13
Jesu kwian geru jwannga amage ulita sera glige
1-3 Chui ngeru Pascua ollade chuiage, chui ege ngabi Jesu kle blire ule kwian geru jwannga amage gdataboko giti gdaboke ole, kwian geru jwannga e gdaite kada Judas-Iscariote, ama Simón-Iscariote kirolla, che dolla Satanás nu Judas-Iscariote ta gbaba biale Jesu kete kwian Jesu dollalege gwadaleda. Uñadu Jesuge ama Ñenua Chube lle ulita kwian ulita gbu ama kote, ama chiu Chube ngwadi be jogeni naskuni Chube ngwadi. Jesuge uñadu Jesu mi chege dare nga dba ai giti kwianske chuia chku, ama be jogeni nga ngaña giti toi ama Ñenua ole, Jesu chagedu nga dba ai giti kwian amanu ole Jesu diali ta du no no ama ulita ole, Jesu mi kle dare kwian amanu ole nga dba ai giti, agwa Jesu talla be chege no no kwian ene ulita ole diali chui tangle.
Jesu kledu blingwage ama chku gdate, Jesu mo ñometralla gitiru junnga modi chegu ñometra mo ngnaru alinske, gire toalla gau bliu mo bonga tangle. Ama chi tku lle gwealege gbu kwian geru jwannga sera ngena sera gligadale gire ama kwian geru jwannga gdaite gdaite sera gligu sera unbatu toalla bliabale mo bonga tangle giti. Ama jo chke Simón-Pedrodi Simón-Pedro sera gligadale gire Simón-Pedro gerudu ama ole:
—Ba cha Chugagwalla, ¿ba be cha sera glige? Cha alin me no ba cha sera glige.
Jesu gerudu Simón-Pedro ole:
—Cha kle age ba alin, nege ulita me suge bage, bigwa be suge bage mineade cha ba sera gligu, nege ba mo chuge ngwadi cháge mo sera glige.
Pedro gerudu Jesu ole:
—Cha mi mo sera chuge ngwadi gligale bage.
Jesu gerudu:
—Ba mi mo sera chuge ngwadi gligale chage ba me chanu ba be chege sugekare chage.
Simón-Pedro gerudu:
—Cha Chugagwalla, ba me cha sera alin glige allabi, cha takalin ba cha ko glige kaire cha chuga glige.
10 Simón-Pedro gerudu ene Jesu ole gire Jesu gerudu Simón-Pedro ole:
—Kwian bai obeba sugeti me mo gligadale blike nabitaite ulita, agwa sera alin gligale, jegwale ulita kle trate. Ba ulita ta kle trate biale salengwli kwian obeba sugeti kare, agwa ba gdaite ta me kle trate.
11 Uñadu Jesuge chema be ama kete gwadaleda, malen ama gerudu: “Ba gdaite ta me kle trate.”
12 Jesu kwian geru jwannga ulita sera gligu ulita gire Jesu mo ñometralla gitiru gbuni naskuni modi, Jesu toiduni dba blingwage, Jesu gerudu:
—¿Suge ba ulitage mineade cha ba sera gligu? 13 Ba ulita kle cha kade ba tkanga tangle geruge, kaire ba kle cha kade ba chugagwalla, e ulia, cha ba chugagwalla cha ba tkanga tangle ba kle cha kade kare. 14 Cha ba tkanga tangle geruge, cha ba chugagwalla, cha ba ulita sera gligu agali, ene kaire ba ulita daba sera gligadale, ba daba na sera gligadale daba na ba sera gligadale, ene ulita. Ba ulita me ñage mo gbe ma kweri daba nage, ba ulita mo ta gbadale diali mo chudaboi ongoru ongoru. 15 Cha ba chugagwalla, cha mo ta gbu ba ulita chudaboi cha ba ulita sera gligu, ba ulita mo ta gbadale no ene kaire, ba ulita agedale cha agedu kare ba ole. 16 Cha gerule ulia ulia ba ulita ole, kwian lle boanga me ma kweri mo chugagwallage, kwian geru dbanga me ma kweri mo kagangage. 17 Uñale ba ulitage cha ba chugagwalla agedu mine ba gwa giti, ba agedale ene kaire, ba age ene cha agedu kare nga be suga no no badi diali.
Jesu gerule Judas-Iscariote be ama kete gwaleda
18 Jesu gerudu dare kwian geru jwannga amage ulita ole:
—Cha me kle gerule ba ulita be mo ta gbe age no cha agedu kare, me ene, uñale chage ba ulita mi age no cha agedu kare. Cha ba ulita gau chage cha ole, cha ba ulita ta uñe trate, uñale chage ba gdaite kle mo ta dbe cha dollale, be boi Chube gerua degaba unsuialin gerule kare cha giti, chada e gerule:
“Cha skatemanalla gdaite blire ule cha ole, amaña mo blite cha dollale.”
19 Cha kle geru ai kete ba ulitage ngeru be boige, ene be boi cha ole chuia be chke gire be suge bage kle boi ulita cha gerudu kare, e giti ba ulita be cha gai ulia ma no dare cha Cristo cha Chube Kirolla. 20 Cha kwian chanu kage cha gerua dbe kwian nage, kwian na bai kwian chanu gai ngwange no, kwian ene me kle kwian chanu alin allabi gai ngwange no, kaire ama kle cha gai ngwange no agali kare kwian chanu giti. Kwian bai cha gai ngwange no kwian ene me kle cha alin allabi gai ngwange no, kaire ama kle cha kaganga gai ngwange no agali kare cha giti.
