17
Inavoso te Netani koe Devita
(2 Samuela 7:1-17)
1 Sipu ele koa pa nana vetu baṉara se Devita, si zama si asa koe Netani sa poropita, “Hiera si arau korapa koa pa keke vetu sapu ta tavetae huda sida, ba sa Bokese Vinariva Egoi te Zihova si ta kopue pa keke ipi mo!”
2 Olaṉa se Netani, “Mu tavetia gua sapu koa pa mua binalabala, sina sa Tamasa si koa Nana koa goi.”
3 Ba pa boṉi tugo asa si zama koe Netani se Zihova,
4 “La mamu tozi nia sa qua nabulu Devita sapu Arau si zama guahe koa sa, ‘Lopu agoi kaqu tavetia sa Zelepade pude vasina koa si Rau.
5 Podalae tu pa totoso sipu harupi Rau sari na tinoni pa Izipi kamoa kamahire, si lopu hite koa pa Zelepade si Rau, ba koa mo pa ipi sapu rizu pa keke vasina la pa keke vasina.
6 Koari doduru Qua inene somanae koari na tinoni Izireli, si namu lopu hite tepa ia Arau si keke rina koimata saripu ele huhuki Rau, sapu “Na vegua ke lopu tavete poni Nau gamu si keke Zelepade sapu ta tavetae huda sida?” ’ gua!
7 Ke tozi nia sa Qua nabulu Devita sapu Arau se Zihova Tadi na Qeto Minate si zama koa sa: ‘Arau si vagi igo sipu korapa kopu sipi si goi pa pezara duduli meke va palabatu igo Arau koari na qua tinoni Izireli.
8 Meke koa turaṉa igo Arau pa ninae vasina pu la agoi, meke va kilasi Arau sari na mua kana, sipu raza la i goi. Kaqu va arilaemu igo Rau si goi gugua ari na koimata nomadi pa kasia popoa.
9-10 Ele vizatia Rau si keke vasina tadi na Qua tie Izireli meke ele va koa i Rau vasina, vasina pu kaqu koa si arini meke lopu kaqu ta ṉoṉovala pule. Podalae pa totoso sipu nuquria rini sa popoa hie, si ta raza lamo koari na tie kaleadi si arini, ba lopu kaqu ta evaṉa pule sapu gua asa. Va tatara nia Rau sapu kaqu va sare igo Rau si goi koari doduru mua kana meke kaqu kuri ponigo e Zihova si keke vetu.
11 Pana mate si goi meke ta pomunu turaṉae koari na tiatamamia, si kaqu va baṉaria Rau si keke rina tumu meke kaqu va koa hola ia Rau sa nana binaṉara.
12 Asa kaqu kuria sa Zelepade Taqarau, meke kaqu va koa hola ia Arau sa nana binaṉara ninae rane ka rane.
13 Arau si kaqu na Tamana sa, meke kaqu na Tuqu koreo Rau si asa. Lopu kaqu vagi pania Rau koasa sa Qua tataru gua sapu evaṉia Rau koasa pu va baṉara kekenu ia Rau koa goi.
14 Ba kaqu va baṉaria Rau pude kopu nia sa Qua vetu meke sa Qua binaṉara ninae rane; meke sa nana binaṉara si loke vinabetona.’ ”
15 Tozi beto lani Netani koe Devita sari doduru gua pu tozi nia Tamasa koa sa.
Vinaravara Zinama Leana te Devita
(2 Samuela 7:18-29)
16 Meke sipu avosia Devita sa zinama te Zihova koe Netani, si nuquru sa baṉara Devita pa korapa ipi pa kenuna e Zihova. Habotu si asa meke varavara: “Ke Zihova, Tamasa, lopu garoqu rau gua sapu ele tavete mae ni Goi koa rau, gua tugo koari na qua tatamana.
17 Ba sapu tavetia Goi kamahire si noma hola latu Zihova Tamasa. Ke Zihova Baṉara, na va tatara nia Goi sa tutiqu rau, sa Mua nabulu, koari na vuaheni na sinage pu korapa mae tu!
18 Na sa si kote boka zama nia pule arau? Gilanau Mua mo, na Mua nabulu si rau, ba va lavata au tu Agoi.
19 Na Mua hiniva meke pa laena sa Mua nabulu Goi pude tavete mae nia si hie koa rau, meke pude vata gilana nia koa rau sari na Mua vina tatara nomadi hire.
20 Loke tamasa pule si gugua Agoi, Zihova; meke pa taliṉa mami avosi gami sapu Agoi mo telemu sa Tamasa.
21 Loke butubutu pule pa pepeso si gugua Izireli, sapu vata rupahi Goi pa tinoa pinausu, pude vata evaṉae ni na Mua tinoni soti. Sari na tinavete arilaedi na variva magasadi pu tavete poni ni Goi si vata gilana nia sa inavosomu Goi pa kasia popoa. Harupi Goi pa Izipi sari Mua tie meke hadu pani Goi sari kaiqa butubutu sipu korapa ene la sari na Mua tinoni.
22 Meke vata evaṉae ni na Mua tie soti Goi sari na tie Izireli ninae rane ka rane, meke Agoi Zihova, si ta evaṉae na dia Tamasa soti.
23 Meke kamahire, Zihova, va gorevura ia ninae rane ka rane sa Mua vina tatara sapu ele tavete mae nia Goi koa rau meke koasa tutiqu. Tavetia gua sapu ele zama nia Goi.
24 Sa inavosomu Goi si kaqu arilaena hola, meke kaqu zama guahe sari na tie ninae rane, ‘Zihova Tadi na Qeto Minate, sa Tamasa, si na Tamasa tadi pa Izireli.’ Meke sa tutiqu sa Mua nabulu, arau se Devita, si kaqu kopu nia Goi pa ninae totoso.
25 Agoi qua Tamasa, va mataqara au si rau pude varavara atu koa Goi, sina ele va bakali tu Goi koa rau, na Mua nabulu, sapu kaqu na baṉara sari na tutiqu.
26 Zihova, Agoi mo sa Tamasa, meke ele va tatara nia Goi sa ginugua tolavaena hie koa rau.
27 Ego, ele mana nia Goi sa tutina sa Mua nabulu pude lopu makudo sa binaṉara tanisa tutiqu. Ura Agoi, Zihova, ele mana nia, ke ele koa ta manae si asa ninae rane ka rane.”