4
Kwian israelita chugagwalla ulita Pedro kaire Juan
oña gbe tkale skage Jesu gerua gdale
Pedro, Juan kle gerule kwian ole Jesu giti gire kwian gerunga Chube ole daba alin mneite kaire kwian u gerungwa Chube ole mananga ulita chugagwalla kaire kwian saduceo mneite, kwian e ulita chku Pedrodi Juandi. Pedro, Juan kledu daba tke tangle Jesu giti, kledu gerule kwian ole Jesu chkuni gwade giti, ene chkedale uñale kwiange kwian jaba ulita be chkeni gwade Jesu jaba chkuni gwade kare. E gdale kwian chugagwalla e ulita skochiu Pedrodi Juandi, malen kwian e ulita Pedro kaire Juan gau tkale skage. Nga jere gire kwian e ulita me ñadu age Pedro ole Juan ole ama takalin kare malen ama Pedro kaire Juan jigu skage nagbietege dale. Agwa kwian tanre Jesu gerua keruchugu Jesu gerua gau ulia Pedro giti Juan giti, kwian Jesu gerua ganga ulita chku ngle ngle, kwian onbre alin jo teanba ulita chku cinco mil.
Nga chku ju gbietege gire kwian israelita chugagwalla ulita mo litu ole una Jerusalénge, Anás kaire mo litu ule, ama kwian gerunga Chube ole daba alin chugagwalla ma kweri, kaire Caifás kaire Juan kaire Alejandro ama ulita kwian gerunga Chube ole daba alin chugagwalla ma kweri bitalla, ama ulita kledu eni kaire. Kwian israelita chugagwalla e ulita Pedro kaire Juan kadu chie ama kle ngwadi, Pedro, Juan dbajo chke kwian chugagwalla ulita kle ngwadi. Kwian e ulita gwa giti geru kadre Pedroge Juange:
—¿Chema ba gbu kwian seragda kwebanga dodade? ¿Chema kiralla giti ba kwian e dodadu?
8-9 Pedro gerudu Chube Oña kirallaske kwian israelita chugagwalla kweri e ulita ole:
—Ba ulita kwian israelita chugagwalla, ba geru kade chage cha kwian dodadu giti ba takalin chke uñale bage cha ama dodadu mine gire ama ñadu chage. 10-11 Cha be gerule ba ulita gwa giti ene chke uñale trate ba ulitage kaire kwian israelita na ulitage onbre gdaite ai kle ule cha ole ba ulita gwa giti ama me ñadu chage, nege ama ñage chage, Jesucristo una Nazaremu kiralla giti ama ñage chage no nege. Jesucristo amaña ba ulita ama guda, Chube Jesucristo gbuni gwadeni. Chube gerua degaba unsuialin gerule Jesu be boi ene giti, chada e gerule:
“Kwian u dodanga ke gbu gerere, ke gbaite ama mliunga, ama gerudu ke e me no dale, agwa ke e ama mliunga, ke e ma no ke na ulitage.”
Chube gerua degaba unsuialin gerule ene Jesu giti, boidu ene chada e gerule kare, Jesu no Jesu kweri agwa ba ulita me ama gau dage no kweri, ba ama gau kwian ngwale kare, ba ama guda kruge, agwa Chube ama jaba gbuni gwadeni. 12 Chube Jesu kagu kwian ulita alin, Jesu giti alin allabi kwian ñage tien gitiru ji chugege age me no gdale, ni kwian na gdaite nga dba ai giti ñage kwian jwen siere ji chugege age me no gdale kwian gbe no trate Chube gwa giti —Pedro gerudu ene kwian israelita chugagwalla ulita ole.
