9
Tamasa meke sari Nana Tie Ta Vizatadi
1 Pa qua kineke koe Karisito si zama va hinokara atu si rau. Sa Maqomaqo Hope meke sari na qua binalabala, si va sosodea sapu lopu kokoha si rau.
2-3 Sipu balabala i rau sari na turaṉaqu, na qua butubutu soti, si nomana hola sa qua tinalotaṉa, meke lopu boka beto ta sigiti ni rau sarini pa korapa buloqu. Leana hola be ta levei mo si rau koe Tamasa, pude ta paqaha taloa koe Karisito, pude qu hobei sari na turaṉaqu soti.
4 Na tie ta vizatadi koe Tamasa si arini, meke ta pozae na tuna soti. Va dogoroni Sa koa rini sa Nana tinolava ṉedalana. Taveti Sa sari Nana vinariva egoi koa rini, meke ponini Sa koa rini sa Tinarae te Mosese, sa vinahesi pa Zelepade, meke sari na vina tatara.
5 Arini tugo si podo gore mae gua koe Ebarahami, Aisake, meke Zekopi, meke e Karisito si na tutidia tugo rini, sapu podo guana tie pa pepeso. Mani tavahesi sa Tamasa, na Baṉara tadi doduru tinoni ninae rane ka rane! Emeni.
6 Lopu zama si rau, sapu sekea Tamasa sa Nana vina tatara, sina na lopu ari doduru tie Izireli si na tie hinokara te Tamasa.
7 Meke lopu ari doduru pu tuti gore mae koe Ebarahami si na tuna Tamasa. Ura zama sa Tamasa koe Ebarahami, “Arini mo pu podo gore mae koe Aisake si ta pozae tutimu hinokara goi,” gua.
8 Gua asa ke saripu pododi pa hiniva tana tie, si lopu poza ni tuna sa Tamasa si arini, ba sari na koburu tu pu pododi pa Nana vina tatara, si ta pozae na tuna hinokara Ebarahami.
9 Sina guahe sa vina tatara te Tamasa koe Ebarahami, “Pa totoso guahe pa vuaheni maehe si kote pule mae si Rau, meke kote podoa Sera si keke tuna koreo,” gua.
10 Meke lopu asa mo, ba sari karua tuna koreo e Ribeka, si keke mo sa tamadia sapu e Aisake sa tamada.
11-12 Ba sipu lopu ele vizatia tu ri karua sapu gua leana babe kaleana, si ele zama la tu koe Ribeka sa Tamasa, “Kaqu nabulu nia sa koburu kenuna sapu mudina,” gua. Zama nia Sa sapu gua asa sipu lopu ele podo tu sari karua tamatasi. Vata evaṉia Tamasa sapu gua asa, pude vizatia si keke ri karua tamatasi, pude boka va gorevura ia Sa sa Nana hiniva. Gua asa ke sa ṉatina sa vinizata te Tamasa si koa gua tu pa Nana tinioko, ba lopu koa ke toṉa sapu ele tavetia rini.
13 Gua tugo sapu zama nia sa Kinubekubere Hope: “Tataru nia Rau se Zekopi ba etulia Rau se Isoa,” gua sa Tamasa.
14 Na sa si kaqu zama nia gita? Lopu toṉoto sa Tamasa, gua? Lokari hokara!
15 Ura zama sa Tamasa koe Mosese, “Arini pu hiva ni Rau si kaqu tataru ni, meke toka ni Rau,” gua.
16 Gua asa ke lalae Tamasa mo sapu ari sei si hiva tataru ni na toka ni Sa, ba lopu pa hiniva na tinavete tana tie.
17 Ura zama gua pule he sa Kinubekubere Hope koe Pero, sa baṉara pa Izipi: “Va baṉarigo Rau si goi, pude tavetavete nigo na vata dogoro nia sa Qua ṉiniraṉira, meke vata gilana nia sa Pozaqu koasa doduruna sa kasia popoa,” gua sa Tamasa.
