16
Jesu jaba chkeni gwade
1-2 Undege chuia jo tangle gire nagbietege chui domingoge ngabebitabi María-Magdalena kaire María na Santiago chebia kaire Salomé, muinga e gdamai jo lle ñachke no tanre dbe tkadale Jesu jaba giti, muinga nu lle ñachke e gigaba sábadoge ngajrege. Chui chku ngwale dbi giti gire muinga e ulita kledu chage Jesu jaba ogle ngwadi ngnagu,
3 ama ulita kledu gerule modi jonkare:
—¿Che be age mine? ¿Chema be kechuga kweri kle keuga ugakallage Jesu jaba ogle ngwadi jwennga che alin? Kechuga kweriare che me kira molen kechuga e jwen siere keuga ugakallage.
4 Ama kledu gerule ene jonkare, ama jo chke Jesu jaba ogle ngwadi, ama gwagedu kechuga kweridi klodegaba siere keuga ugakallage, keuga ugakalla chegeba ka ngwale.
5 Muinga e ulita gdamainate jo chiga keugage gire ama gwagedu mo ko taingwli giti kirogwa bialedi, kirogwa biale e mo ngama tkaba ñometra jutreske ama kledu toiba dba Jesu jaba ogle ngwadi. Muinga e ulita kwachiu tanre kirogwa bialedi.
6 Kirogwa biale gerudu muinga ole:
—Ba me kwachie, uñale chage ba kle Jesu una Nazaremu jinade nate. Ama me kle aini dale. Ulia ama gbere kruge, ama jokeda, agwa ama chkuni gwadeni. ¡Gwagede aini ama jaba ogle ngwadi, ama me kle aini dale, nege ama kle gwadeni!
7 Joga blike kwian geru jwannga Jesuge gdataboko giti gdaite kle ngwadi, ba geru ketadale ama ulitage Jesu giti, ba geru ai kete Pedroge kaire kwian geru jwannga na ulitage: “Joga nga Galileage, Jesu be joge nga ege ba ulita ngeru, ne ngwadige ba be ten ama ngwange ama gerudu kare ba ole ama bebi jogekeda gire.” Ba gerudale ene Pedro ole kaire kwian geru jwannga na ulita ole. ¡Joga, joga!
8 Kirogwa biale gerudu ene muinga gdamai ole gire muinga ulita jo kige keugage siere, ama ulita kledu gdajirenga tanre chru ole. Jonkare muinga me geru ketu kwiange dale, ama kwachiu tanre malen ama me geru e gbu chke uñale kwian nage Jesu giti.
Jesu meñe María-Magdalenage gwadeni
9 Jesu chkuni gwade chui domingoge ngabebitabi gire Jesu medu gwangea María-Magdalenage, María ege Jesu nu dolla gdaguke kagaba siere.
10 Jesu medu muinga ege gire muinga jo, geru ketu kwian geru jwannga ulitage Jesu chkuni gwade giti, kwian e ulita kledu olire tanre Jesu nate.
11 María-Magdalena jo chke kwian geru jwannga kledu ngwadi, ama gerudu:
—¡Jesu chkuni gwade! Ulia cha gwagedu amadi gwadeni. ¡Jesu kle gwadeni!
Kwian geru jwannga Jesuge ulita María-Magdalena keruchugu gerule ene Jesu giti gire ama ulita María-Magdalena kerua gau ngwale, tañachugu María-Magdalena kle sole ama ulita ole.
Jesu meñe gwadeni kwian geru jwannga
gdabokege jonkare
12 Kwian geru jwannga Jesuge gdaboke kledu chage ngaske ngnagu, gire jonke Jesu medu amage. Kwian geru jwannga e gdabonate me chku Jesu uñe nate blikare,
13 agwa bigwa chku uñale trate ama bokege ulia Jesu amaña kledu chage ama ole jonkare gire ama joni kwian geru jwannga na kledu ngwadi, ama geru ketu dabage ulita Jesu giti, ama gerudu:
—¡Jesu chkuni gwade ulia! Cha gwagedu amadi sbaliga jonkare.
Kwian geru jwannga gdaboke gerudu ene Jesu giti geru jwannga na ulita ole, gire kaire kwian geru jwannga na ulita ama boke kerua gau ngwale ni gdaite ama kerua Jesu chkuni gwade giti gau ulia.
Jesu meñe kwian geru jwannga ulita
gdataboko giti gdaitege gwadeni
14 Bigwa Jesu medu kwian geru jwannga ulita gdataboko giti gdaitege gwadeni, ama ulita kledu mo litaba blire gire Jesu chku, Jesu gerudu ama ulita ole:
—Cha ta olire tanre ba giti. Kwian ulita bai kaire gwagedu chadi gwadeni ama geru kete bage cha giti, ni ba ama kerua gau ulia cha chkuni gwade giti, ba me kle mo ta gbe ulia cha ole.
15 Jesu ka bo ene kwian geru jwannga amage gdataboko giti gdaite ole gire Jesu gerudu dare ama ole:
—Ba jogedale nga ulitage Chube gerua no cha giti kete kwian na ulitage.
16 Kwian bai kaire ulita mo ta gbe cha gerua gai ulia, ba kwian e ñeadale chiske gai ngaña chigage. Kwian cha gerua gai ulia giti Chube be kwian e jwen siere ji chugege age me no gdale gire kwian e be toi diali chui tangle ule Chube ole nga ngaña giti. Agwa kwian bai kaire me cha gerua gai ulia ba geru kete amage kare, kwian ene Chube be ama kage ji chuge daga ngwale ngwadi toi diali sugekare Chubege.
17 Kwian bai kaire ulita mo ta gbe cha gerua gai ulia, amage cha be kira kete lle daga ngwale no tanre dodade, cha kiralla giti kwian cha gerua ganga be ñage age ulita ai kare: Kwian cha gerua ganga be ñage dolla kage siere kwian jwligebangage, kaire ama be ñage gerule kwira nale ni ama geru jwanba giti,
18 kaire ama be ñage jorisi jwen kote ni jorisi be age me no ama ole, kaire ama be ñage veneno jai gire ni ama be oga venenodi ni ama be jogeda kote, kaire ama be ñage ko gbe kwian oga giti gerule Chube ole gire kwian oga be joge chkeni noni trate. Kwian cha gerua ganga be ñage age ene ulita cha kiralla giti —Jesu gerudu ene kwian geru jwannga amage ulita ole.
19 Chugagwalla Jesu gerudu ene ulita kwian geru jwannga ulita ole ama ulita ta gbagda, Jesu gerudu ene ulita gire Jesu dule nga ngaña giti Chube kle ngwadi, Jesu toidu dba Chube ko taingwli giti kwian Chugagwalla kweri.
20 Jesu joni nga ngaña giti ene, gire kwian geru jwannga Jesuge ulita jo nga ulitage Jesu ama kagu kare geru no Jesu giti kete kwian na ulitage. Jesu ama chudabo, Jesu mo kira ketu ama ulitage Jesu kiralla giti ama ulita lle daga ngwale no tanre dodadu kwian tanre na gwa giti, e giti kwian nage sugedu Jesu kle ama chudaboi age no kwianske.