6
Kaiqa Vina Balau
1 Tuqu, be va tatara si goi pude hobea sa gale tana keke votiki tie pana lopu boka si asa,
be va egoa goi pude lipu ponia si asa,
2 meke veko pule nigo pa sipata si goi koari mua zinama,
tasuna ni goi sapu ele zama veko ni goi pa ṉuzumu,
3 si mu tavete gua hie, tuqu, pude va rupaha pule nigo,
ura ele veko pule nigo pa ṉiniraṉira tanisa keke tie sana.
Va pepekae pule nigo, mamu la koasa tie asa;
mamu tepa sisigiti pude vata rupahigo koasa gale.
4 Mu lopu puta,
lopu la va opo paki mata si agoi.
5 Vata rupaha pule nigo, guana igana koasa vaqara tana tie habu;
guana kurukuru tapuru koasa sipata.
6 Mu doṉo la koari na menemene, agoi na tie hakohako;
mu tumae ni sari dia hahanana, mamu gilae!
7 Loke dia koimata,
loke tie tuturaṉa babe na palabatu,
8 ba hata varigara ginani si arini totoso maṉini sa popoa,
meke qireqire nia arini sa totoso ibu.
9 Agoi na tie hakohako, vea seunae gua si kote puta goi?
Totoso sa si kote tekulu goi?
10 Na puta hite, opo hite mata,
polo hitei sari lima pude magogoso,
11 gua hoi si raza mo sa hinabahuala, guana tie hikohikona,
minalaṉa si rapata guana keke kana.
12 Keke tie loke laena meke na tie kaleana
si ene vilorae lamae meke zama hoboro nia ṉuzuna,
13 meke putaputa kale mata pude turaṉa va sea igo,
zozoti nene na sipusipu lamae,
14 pa dia binalabala si pude taveti kaiqa ginugua sinekesekei gua,
doduru totoso si na tinasuna mo si hiva evaṉi rini.
15 Gua asa ke kote hinoqa kamoi na kinolura si arini;
hodahodaki si raza mo sa tinahuara sapu loke hinarupu koa ia.
16 Koa dia si ka onomo ginugua sapu kana hola i e Zihova, ka zuapa tiṉitoṉa sapu lopu qetu sisigiti ni Sa:
17 sa dinoṉo vahesi pule,
na mea sapu kokoha,
na lima sapu va mate tie loke nana sinea,
18 na bulo sapu hatahata ginugua kaleadi,
sa nene sapu tuturei haqala la pa kinaleana,
19 sa tie va sosode sapu kokohana,
meke sa tie sapu sovutu tinasuna koari tasina.
Na Vina Balau koasa Binarabarata
20 Tuqu, mu kopu ni gua sapu tozi nigo sa tamamu,
lopu kilui sari vina tumatumae tanisa tinamu.
21 Pusi ni ninae rane pa bulomu;
mamu pakui pa ruamu.
22 Totoso ene goi si kote turaṉigo rini;
totoso puta goi, si kote kopu nigo rini;
totoso vaṉunu goi si kote zama igo rini.
23 Ura sari tinozi hire si na zuke,
sa vina tumatumae hie si na kalalasa,
sari na ginegese pa tinarae te Tamasa
si na siraṉa la pa tinoa,
24 sapu va balau igo koa rina barikaleqe barabaratadi,
koari na zinama lomosodi tadi na votiki barikaleqe.
25 Mu lopu roro ia sa dinoṉo lea tanisa
babe ta sipata vagi koari na matana,
26 ura na tinabarana sa maqota si pada keke botubotu bereti;
ba sa pinuta turaṉana sa barikaleqe tana votiki tie si na mua tinoa mo si holuholu nia goi.
27 Boka paleke kapae nia goi pa raqaraqamu sa nika
meke lopu ta sulu mua poko?
28 Boka enei goi sari patu leradi,
meke lopu ta kina sari ola nenemu?
29 Gua asa sa tie pu puta turaṉia sa barikaleqe tana votiki tie;
asa pu tiqu la ia sa barikaleqe asa si kaqu tava kilasa.
30 Na tie hikohiko si lopu ta hakohakoe
pana hiko si asa sina na ovia nana.
31 Ba pana ta poho sa, si kaqu lipulipu zuapa totoso laena sapu hikoa sa,
kote padana doduru likakalae pa nana vetu.
32 Ba sa tie sapu barabarata si loke nana binalabala leadi,
asa sapu tavete gua asa si ṉovala pule nia mo.
33 Kaqu ta seke va bakora meke ta hakohakoe si asa,
sa kinurekure tanisa si loke kokoina.
34 Ura na kono va gevuruna sa tinaṉaziri tanisa nana palabatu,
ke kote lopu balabala pule si asa pana la varipera si asa koasa.
35 Lopu kaqu vagia sa sa hinerehere;
na vinariponi, vea soku gua, ba lopu kote va ibua sa binugoro tanisa.