11
Tava Baṉara se Devita pa Popoa Izireli meke Ziuda
(2 Samuela 5:1-10)
1 Meke mae koe Devita pa Heboroni sari doduru butubutu Izireli meke zama, “Gami si na masamu na eharamu soti.
2 Pa totoso ele hola, sipu korapa koa baṉara se Saula, ba agoi mo si turaṉa lani pa vinaripera sari na tinoni Izireli, meke ele va tatara nia Zihova sa mua Tamasa sapu agoi kaqu turaṉi na kopu ni sari Nana tinoni meke na dia baṉara, gua.”
3 Ke mae pa Heboroni koe Devita, sa baṉara, sari doduru koimata pa popoa Izireli. Ke tavetia sa si keke vinariva egoi madina koa rini pa kenuna e Zihova. Va madia rini meke ta evaṉae na baṉara pa Izireli si asa gua sapu ele va tatara nia Zihova koe Samuela.
4 Beto sapu gua asa si topue la se Devita meke sari na tie Izireli pa Zerusalema; na Zebusi sa pozana pa totosona asa.
5 Tozi nia ri na tie pa Zebusi se Devita, “Lopu kaqu nuquru hokara mae si agoi tani,” gua. Ba zau vagia Devita sa vasileana asa pa korapana sa bara ṉiṉirana pa Zaione, meke podalae ta pozae na “Vasileana Lavata te Devita” si asa.
6 Sipu lopu ele ta vagi sa vasileana, si zama se Devita, “Sa tie pu rapata kekenu i sari tie Zebusaiti si kaqu na koimata koari na tie varipera.” E Zoabi, sa tuna e Zeruia, si turaṉia sa vinaripera, ke asa tugo sa koimata koasa qeto minate varipera tadi Izireli.
7 Sina vasina si veko kinoa sa baṉara Devita, ke ta pozae na “Vasileana Lavata te Devita”.
8 Kuri hoda pulea e Devita sa popoa asa. Podalae pa gasa rimata panapeka kamoa panaulu si va siṉi nia patu na pepeso sa pude va ṉiṉira ia sa goba vari likohaena sa vasileana lavata asa, meke e Zoabi si kuri va vaqura pule ia sa kukuruna sa vasileana.
9 Ke ṉiṉira nono latu se Devita, sina se Zihova Tadi na Qeto Minate si somana koa koasa.
Sari na Tie Varane pa Vinaripera te Devita
(2 Samuela 23:8-39)
10 Hire pozadi sari na tie varipera bokabokadi te Devita. Arini meke sari doduru tie pa Izireli na zuka ia meke va baṉaria, gua pu va tatara nia se Zihova pa guguana Izireli.
11 Kekenu si e Zasobeami pa tutina e Hakemoni, na koimata koari “Ka Ṉeta”. Hiru nia sa sa nana hopere pa vinaripera koari Ka Ṉeta gogoto tie, meke va mate betoi sa pa keke rinapata.
12 Vina rua koari Ka Ṉeta tie bokabokadi si e Eleaza, tuna koreo e Dodo, pa puku butubutu te Aho.
13 Varipera turaṉia sa se Devita pa Pasi Damimi meke razai sari na tinoni Pilisitia sapu varigaradi vasina pude varipera. Pa inuma linetelete bale si koa si asa totoso govete sari na tinoni Izireli.
14 Ba se Elieza meke sari na nana tie si turu va nabu pa korapana sa inuma bale meke toketoke nia rini meke seke va mate i rini sari na tie Pilisitia. Vala nia Zihova koasa sa minataqara nomana.
15 Keke rane, Ka Ṉeta koari ka toloṉavulu puta ṉati koimata tie varipera si gore la koe Devita koasa patu tata pa bae pa Adulamu, sipu korapa koa pa lolomo Repaemi sari na tie Pilisitia.
16 Koasa totoso asa si koa ia Devita sa toqere ta barana, meke ari keke puku tie Pilisitia ele vagia meke koa ia si pa Betilihema.
17 Balabala pule se Devita meke zama, “Kei be keke tie mo si la utuvu poniau kolo napo koasa berukehe pa kali sasada pa Betilihema.”