18 Gua asa ke tataru ni meke toka ni Tamasa si arini pu hiva ni Sa, meke va luli ni dia hiniva Sa si arini pu hiva ni Sa pude koa hola pa vina karikari.
Sa Binugoro meke sa Tataru Variva Taleosae te Tamasa
19 Keke koa gamu si gina kote zama guahe: “Na vegua ke zutui tu Tamasa sari na tie koari na dia sinea? Ura esei kote boka korona nia sa hiniva te Tamasa?” gua.
20 Esei si agoi ke boka zama hemohemoa sa Tamasa? “Na sa si tavetia Goi?” gua. Agoi si kekeṉoṉo mo na raro patu ta tavetena pa lima tie, ke lopu leana pude zama la guahe si goi koe Tamasa pu tavetigo, “Na vegua ke tavete guni nau tu Goi sana si rau?” gua.
21 Sa tie mo pu tavetena sa raro patu, si kaqu tavetia sapu gua hiva nia sa koasa pepeso asa. Boka taveti sa si karua raro; keke si pude tavetavete nia pa totoso arilaena, meke keke pule si pude tavetavete nia koari na totoso hoborodi.
22 Kekeṉoṉo gua puta tugo asa si tavetia sa Tamasa. Hiva va dogoro nia Sa sa Nana binugoro meke sa Nana ṉiniraṉira, ba aqa va ṉoṉo ni Sa si arini pu bugoro ni Sa, saripu kote tava kilasa pa tina huara.
23 Meke hiva vata gilana nia tugo Sa sa Nana vina lavata nomana, sapu ele vata gilana valeana nia Sa koa gita, pu tataru ni, meke toka ni Sa; gita pu va namanama gita Sa pude somana pa Nana vina lavata.
24 Ura gita tugo sari na tie pu ele tioko gita sa Tamasa, lopu tale koari na tie Ziu mo, ba koari na tie Zenitailo tugo.
25 Guahe sapu zama nia Tamasa koasa buka Hozea:
“Kote poza ni ‘Qua tinoni’ Rau si arini
pu pozani lopu na Qua tinoni Rau.
Meke kote poza ni ‘Na butubutu ta tataruedi’ Rau si arini
pu lopu tataruni Rau.
26 Meke koasa vasina tugo pu ta tozi nia rini sapu,
‘Gamu si lopu na Qua tinoni,’ gua,
si vasina tugo si kaqu ta pozae ‘Na tuna sa Tamasa toana’ si arini,” gua.
27 Meke velavela vura nia Aisea sa guguadi rina tie Izireli sapu guahe: “Be vea lopu boka ta nae, guana onone pa masa si arini, ba ari ka visavisa mo si kote ta harupu,
28 ura kote lopu sana va kilasa hokari sa Baṉara sari na tie pa popoa pepeso,” gua si asa.
29 Asa sapu zama nia Aisea pukerane, “Be lopu veko hola i sa Baṉara Tadi na Qeto Minate si ka visavisa tie pa butubutu Izireli, si kote ele ta huara va inete gua tugo pa Sodomu meke pa Qomora si gita,” gua.
Izireli meke sa Inavoso Leana
30 Na sa si kaqu zama nia gita kamahire? Ari na tie Zenitailo saripu lopu hite hata ia sa tinoṉoto, si ele vagia rini sa tinoṉoto koe Tamasa pa dia rinaṉeraṉe.
31 Ba sari na tie Izireli pu podekia pude vagia sa tinoṉoto koasa linulina sa Tinarae te Mosese, si lopu boka tu.
32 Na vegua? Ura lopu hata ia rini pa dia rinaṉeraṉe, ba pa korapa dia tinavete leadi, saripu taveti rini pa kinopuna sa Tinarae te Mosese. Gua asa ke ta tubarae koasa “Patu” meke hoqa si arini.
33 Asa sapu zama nia sa Kinubekubere Hope, sapu guahe:
“Dotu, vekoa Rau pa Zaione si keke patu,
sapu kote va tubarae i sari na tie,
na patu sapu kote va hoqai si arini.
Ba arini pu raṉea si Asa
si lopu kote tava kurekure,” gua.