6
Vinaravara Tinepa Tinokae te Devita pa Totoso Tasuna
1 Kei Zihova, Mu lopu noreau pa Mua binugoro,
Mu lopu tubehau pa Mua ginegese.
2 Mu tataru nau Zihova,
ura malohoro si rau.
Kei Zihova, Mu tataru nau, Mamu salaṉau na va ṉiṉira au,
sina malohoro meke ta sigiti sari na susuriqu.
3 Talotaṉa hola si rau!
Kei Zihova! Vegua ke aqa seunae si Goi?
4 Ke mae Mu tataru nau doduru totoso.
Kei Zihova, harupau!
Va sare au pa minate.
5 Ura pa popoa tadi na tie matedi si loke tie boka balabala pule Igo.
Meke loke tie si boka poni Nigo vinahesi vasina.
6 Mabo qua kabo si rau pa kinuliusu,
doduru boṉi si kabo pa tinalotaṉa si rau,
meke bobosia kolomata sa qua teqe.
7 Pa korapa qua kinabo pa tina lovoho
si tava rida sari na mataqu,
sina koa gua koari na qua kana.
8 Mi taloa koa rau gamu doduru pu tavetavete va kaleana,
ura ele avosia e Zihova mamalaiṉina sa qua kinabo.
9 Avosia e Zihova sa qua kinabo alili la koa Sa,
meke kaqu olaṉia Sa sa qua vinaravara.
10 Sari doduru qua kana si kaqu kurekure nia sa vina kilasadi,
kaqu hinoqa kekere pule taloa pa kinurekure si arini.