu te Livae, ari Kohati, Qerisoni meke Merari. Meke nae va hiteke gorei rini koari hopeke dia butubutu na tatatamana meke tiqe kubere goreni rini pozadi sari doduru tie nomadi podalae toloṉavulu vuahenidi meke kamoa lima ṉavulu vuahenidi saripu bokabokadi pa tinavete koasa Ipi Hopena pa kenuna e Zihova, meke hire sari na sinokudi rini:
Koasa butubutu Kohati si ari ka karua tina zuapa gogoto lima ṉavulu tie.
Koasa butubutu Qerisoni si ari ka karua tina onomo gogoto toloṉavulu tie.
Koasa butubutu Merari si ari ka ṉeta tina karua gogoto tie.
Sa vinarigaraedi ri doduru tie si ari ka vesu tina lima gogoto vesu ṉavulu.
49 Hopeke tie si ta nae pa ginarunu te Zihova koe Mosese, meke pa ginarunu tugo te Zihova koe Mosese si ta poni tinavete sari hopeke tie pude paleki sari na tiṉitoṉa tanisa Ipi Hopena.