24
Harupia Devita sa Tinoa te Saula
1 Sipu ele beto rapata i Saula sari na tie Pilisitia, si pule mae si asa, meke tozi nia rini sapu korapa koa pa soloso se Devita tata pa Eqedi gua.
2 Ke turaṉi Saula sari ka ṉeta tina tie varipera bokabokadi hola pa Izireli, meke la hata ia rini se Devita meke sari nana tie, tata koari na toqere, pa kali gasa rimata koari na patu saripu ta pozae Sari na Patu Tadi na Qoti Pinomodi.
3 Mae kamo si asa koa ke bae tata koari kaiqa bara sipi pa kapa siraṉa, la nuquru vasina si asa pude turu vale nana gua. Namuna asa tugo mo sa bae sapu tomea Devita meke sari na nana tie pa hubi bukina.
4 Zama si arini koa sa, “Hie sa totoso tamugoi! Ele tozi nigo Zihova sapu kaqu vekoi Sa pa ṉiniraṉira tamugoi sari na mua kana meke kaqu evaṉia goi gua sapu leana koa goi pude tavetia.” Ṉame hitehite la se Devita meke la magu vagia sa kukuruna sa poko gele te Saula ba lopu hite va nonoga hokaria tu Saula.
5 Meke tiqe podalae balabala va tasuna ia Devita pa nana binalabala,
6 meke zama si asa koari nana tie, “Mani hukatau e Zihova si rau pude lopu tavete la nia keketoṉa koa sa qua baṉara, sapu ele vizatia Zihova pude na baṉara! Maqu lopu ṉoṉovalia rau si asa, sina baṉara ta vizatana koe Zihova si asa!”
7 Ke tozi va bakala valeania sa koari nana tie si pude lopu raza ia se Saula gua.
Gasa turu se Saula, meke taluarae pa bae, meke podalae ene taloa nana.
8 Meke vura luli mudi la se Devita meke titiokia sa si asa. “Qua baṉara lavata!” Taliri pule se Saula, meke todoṉo gore pa pepeso se Devita pa pinamaṉa,
9 meke zama, “Pude vegua ke va avosi tu goi sari na tinoni pu zama nia sapu arau si korapa podekia pude ṉovaligo si goi, gua?
10 Boka dogoria telemu sapu vaqurana hokara koasa bae si veko mae nigo Zihova pa ṉiniraṉira taqarau si goi. Kaiqa ri na qua tie si tozi nau pude va matego, gua, ba tataru nigo rau meke zama sapu lopu kaqu ṉovaligo rau si goi, sina agoi tugo sapu ele vizatigo e Zihova pude na baṉara.
11 Dotu, tamaqu, mu doṉo maea sa kukuruna sa mua poko sapu korapa taṉinia rau hie! Be ele va matego tu rau si goi, ba lopu gua meke sa mua poko mo si magu vagia rau. Sa ginugua hie si boka va gilana valeana nia koa goi, sapu loke qua binalabala si rau pude kukiti nigo babe pude va kaleanigo. Ba korapa hata zoṉazoṉa au goi si rau pude va mate au gua, ba lopu hite tavetia rau si keke sinea atu koa goi.
12 Mani vilasia Zihova sapu esei gita kara si sea! Mani va kilasigo Sa si goi koa gua sapu tavete mae nia goi koa rau, sina lopu kaqu ṉovaligo rau si goi.
13 Gilania mua goi sa zinama koana sapu, ‘Na tie kaleana mo tavetia sa kinaleana’ gua! Gua asa ke lopu kaqu ṉovaligo rau si goi.
14 Doṉo la tu koa sa sapu korapa hiva va matea sa baṉara Izireli! Doṉo la tu koa sa sapu korapa hadu lulia sa! Keke siki matena, babe keke gutu mo!
15 E Zihova si kaqu vari pituini gita, meke asa kote vizatia sapu esei gita kara si sea. Mani doṉo la koa sa ginugua hie si Asa. Mani kopu nau, meke harupau pa limamu goi.”
16 Sipu ele beto zama se Devita, si zama se Saula, “Agoi hinokara si isa, ta tuqu Devita?” meke podalae kabo mo si asa.
17 Meke zama si asa koe Devita, “Toṉoto si goi, arau mo si sea. Tavete valeana mae koa rau si goi, ba arau mo ele tavete atu nia koa goi sa sinea!
18 Pa rane hie si ele veko au tu e Zihova pa mua ṉiniraṉira si rau, ba ele vata dogoro nia goi sapu toleṉe gua leana hola koa rau si goi sina lopu va mate au goi.
19 Vegua hoke saputu vagia keke tie sa nana kana meke va taloa pulea madoduraena? Mani mana nigo Zihova si goi gua sapu ele tavete mae nia goi koa rau ṉinoroi he!
20 Gilana valeania rau sapu kaqu na baṉara pa Izireli si goi, meke sa binaṉara si kaqu koa kaurae pa mua tinolie.
21 Ba mu va tatara mae nia koa rau pa pozana e Zihova sapu lopu kaqu va matea goi sa qua butubutu, pude sa pozaqu meke sa pozana sa qua puku tatamana si lopu kaqu ta muliṉae hokara.”
22 Va tatara nia Devita sapu kaqu tavete gua asa si asa. Meke tiqe pule la pa nana vasileana se Saula, ba e Devita meke sari nana tie si pule la dia mo pa dia vasina tometomeana.