60
Tinepa La Vinasare Koe Tamasa
(Sa kinera te Devita totoso la razai sa sari na tie varipera pa Siria pu mae pa popoa Mesopotemia meke Zoba, meke va matei Zoabi sari ka manege rua tina tie Edomu pa Lolomo Solo.)
(2 Samuela 8:13; 1 Koronikolo 18:12)
1 Kei Tamasa, ele etulu gami Goi,
meke ele va kilasa gami Goi si gami.
Ele bugoroni gami Goi
ba Mamu poni puleni gami sa ṉiniraṉira.
2 Agoi, si va niu ia sa pepeso,
meke ta viqala si asa.
Mu salaṉi Goi sari na Mua tie
pu ele ta huara guana pepeso.
3 Ele vata sigiti i Goi sari na Mua tie koari na tiṉitoṉa tasunadi,
ele guana va naponi gami vaeni Goi,
ke viviri si gami meke ene tedeve lamae.
4 Ele va balaui Goi sarini pu pamaṉa nigo,
pude di va talevara koasa tinahuara.
5 Mu harupu gami pa Mua ṉiniraṉira,
Mamu olaṉia sa mami vinaravara, gami pu tataru nigo,
pude tava mataqara si gami pa Mua ṉiniraṉira.
6 Ele zama sa Tamasa pa Nana vasina hopena,
“Pa korapa minataqara si kaqu paqapaqaha si pa vasileana Sekemi,
meke kaqu paqahia rau sa Lolomo pa Sukoti koari na Qua tie.
7 Taqarau sa popoa Qileadi,
Taqarau tugo sa butubutu Manase.
Sa butubutu Iparemi si na butubutu tadi na tie varipera,
meke sa butubutu Ziuda si tadi na baṉara.
8 Moabi si kote guni nia Rau Qua besini pezapezakuana koasa popoa.
Pa Edomu si kaqu gona la nia Rau sa Qua sadolo,
pude na vina gilagilana sapu Taqarau si asa.
Koari na tie Pilisitia si kaqu velavela la nia Rau sa Qua minataqara.”
9 Kei Tamasa, esei si kaqu turaṉa gami pude la nuquria gami sa vasileana lavata ta barana?
Esei si kaqu turaṉa lani gami pa Edomu?
10 Kei Tamasa, kilu gami mo Goi si gami?
Lopu kaqu luli somanae tu si Goi koasa mami qeto minate?
11 Kei Tamasa, mae tokani gami pude razai sari na kana,
ura sa tinokae tana tie si loke guguana.
12 Pude somana si Goi koa gami si kaqu mataqara si gami,
Agoi mo si boka va kilasi sari na mami kana.