4
Sa Koreo
1 Kei! Nake tolava si agoi, qua babaere!
Na leleamu hola tugo!
Sari matamu si gua rina kukuva koasa mua poko paere isumata.
Sari kalumu si niu gua rina rovana qoti mumuhodi
pu gotolo gore koasa kali toqere pa Qileadi.
2 Sari livomu si keoro guana rovana sipi tiqe ta kotodi,
meke tiqe beto ta huve va via.
Sari kali vivi di si koa dia,
lopu keke sapu lopu koa.
3 Sari berumu si ziṉara va leleana;
sa ṉuzumu si doṉo lea pana zama si agoi.
Sari paparamu si ziṉara guana pomeqaraneti, pa mudi poko paere isumata.
4 Sa ruamu si doṉo lea gua tugo sa vetu hakehakei te Devita,
pakui nana sari tina na tina lave,
doduru si na lave tadi na varane.
5 Sari karua susumu si guana karua tuna qazele,
na karua vivi tanisa kurukuru ṉame qazele
sapu korapa henahena dia koari na havoro lili.
6 Sipu lopu ele kamo sa rane,
meke murimuri taloa sa huporo,
si maqu sage la i sari karua botu toqere pu humaṉa lea guana oto huda moa,
meke na vina uququ oto huda.
7 Na lua nigo kusui si agoi, qua babaere,
loke vasi kisakisamu si goi!
8 Loaqu, luli taloa koa rau koari na toqere Lebanoni,
mae, luli taloa koa rau pa Lebanoni.
Gore mae gua pa batu toqere Amana,
panaulu pa Seni, sapu sa toqere Hemoni,
koari na bae tadi na laione
meke na toqetoqere tadi na leopadi.
9 Ele hikoa goi sa buloqu, agoi na qua babaere, na loaqu;
ele hikoa goi sa buloqu
koasa vasi kevena sa matamu,
meke sa patu ṉedala pa mua pakupaku.
10 Agoi na loaqu na qua babaere, variva qetu hola sa mua tataru;
sa mua tataru si liṉiliṉi lea hola nia sa vaeni,
sa lumu humaṉa lea koa goi si hola ni sari doduru pule!
11 Sari berumu, loaqu, si lomoso guana namu zipale;
sa meamu si guana koa ia meleke na kolo zipale.
Sari mua poko si humaṉa lea guana huda sida pa Lebanoni.
12 Loaqu, na qua babaere, agoi si guana inuma ta bara tukuna;
na inuma tomena, meke na bukaha ta hukatana.
13 Sari mua linetelete si na inuma pomeqaraneti
siṉia na vuvua lomosodi,
meke na havoro naqarita meke na oela nadi;
14 na humaṉa lea tadi na havoro saparoni, na oela kalamusu, meke na huda sinamoni.
Na oto huda moa si toqolo vasina meke na aloesi
meke doduru lumu humaṉa lea pule.
15 Agoi si na bukaha sapu va bobosia sa inuma,
meke na tototolo kolo lomoso,
sapu zoloro maena pa toqere Lebanoni.
Sa Vineki
16 Vaṉunu, agoi givusu togarauru,
mu mae, agoi givusu pa kali gevasa!
Mi givusu mae ia sa qua inuma,
pude paleke vura nia sa humaṉa lea tanisa.
Va malumu mae ia sa qua babaere koasa nana inuma,
mani va liṉiliṉi i sari na vuvua lomosodi.