11
Sa Tataru te Tamasa koari na Tie Izireli
1 Nanasa guahe si rau: Vegua, kilu pani Tamasa sari Nana tie soti? Lokari hokara! Arau ba na tie Izireli mo, sapu tuti gore mae guaqu koe Ebarahami, koasa butubutu te Benisimane.
2 Ele vizati tu Tamasa sari na tie Izireli, pude Nana tie soti pa pinodalaena hokara. Meke lopu etulu pani Sa sarini. Gilania mia mo gamu sapu gua zama nia sa Kinubekubere Hope, totoso varavara lani Ilaiza sari na tie Izireli koe Tamasa:
3 “Baṉara! Ele va matei rini sari Mua poropita, meke huari rini sari Mua hope, meke arau mo si koa hola. Meke kamahire si hiva va mate au tugo rini,” gua si asa.
4 Ba sa gua sa inolaṉa te Tamasa koa sa? “Ari ka zuapa tina tie si korapa koadia pa Qua kinopu, saripu lopu vahesia se Beolo, sa beku,” gua sa Tamasa.
5 Meke kekeṉoṉo gua tugo pa rane ṉinoroi; sapu ari ka visavisa mo sapu ta vizatadi koasa tataru variharupi te Tamasa si koa hola.
6 Ke be guana sa vinizavizata te Tamasa si koa gua koasa Nana tataru variharupi, si lopu pa tinavete tadi tie sia. Ura be koari na tinavete saripu taveti rina tie si ta vizata nia rini koe Tamasa, si lopu ta vizata koa gua koasa Nana tataru variharupi si arini.
7 Ke vea mo? Gua sapu hata sisigitia ri na tie Izireli si lopu vagia rini, ba ari ka visavisa mo ta vizatadi mo si vagia sa tinaharupu. Sari kasa doduru pule si tava nuli pude di lopu avosia sa tinioko te Tamasa.
8 Gua tugo sapu zama nia sa Kinubekubere Hope sapu guahe:
“Ele poni Tamasa si keke maqomaqo pupuhu,
ke sari mata dia si lopu boka dodogorae
meke sari taliṉa dia si lopu boka avavosae,
kamo pa rane ṉinoroi.”
9 Zama se Devita:
“Madi ta evaṉae guana sipata sari na dia inevaṉa,
madi hoqa na tava kilasa gedi si arini!
10 Madi tava tutaka sari na matadi,
pude di lopu dodogorae,
madi ene kokokopo mo ninae rane
guana tie pu mamati pa dia tinasuna,” gua.
11 Ke nanasa guahe si rau: Totoso hoqa sari na tie Ziu si hoqa ta inete ni sarini? Lokari hokara! Sipu hoqa pa sinea sarini, si mae koari na tie Zenitailo sa tinaharupu, pude va konoi sari na tie Ziu, gua.
12 Sa sinea tadi na tie Ziu si vata evaṉia sa minana lavata pa kasia popoa. Sa minana hie si vagia rina tie Zenitailo, sina lopu va hinokaria rina tie Ziu se Zisu, ke kote nomana hola tu sa minana, pana tava somana beto sari na tie Ziu pu ta vizatadi.
Sa Tinaharupu Tadi na Tie Zenitailo
13 Kamahire si zama atu si rau koa gamu kasa na tie Zenitailo: Koa gua sapu na apositolo si rau koa gamu na tie Zenitailo, si va arilaena hola ia rau sa qua tinavete,
14 pude va konoi gedi sari na turaṉaqu soti, pude boka ta harupu sari kaiqa arini.
15 Ura sipu kilui Tamasa sari na tie Ziu, si va evaṉae ni Nana baere Sa sari na tinoni pa kasia popoa. Ba pana tava kekere pule mae koe Tamasa sari na tie Ziu, si hokara kote guana tiqe toa puledi pa minate si arini.
16 Be sa sinika bereti kekenu si ta vala koe Tamasa, si te Tamasa beto mo sa doduruna, meke be sari na dadagana sa huda si ta vala koe Tamasa si tanisa tugo sari na lelaṉa.
17 Ba kaiqa lelaṉana sa huda olive si ta moku palae, meke ta soto hobe vala si gamu na tie Zenitailo, na guana lelaṉa olive pinomodi si gamu. Kamahire si tava ṉiṉira si gamu koari na tinoa maqomaqo tadi na tie Ziu.