13 Kwian israelita chugagwalla ulita gwagedu Pedrodi Juandi gerule no Jesu giti me ta kennga ole ama ngeru gerule trate ama ulita kle mo litaba gwa giti. Kwian e ulita chegu tañachuge tanre Pedrodi Juandi, ama boke me geru jwanba mineade ama ñage gerule no trate kwian geru jwanba tanre kare. E giti chku uñale kwian israelita chugagwalla ulitage Pedro kaire Juan geru jwannga Jesuge chagedu diali ule Jesu ole Jesu kledu nga dba ai giti gire. 14 Kwian seragda kwebanga Pedro nu dodaba Jesu kiralla giti kledu eni ule Pedro ole Juan ole, kwian israelita chugagwalla ulita gwagedu onbre edi ulia ama jo chkeni noni, malen kwian israelita chugagwalla me ñadu gerule Pedro dollale Juan dollale. 15 Kwian israelita chugagwalla ulita mo ta gbu Pedro, Juan kage siere sugeti ama ulita kle mo litaba ngwadige manade goga. Gire ama ulita chegu geru trage modi mo ten Pedrodi Juandi, 16 ama ulita geru tragu modi:
—¿Che be age mine Pedro ole Juan ole? Uñale kwian ulitage una Jerusalénge ama kwian dodadu Jesu kiralla giti. Che me ñage gerule kwian una Jerusalénmu ole Pedro, Juan me kwian seragda kwebanga dodadu ulia, che me ñage gerule ene kwian ole. 17 Agwa che me takalin Pedro kwian dodadu giti chke nate uñale kwian na darege, kwian ulitage che me takalin kwian enege geru chke uñale, ma no che ka boi ama ole ama kwajige. Ale ama oña tke skage, ene chui aige gwangerugu ama be kwachie gerule dare daba na ole Jesu giti —ama ulita mo teun ene modi.
18 Gire kwian israelita chugagwalla ulita Pedro, Juan kadu naskuni ama ulita kledu mo litaba ngwadi gire ka bo Pedro ole Juan ole:
—Cha gerule ba ole, cha ulita me takalin ba gerule kwian ole Jesu giti ni kwian tke tangle dare Jesu gerua giti. Ba chage gerule dare kwian ole Jesu giti, cha be ba tke skage Jesu gerua kete kwiange giti gdale.
19 Agwa Pedro, Juan gerudu kwian israelita chugagwalla ole:
—Ba ulita tañachugadale no no mine ma no Chube gwa giti, ¿ma no cha ba ulita gadale dage age ba ulita takalin kare o ma no cha Chube gadale dage age Chube takalin kare? 20 Cha me ñage chege kamne me gerule sidri Jesu agedu no giti, cha me ñage age ene. Mo gwagwa giti cha gwagedu amadi age no ulita kaire mo ologe cha ama keruchugu gerule no ulita, e giti cha me ñage chege kamne, cha geru e ulita tragadale kwian na ole.
21 Pedro kaire Juan gerudu kwian israelita chugagwalla ulita ole ene gire chugagwalla ulita skochiu Pedrodi Juandi, gerudu:
—Cha be ba tke skage.
Kwian israelita chugagwalla ulita gerudu ene agwa ama me ñadu Pedro, Juan tke skage, me chku boale age mine Pedro ole ni Juan ole, kwian israelita chugagwalla ulita Pedro, Juan chugu ngwadi gbale. Kwian na ulita kledu gerule no Chube agedu giti Pedro giti Juan giti, malen kwian israelita chugagwalla me ñadu Pedro, Juan tke skage kwian israelita chugagwalla tadukalin kare age. 22 Pedro, Juan kwian seragda kwebanga dodadu Jesucristo kiralla giti, kwian ege chura ma ngle cuarentage chkeba, malen kwian tanre gerudu no Chube giti noare Chube onbre e dodadu.
Kwian Jesu gerua ganga ulita kira kade Chubege
chage gwangerugu Chube kiralla giti gerule
kwian na ole Jesu giti
23 Kwian israelita chugagwalla ulita Pedro, Juan chugu ngwadi gbale, gire Pedro, Juan jo mo lite ule daba na Jesu gerua ganga ole, Pedro, Juan geru tragu daba e ulita ole kwian israelita chugagwalla gerudu giti ulita ama ka bo Pedro ole Juan ole me gerule Jesu giti dare kwian na ole. 24 Daba Jesu gerua ganga ulita Pedro, Juan keruchugu gerule kwian israelita chugagwalla ulita agedu mine ama ole giti gire kwian Jesu gerua ganga ulita gerudu ule modi Chube ole ene: “Cha Chugagwalla Chube, ba nga dodadu ulita nga ngaña dodadu nga dba dodadu ba cha ulita dodadu ba ble jigu kaire lle ulita na kle nga ulitage ba dodadu. 25 David lle boanga ba alin unsuialin Chube, ama cha ulita enusulian, ba mo Oña gbu David tale. Ba Oña kirallaske cha enusulian David gerudu ba Kirolla be boi giti ulita nga dba ai giti, David gerudu:
‘¿Mineade kwian nga ulitamu skochie Chubedi?