21 Jesu gerudu ene ulita gire Jesu ta chegu ta olire tanre Judas-Iscariote giti, Jesu gerudu trate geru jwannga amage gdataboko giti gdaboke ole:
—Cha gerule ulia ulia ba ulita ole, ba ulita kle aini ule cha ole gdaite be cha kete kwian cha dollalege gwaleda.
22 Jesu gerudu ene gire kwian geru jwannga gdataboko giti gdaboke ulita chegu gwage modige, ulita gerudu modige:
—¿Chema be age me no ene Jesu ole?
Me uñadu ama ulitage chema giti Jesu kle gerule. 23 Kwian geru jwannga Jesuge ulita kle toiba dba blingwage blire ule Jesu ole, kwian geru jwannga gdaite kle Jesu ngena blire geru trage Jesu ole, Jesu no no ama ole, 24 kwian geru jwannga ege Simón-Pedro ko ñachugu, Simón-Pedro takalin geru jwannga gdaite e geru kade Jesuge chema giti Jesu kle gerule be age Jesu gerudu kare. 25 Gire kwian geru jwannga kle Jesu ngena jo ma Jesudige geru kadadale Jesuge, ama gerudu Jesu ole:
—Cha Chugagwalla, ba gerule cha ole, ¿chema be age ba ole ba kle gerule kare?
26 Jesu jaindunga:
—Cha be pan bita gbe date bligda chiaske, kwian gdaite baige cha be pan bita e kete ama be gai ngwange be gute, kwian e be cha kete gwaleda.
Jesu gerudu ene gire ama pan bita gbu date bligda chiaske ketu Judas-Iscariotege, ama Simón-Iscariote kirolla. 27 Judas-Iscariote pan bita gau ngwange pan bita gutu gire blike dolla Satanás talla chku Judas-Iscariote tale age ulita Satanás takalin kare. Jesu gerudu Judas-Iscariote ole:
—Ba mo ta gbaba age cha ole, agede ene blike.
28 Jesu gerudu ene Judas-Iscariote ole gire kwian geru jwannga na ulita kledu blingwage amage me sugedu mineade Jesu kle gerule ene Judas-Iscariote ole. 29 Uñadu kwian geru jwannga ulitage Judas-Iscariote ama igi gdea mananga, malen ama gweale tañachugu Jesu kle gerule Judas-Iscariote ole lle gweale gige chui ollade chuia alin gutadale, na tañachugu Jesu kle gerule Judas-Iscariote ole lle gweale gige ketadale kwian bai me igi molenge. 30 Judas-Iscariote pan bita gau ngwange pan bita gutu ene, gire blike Judas-Iscariote jo siere Jesuge, ngabi ngajrege ama jo siere Jesuge.
Jesu gerule Pedro be gerule ama me Jesu uñe
31-32 Judas-Iscariote jo siere Jesuge ene, gire Jesu gerudu kwian geru jwannga na ulita cheguda eni ole:
—Cha Chube Kirolla chiu nga dba ai giti kwian kare, nege chui chku gire kwian be gwage cha kiralladi, kaire cha giti kwian be gwage Chube kiralladi be gerule no Chube giti, Chube kira be kle cha ole, ene kwian be gwage chadi be gerule no cha giti kaire, be boi ene sugeti. 33 Ba ulita kwian chanu, cha no no ba ole, nege cha mi chege dare ba ole nga dba ai giti, cha gerudu kwian israelita ole kare cha be joge ngwadi kwian israelita me ñage joge, nege kaire cha gerule ba ulita ole ba be cha jinade nate, bage cha mi skwen, cha be joge ngwadi ba me ñage joge nege. 34 Cha be geru ai jagere kete ba ulitage, ba geru ai gbe gdadi: Ba ulita mo ta dbadale no modi cha ta dbe no ba ulita ole kare, ulia ba mo ta dbadale ulita no modi daba ole. 35 Ba mo ta dbe no ene ulita modi, kwian na gwage badi age no be chke uñale nate ulia ba kwian chanu ba kwian geru jwannga chage.
36 Jesu gerudu ene ulita kwian geru jwannga amage ulita ole gire Simón-Pedro geru kadu Jesuge:
—Cha Chugagwalla, ba kle gerule ba be joge ngwadi cha ulita me ñage joge, ¿ba be joge baini?
Jesu jaindunga Pedro kalen:
—Cha be joge ngwadi, nege nege ba mi ñage joge cha ole, chui na ba be ñage joge cha be joge ngwadi.
37 Pedro gerudu dare Jesu ole:
—Cha Chugagwalla, ¿mineade ba gerule cha ole cha me ñage joge ba ole nege? Cha kle biale joge ule ba ole baini kaire ba be joge ngwadi, kaire cha tale cha kle mo ta gbaba biale jogeda ba giti.
38 Jesu gerudu Pedro ole:
—¿Ba tañachuge ba ñage jogeda cha giti ulia ba kle gerule kare? Uñale chage trate ba mi ñage age ene ba kle gerule kare, nege ngakamalin bdugu antalan bebi ngwane gire ba agali be gerule bitamai kwian na ole ba me cha uñe.