18 Gua asa, ke mi lopu doṉo va gorei gamu saripu guana lelaṉa huda ta moku palaedi. Ura mi tumae nia si hie: Loke mia vinaritokae koari na dadaga, ba ari na dadaga mo si tokani gamu.
19 Ba kote zama si gamu, “Uve, ba sari na lelaṉa si ta moku palae pude veko poni gami lolomo si gami,” gua.
20 Hinokara sapu ta moku palae si arini sina loke dia vina hinokara, ba gamu si soto vasina, sina va hinokara. Ba mi lopu vahesi puleni gamu, ba mi koa va balau.
21 Be lopu ruriti Tamasa sari na tie Ziu, sari na lelaṉa hinokaradi sa huda olive, si vegua, kote ruriti gamu Tamasa be lopu va hinokara si gamu?
22 Mi balabala ia sa tataru meke sa vina kilasa te Tamasa: Va kilasi Sa si arini pu hoqa meke lopu va hinokara, ba tataru ni gamu Sa, be koa nono la si gamu koasa Nana tataru. Ba be lopu gua, si kote ta koku palae tugo koe Tamasa si gamu.
23 Meke be kekere meke va hinokara sari na tie Ziu, si kote tava soto pule dia mo vasina pu koa kenudi si arini, ura sa Tamasa mo tagoa sa ṉiniraṉira pude tava soto pule lani koasa huda.
24 Ura, be gamu si ta koku vagi koasa keke huda olive pinomona meke tava soto la koasa huda olive ta letena gua sapu lopu hoke ta tavete, si lopu tasuna koasa Tamasa pude vagi puleni sari tie Ziu, sari lelaṉa hinokaradi, meke va soto pule lani pa dia kokoana soti.
25 Kasa tasiqu, hiva va gilanani gamu rau sa hinokara tomena hie pude lopu vahesi puleni gamu. Sa vina karikari tadi na tie Izireli si lopu kaqu koa hola ninae rane, ba kaqu koa paki mo si asa, osolae kamoa sa totoso sapu kote somana beto mae sari na tie Zenitailo ta vizatadi koe Tamasa.
26 Ke pa totoso asa doduru tie Izireli si kote ta harupu. Gua puta tugo sapu zama nia sa Kinubekubere Hope:
“Sa Hinarupu si kote mae gua pa Zaione,
meke kote vagi pania sa kinaleana tadi na tie pa tutina e Zekopi.
27 Meke hie sa Qua vinariva egoi koa rini,
pana taleoso ni Rau sari doduru dia sinea.”
28 Koa gua sapu kilua rina tie Ziu sa Inavoso Leana, ke ta evaṉae kana te Tamasa si arini, pa vinaleana mia gamu na tie Zenitailo. Ba koa gua sapu ele vizati tu Tamasa sari tiatamadia, ke ta tataruedi koe Tamasa si arini.
29 Ura sa vinizata meke sari vinariponi te Tamasa si lopu hite boka ta hobe.
30 Kekeṉoṉo gua tugo gamu na tie Zenitailo, sapu lopu hite va tabea gamu sa Tamasa pa totoso ele hola. Ba kamahire si tagoa gamu sa Nana tataru variva taleosae, sina lopu va tabea ri na tie Ziu si Asa.
31 Ke kamahire si ari tie Ziu si lopu va tabe pude di boka vagia tugo sa tataru variva taleosae te Tamasa gugua gamu pu ele vagia sa tataru variva taleosae Tanisa.
32 Ura ele vata pusi betoi Tamasa sari doduru tie koasa dia vina karikari, pude mani vata dogoro nia Sa koari doduru sa Nana tataru variva taleosae.
Mani Tavahesi sa Tamasa
33 Sa Nana tataru variva taleosae ravutuna e Tamasa si lopu boka ta ṉana kamo, meke sa Nana ginilagilana lohina d, na tinumatumae si lohi hola. Loke tie boka tumae nia sa guguana sa Nana vinaripitui, meke sari Nana tinavete.
34 Gua sapu zama nia sa Kinubekubere Hope:
“Vea, esei ele tumae nia sa binalabala te Zihova?
Babe esei ele totoli nia si Asa?
35 Esei ele hite ponia keke tiṉitoṉa sa Tamasa
pude kaqu poni hobea Sa si asa?”
36 Ura Asa mo taveti meke kopu ni sari doduru vinapodaka, meke Tanisa tugo si arini.
Mani tavahesi sa Tamasa ninae rane ka rane! Emeni.