18 Varipera nuquru la sari Ka Ṉeta tie varane koari na tinoni Pilisitia, meke la utuvu vagi kolo napo koasa berukehe, meke paleke pule la vala nia rini koe Devita. Ba korona napo ia sa; meke zoropo nia sa pude guana vinariponi la koe Zihova.
19 Meke zama si asa, “Zihova, lopu boka napoa rau si hie! Kote guana napoi mo rau eharadi sari na tie pu tasuna pa dia tinoa totoso la vagi kolo!” Ke korona napoa sa. Arini sari na tinavete mataqaradi saripu taveti ri Ka Ṉeta tie varane.
20 E Abisai sa tasina e Zoabi sina koimata koari ka Toloṉavulu Puta Tie Varane. Hiru nia sa sa nana hopere koari ka ṉeta gogoto tie meke va mate betoi sa, meke noma pozana si asa koari ka toloṉavulu puta tie varane.
21 Asa si ta avosae hola koari ka Toloṉavulu Puta meke evaṉae na dia koimata, ba lopu kamoi tugo sa sari “Ka Ṉeta”.
22 E Benaea, sa tuna koreo e Zehoiada pa Kabuzili, si keke tie bokabokana pa vinaripera. Soku tinavete varane si taveti sa, kekeṉoṉo gua koasa vina matedi ri karua ṉati tie varane pa Moabi. Keke rane, totoso sinou sa popoa, si nuquru gore la pa pou lohina si asa meke seke va matea sa si keke laione.
23 Keke tie Izipi tugo si va matea sa, na tie nomana hola si asa sapu karua mita gelena. Sa nana hopere sapu tuqea sa si moata hola gua tugo na hudana sa heta. Na kukuru huda moatana si la seke nia e Benaea koasa, meke saputu vagia e Benaea pa limana sa nana hopere, meke huma va mate nia sa koasa.
24 Arini sari na tinavete mataqaradi te Benaea tuna e Zehoiada, sapu keke tugo koari ka “Toloṉavulu puta”.
25 Ta avosaena si asa koari ka “Toloṉavulu puta”, ba lopu hola ni sa sari “Ka Ṉeta”. Meke vekoa Devita si asa, pude na koimata koari nana tie kopu.
26-47 Hire pule sari kaiqa tie varane:
Asahele, tasina e Zoabi,
Elehanana tuna koreo e Dodo pa Betilihema,
Samoti pa Harodi,
Helezi pa Peleti,
Ira tuna koreo Ikesi pa Tekoa,
Abieza pa Anatoti,
Sibekai tie pa Husa,
Ilai pa Aho,
Maharai pa Netopa,
Helebi tuna Bana pa Netopa,
Itai tuna koreo e Ribai pa Qibea pa Benisimane,
Benaea pa Piratoni,
Hurai koari na lolomo tata pa Qasi,
Abieli pa Araba,
Azamaveti pa Bahurimi,
Eliaba pa Salaboni,
Hasema pa Qizoni,
Zonatani tuna e Sagi pa Hara,
Ahiama tuna koreo e Sakara pa Hara
Elipali tuna koreo e Uri,
Hepera pa Mekera,
Ahiza pa Peloni,
Heziro pa Kameli
Narai tuna koreo e Ezibai,
Zoili tasina Netani,
Mibiha tuna koreo Haqira,
Zeleki pa Amoni,
Naharai pa Biroti, tie paleke poko varipera te Zoabi,
Ira meke Qarebi pa Zatiri,
Uraea sa tie Hitaiti,
Zabada tuna koreo e Ahalai,
Adina tuna koreo e Siza, si keke tie tuturaṉa pa butubutu te Rubeni; koimata ni sa si keke puku toloṉavulu puta tie varipera,
Hanani tuna koreo Ma'aka,
Zosapati pa Mitana,
Uzia pa Asitera,
Sama meke Zeieli, karua koreo te Hotahamu pa Aroere,
Zediale meke Zoha tuna Simiri pa Tizi,
Elieli pa Mahava,
Zeribai meke Zosavia, karua koreo te Elenamu,
Itamara pa Moabi,
Elieli, Opeti, meke Zasiele pa Zoba.