2
Sa Vineki
1 Arau si na havoro pinomona pa pezara pa Saroni,
na havoro lili koari na lolomo.
Sa Koreo
2 Guana havoro lili pa korapa hiqohiqo rakihi
sa qua babaere pa korapa puku vineki.
Sa Vineki
3 Guana huda apolo pa vari korapa hudahuda pa hiqohiqo
sa qua babaere pa vari korapadi rina koreo vaqura.
Leana hola koa rau si pude habotu aqoro pa maqomaqona sa,
meke liṉiliṉia sa lomosona sa vuana sa.
4 Turaṉa lani au sa koasa nana vetu lavata tana inevaṉa varihaba,
meke va tokoro nau pitipiti sa pa nana tataru.
5 Mu va ṉiṉira au koari na vua qurepi tava popadi,
mu va masiqara au koari na vua apolo,
ura na ele malohoro nia rau sa qua tataru koa goi.
6 Sa kali lima gedena si pa kauru batuqu,
meke sa lima mataona si ṉaza nau sa.
7 Gamu na tudia vineki ri pa Zerusalema, tepa gamu rau:
Mi zama tokotokoro pa pozadi rina kurukuru made nene, na qazele meke na dia pa soloso,
pude lopu okoro nia sa puta turaṉa koreo osolae kamo atu sa mia totoso varihaba.
Sa Kinera Vina Rua
Sa Vineki
8 Va avoso! Sa mamalaiṉina sa qua babaere!
Doṉo la! Isa, mae sana!
Horu kasopo ni sa sari na toa,
haqala karovi sa sari na toqere.
9 Qua babaere si haqala tuturei guana kurukuru qazele,
meke doṉo lea gua rina kurukuru dia kokoreo vaquradi.
Dotu! Turu nana sana pa mudina sa goba,
doṉo nuquru mae nana pa vuida,
hopiki nuquru nana pa lose.
10 Sa qua babaere si zama mae koa rau,
Sa Koreo
“Tekulu, agoi na qua babaere,
qua vineki leleamu, mae luli au.
11 Do! Sa totoso ibu si ele hola;
sari ruku ba ele noso.
12 Ele pelara sari havoro pa pepeso;
na totoso kerakera si ele kamo,
na vinari titioki tadi na kukuva
si avoso lea koari na hudahuda.
13 Sari huda piqi d si ele va sagana kenu vuadi;
meke sa humaṉa lea tanisa havoro vaeni si ele kamo.
Tekulu mae, qua babaere;
qua vineki leleamu, mae luli au!”
14 Sa qua kukuva si pa korapa qoqoro patupatu,
koari na tometomeana pa kali toqere.
Va dogoro nau sa isumatamu,
maqu avosia sa mamalaiṉimu.
Ura sa mamalaiṉimu si lomoso,
meke tolavaena sa isumatamu.
15 Tuqe vagi sari na pokese hitekedi,
pu mae ṉovali sari na inuma vaeni,
sari nada inuma vaeni pu korapa va vura havoro.
Sa Vineki
16 Sa qua babaere si taqarau meke arau si tanisa;
asa eke mo si henahena koari na havoro lili
17 osolae kamo sa rane,
meke murimuri taloa sa huporo.
Mu taliri, qua babaere,
mu haqala guana kurukuru made nene qazele,
babe na kurukuru ta pozae dia vaqurana
koari na batu toqere patupatu.