45
Keke Kinera Varihaba Tanisa Baṉara
(Keke kinera tadi na tie pa butubutu Livae pa tutina e Kora: Na Kinera Vinarihaba)
1 Sa buloqu si siṉia na zinama leleadi,
sipu tavetia rau sa kinera hie pude tanisa Baṉara.
Sa meaqu si gua tugo na peni kubekubereana
tanisa tie bokabokana kubekubere.
2 Agoi mo si tolavaemu hola koari doduru tie,
sari na Mua zinama si siṉi i na tataru,
gua asa ke mana nigo Tamasa si goi ninae rane ka rane.
3 Mu palekia sa mua magu varipera,
ke agoi na tie varane pa vinaripera.
Agoi si na baṉara lavata ṉiṉiramu,
meke poko nia goi sa tinolava variva magasana.
4 Mamu ene la pa mua tinolava,
mamu lavelave hukata nia sa hinokara meke na tinoṉoto.
Mamu mataqara koasa mua ṉiniraṉira
koari doduru Mua tinavete pa lima mataomu.
5 Ṉarudi sari na mua tupi,
ke qaha nuquru si arini pa bulodi ri na mua kana.
Hoqa todoṉo pa kenumu Goi sari na butubutu pa kasia popoa.
6 Ke Tamasa, sa Mua habohabotuana Baṉara
si koa hola ninae rane ka rane.
Koa totoli ni Goi sari na Mua tinoni pa tinoṉoto.
7 Tataru nia goi sa tinoṉoto,
ba kukiti nia goi sa kinaleana.
Gua asa ke vizatigo,
meke va madigo sa mua Tamasa si goi,
pude poni nigo sa qinetuqetu nomana,
hola ni sari doduru turaṉamu.
8 Tava humaṉa lea sari na mua poko koa sa moa, na aloesi, meke na kasia,
sari na tie mikemike si va qetuqetu igo koasa mua vetu baṉara
sapu tava sarie kadakada livo elopaniti.
9 Sari na tudia vineki rina baṉara
si koa somanae koari na barikaleqe pu ta pamaṉaedi,
meke pa kali mataomu si turu nana sa kalaho
sapu tava sarie qolo ṉedala.
10 Tuqu vineki, mu avoso valeana mae koa rau.
Mamu veko pani sari na mua butubutu soti,
meke sa mua tatamana soti.
11 Okoro nia sa baṉara sa mua tinolava,
asa tu sa mua baṉara,
ke mamu va lavatia.
12 Sari na tie koasa vasileana nomana pa Taera,
si kaqu paleke ponigo vinariponi,
sari na tie tagotagodi hola ba kaqu paleke ponigo
soku votivotiki vinariponi arilaedi.
13 Tolavaena hola sa vineki tavia
sapu sa kalaho tanisa baṉara.
Ta piti turaṉae qolo sari nana poko
sipu koa si asa koasa vetu baṉara.
14 Visoviso va leleana sari nana poko
totoso turaṉa la nia rini si asa koasa baṉara,
meke luli la koasa sari kasa vineki
pu turu turaṉia sa kalaho,
meke turaṉa lani tugo rini si arini koasa baṉara.
15 Pa qinetuqetu si ta turaṉa nuquru la sarini koasa vetu baṉara.
16 Agoi na qua baṉara,
kaqu soku sari na tumu koreo
pude hodaia sa binaṉara tadi kasa tiatamamia pukerane,
meke kaqu va evaṉae ni na tie totoli goi si arini pa doduruna sa popoa!
17 Kaqu vata evaṉia rau sa vina balabalana sa pozamu pa doduru sinage na sage.
Gua asa ke kaqu vahesigo rina tinoni si agoi ninae rane ka rane.