83
Tinepatepa pude Va kilasi sari na Kana te Izireli
(Keke kinera te Asapa)
1 Kei Tamasa, Mu lopu makudo zama, meke lopu kulu;
Mu lopu koa noso si Goi!
2 Ura dotu, korapa ṉoveoro pa tinaṉaziri sari na Mua kana,
meke sarini pu kukiti Nigo si korapa varipera atu koa Goi.
3 Korapa tavete tomei rini sari na dia minizimizi golomodi pude va kilasi sari na Mua tinoni.
Korapa kuhana ni rini sari na Mua tie pu lavelave hukata ni Goi.
4 Zama si arini, “Mae, aria mada va puzulu ia gana sa dia butubutu,
pude kaqu ta muliṉae palae hokara gana sa butubutu Izireli ninae rane ka rane,” gua si arini.
5 Ele variva egoi si arini koasa dia binalabala kineke hie,
meke tavetia rini si keke vinariva egoi tadi na kana pude varipera atu koa Goi;
6 sari na butubutu Edomu na Isimeli;
sari na butubutu Moabi meke Haqiraiti,
7 sari na tie Qebala, Amoni, meke Amaleki,
meke ari na Pilisitia, meke Taea.
8 Ari na tie pa Asiria ba somana la tugo koa rini.
Na tie varipera ṉiṉiradi si arini
pude koa turaṉi sari na butubutu Moabi meke Amoni pa tutina e Loti.
9 Mu va kilasa guni ni gedi ari na tie Midiani pu va kilasi e Qitione,
meke gua tugo ari Sisera e Zabini pa Ovuku Kisoni.
10 Ele va kilasi Goi sarini pa popoa Edora,
meke muzi ta huara vasina sari na tinidia.
11 Mu evaṉia koari na dia koimata gua sapu tavete ni Goi sari Orebi meke Zebi.
Mu va kilasi sari doduru dia tie koimata gua sapu va kilasa guni ni Goi sari Zeba meke Zalamuna
12 saripu zama guahe: “Kaqu zau vagia pude na nada,
sa pepeso te Tamasa,” gua.
13 Kei qua Tamasa, Mu va talahuarae guni gedi na kavuru pa givusu,
Mu guni gedi na hikahika huiti pu givusu pani.
14 Kekeṉoṉo guana nika sapu sulu betoa sa hiqohiqo,
meke sa halalana sa nika pu sului sari na toqere,
15 si Mamu hadu va tarazuzui gedi si arini guana raneboṉi.
Va holoqoru i gedi si arini guana givusu ṉiburuna.
16 Mu va kurekurei gedi si arini,
pude madi gilania rini sa Mua ṉiniraṉira.
17 Madi tava kilasa, na matagutu si arini ninae rane.
Madi mate palae gedi si arini pa kinurekure kaleadi hola.
18 Madi gilania rini sapu Agoi mo telemu se Zihova,
sapu Ululuna Hola koari doduru pa kasia popoa.