24
Sa Zinama Vina Manege Sia
1 Mu lopu va gulea i sari tie kaleadi,
lopu okoro la baere i;
2 ura sari bulodi si balabala hata vinaripera mo,
meke sari berudia si vivinei hata tinasuna.
Sa Zinama Vina Hiokona
3 Pa ginilagilana lohina si ta kuri sa vetu,
meke pa ginilae si tava nabu si asa;
4 pa tinumatumae si tava siṉi sari losena,
koari na tinago leleadi meke arilaedi.
Sa Zinama Vina Hiokona Eke
5 Na tie gilae si nomana nana ṉiniraṉira,
meke sa tie tumatumae si ṉiṉira hola la tu;
6 pude la pa vinaripera si kaqu ta totolie si agoi,
ba pana soku tie si vari tokae pa binalabala si koa sa minataqara.
Sa Zinama Vina Hiokona Rua
7 Sa ginilagilana lohina si ululu hola koasa tie pekipeki;
ke pa vinarigara palabatu si loke nana zinama si asa.
Sa Zinama Vina Hiokona Ṉeta
8 Asa pu balabala hata kinaleana
si kote ta pozae na tie sekesekei.
9 Sari hiniva tomedi pude tavete va kaleana si na sinea,
meke na tie va gugue si ta hakohakoedi pa tie.
Sa Zinama Vina Hiokona Made
10 Pana malohoro si goi pa totoso tasuna,
si hitekena mo sa mua ṉiniraṉira.
Sa Zinama Vina Hiokona Lima
11 Harupi si arini pu korapa ta turaṉa la pa minate;
tuqe pule vagi sarini pu korapa tedeve la pude ta seke va mate.
12 Pana zama si goi, “Ba lopu na qua ginugua si hie,” gua.
Ba Tamasa tumae ni sari bulo tie meke dogorigo Nana.
Asa pu kopu nia sa mua tinoa si gilanigo tugo Nana.
Kote pia igo Sa luli gua koari na mua tinavete.
Sa Zinama Vina Hiokona Onomo
13 Tuqu, mu hena zipale sina leana si asa;
na namu zipale si lomoso pa mea.
14 Mamu gilania tugo sapu sa ginilagilana lohina si lomoso pa maqomaqomu;
pana dogoria goi, si na mua lineana vugo repere si asa,
meke sa mua lineana asa si lopu kaqu ta kumata palae.
Sa Zinama Vina Hiokona Zuapa
15 Mu lopu la opo tome pa kali vetu tanisa tie toṉoto,
lopu la hiko ia sa vasina tanisa;
16 ura be ka zuapa totoso si hoqa sa tie toṉoto, ba kote turu sage pule nana,
ba sa tie kaleana si lopu kote tekulu pule mudina sa tinasuna.
Sa Zinama Vina Hiokona Vesu
17 Mu lopu qetu pana hoqa sa mua kana;
pana ta tubarae si asa, si mu lopu va qetua sa bulomu,
18 na kote dogoria e Zihova meke lopu va egoa
meke kote rizua Sa sa Nana tinaṉaziri koasa.
Sa Zinama Vina Hiokona Sia
19 Mu lopu balabala mamata ni sari na tie pu tavete va kaleana
babe okoro ni sari dia tinago,
20 ura sari tie kaleadi si loke dia lineana pa vugo na repere,
meke sa zuke tadirini si kote tava mate.
Sa Zinama Vina Toloṉavulu Puta
21 Tuqu, mu pamaṉa nia se Zihova meke sa baṉara,
meke lopu somana ni saripu lopu hiva va tabe la koa rini,
22 ura ari karua boka garunu va hodaka la tinahuara koari kasa.
Na esei kote boka gilania sa tinasuna kote va kamo la nia ri karua koa rini?
Kaiqa Zinama Ginilae Pule
23 Hire tugo si kaiqa zinama ginilae:
Pude tokatoka kale pa totoso vari pitui si lopu leana.
24 Asa pu zama koasa tie koa ia sinea, “Agoi si toṉoto mua”
si kote leve nia rina tie si asa meke kilua rina butubutu.
25 Ba kote ta qetue si arini pu va kilasi sarini pu tavete sea,
meke na minana si kote kamo la koa rini.
26 Na inolaṉa hinokarana
si variva qetu hola.
27 Va hokotia sa mua tinavete pa sada,
meke va nama ni sari na mua inuma;
beto asa si mu kuria sa mua vetu.
28 Mu lopu va sosode hoboro la koasa turaṉamu,
babe kokoha nia sa berumu.
29 Mu lopu zama, “Kaqu tavete la nia rau koasa gua sapu tavete mae nia sa koa rau;
kaqu hobequ si arau.”
30 Ene hola nia rau sa inuma tanisa udapelu,
hola nia sa inuma vaeni tanisa tie sapu lopu tumae balabala;
31 na hiqohiqo rakihi si sage doduru vasina,
sa pepeso si ele arahia na hilibubuku,
meke sari gobana si ele huara gore.
32 Doṉo la si rau meke vilitia,
si keke tinumatumae si dogoria rau:
33 Na puta hola hite mo, opo hite mata mo,
va polo hitei mo sari lima pude magogoso,
34 gua si raza mo sa hinabahuala, guana tie hikohikona,
meke sa minalaṉa si rapata guana keke kana.