¿Mineade kwian ta agekalin mo chugale ngwale Chube dollale?
26 Kwian chugagwalla una kaire kairege nga dba ai giti mo lite ule age me no Chube dollale kaire age Cristo dollale, Chube Cristo gau kagadale nga dba ai giti.’
Chube, ba David ta gbu chada dege ene unsuialin gire kle boi ene ulia nege tangle.
27 Cha gerule ba ole Chube, Herodes ule Poncio-Pilato ole mo litu una ai Jerusalénge kwian israelita ole kaire kwian me israelita ole. Jesu lle boanga no trate ba alin Chube, agwa kwian e ulita mo litu Jesu dollale agedu me no Jesu ole. Ba Jesu gau gbu kwian Chugagwalla kweri, Jesu amaña Cristo, ba ama kagu nga dba ai giti. 28 Unsuialin ba mo ta gbu age no kwian ulita alin Jesu giti, unsuialin mo kiralla giti ba mo ta gbu Jesu kage nga dba ai giti boi tanre daga ngwale kwian ama dollale kote. Kwian agedu ulita Jesu dollale ba mo ta gbu unsuialin be boi kare ulita, bage uñadu kwian be age Jesu ole kwian tadukalin kare age. 29 Cha Chugagwalla Chube, cha gerule ba ole nege, ba cha keruchuge, nege kwian kle chage age dare cha ulita Jesu gerua dbanga oña boi Jesu gerua dbe giti gdale. Cha ulita Jesu gerua dbanga kwiange cha kle mo chudaboi kade bage, ba cha ulita chudaboi, ba cha kira gbe geru Jesu giti kete kwiange ba kiralla giti ene cha me ta kennga geru kete kwian ulitage. 30 Kaire ba kira kete chage kwian oga dodade ba kiralla giti, ba cha ulita gbe age no kwianske lle daga ngwale tanre no dodade ba Kirolla no trate Jesu kiralla giti kwian ngle gwa giti. Ene nobi Chube.” 31 Kwian Jesu gerua ganga gerudubi ene Chube ole, gire nga ama ulita kle mo litaba ngwadi nga e jwliendu ulita gire kwian ulita kle mo litaba Chube Oña kiralla gau, ama ulita ta chegu kiraske gire ama me mo ta gbu kennga Chube gerua Jesu giti dbe kwian ulitage.
Kwian Jesu gerua ganga ulita daba ulita chudaboi
bitalla ulla gbaitre alin kare
32 Kwian Jesu gerua ganga ulia ngle ama ulita tañachugu salengwli kaire sugedu amage ama ulita kwian gdaitre alin kare Jesu gerua giti. Ni ama gdaite mo ta gbu kibale, agwa ama ulita tañachugu lle amanu kaire daba nanu, lle ulita ama ulita alin salengwli. 33 Kwian Jesu gerua ketanga ulita chagedu mo ta gbe dare gerule ulita kira giti kwian ole Jesu chkuni gwade giti. Kwian bai geru Jesu giti gau ulia Chube agedu no tanre ama ulita alin. 34-35 Kwian Jesu gerua ganga ulitaske ama ulita mo ta gbu mo chudaboi, ene ama ulita lle molen toigda, bai dbi molen u molen gweale chbadu igi ketu kwian Jesu gerua ketangage girabatadale daba ulita Jesu gerua gaba ole bai me lle molen, girabatu mo kaire kaire. 36 Leví oindalla gdaite kada José agedu no daba alin bai me lle molen lle ketu kwian Jesu gerua ketangage girabate daba e ole. José medunga ngadrega bleske kada Chiprege, kwian Jesu gerua ketanga ulita José e ka na gbu ama ka jun Bernabé, ka e gerule “ama daba ta gbanga suga no”. Bernabé diali daba me lle molen chudabo, 37 Bernabé dbi molen ama dbi e chbadu, ama dbi igia ketu kwian Jesu gerua ketangage daba na me lle molen chudaboagda.