11
Kwian israelita me geru mo jwannga siere Jesucristo giti gai ulia, malen geru e joge chke nga na
ulitage kwian me israelitaske
Kwian israelita mo ta gbu age me no Chube dollale, ¿e giti Chube kwian israelita ulita chugu ngwadi sugekare? Me ene dale. Cha kwian israelita, cha kwian kada Benjamín mnealla, cha kwian israelita enusulian unsuialin Abraham oindalla, cha ene Chube me cha chugu ngwadi sugekare. Chube kwian israelita chudalla gau gwangea mo alin, Chube no, Chube me ta jogenga kwian amanu chudallage, Chube me kwian ene amanu chudalla chuge ngwadi sugekare. Uñale ba ulitage boidu mine unsuialin Elías suiale, e suiale kwian israelita agedu me no tanre Chube dollale, Elías gerudu Chube ole kwian e giti kwian e gbale jiske Chubege, Chube gerua degaba unsuialin gerule Elías gerudu Chube ole kwian israelita giti, chada e gerule:
“Cha Chugagwalla, cha bitalla israelita ulita agedu tanre me no, ama lle bda gugangwa ba alin ulita skiundba, ama kwian ba gerua ketanga guda ulita, cha alin allabi chegu gwade, kaire kwian kle chage cha nate cha gwaleda.”
Elías gerudu ene Chube ole kwian israelita ulita giti gire Chube jaindunga Elías kalen:
“Elías, ba me kle tañachuge trate, cha takalin chke uñale bage ba me kle gballa, cha ba bitalla israelita kwian siete mil manadu no mo alin, kwian e ulita kle mo ta dbe no cha ole ba no cha ole kare, kwian e ulita me nu Baal gaba mo chubeale ni ama jongnagwa skutaba dba amadi gale dage mo chubeale.”
Chube gerua degaba unsuialin gerule ene Elías giti. Unsuialin Elías suiale Chube kwian israelita mneite manadu no mo alin, kwian mneite e mo ta du no Chube ole, ene kaire nege tangle kwian israelita mneite kle mo ta dbe no Chube ole, Chube mo ta gbu no mneite e manade no ama nu kwian mneite gaba mo alin, kwian ene kle mo ta gbe diali ama ole. Kwian israelita mneite e me agedu gweale no gire e giti Chube ama gau manadu mo alin, me ene, Chube taidu dage amage, Chube ta no ole tadu agekalin no ama alin, malen Chube ama gau mo alin. Chube kwian gai kwian age no giti ene Chube kle age kwian alin kwian age ñanale, ene Chube me kle tai dage kwiange me kle age no kwian alin. Agwa me ene, Chube ta no ole taidu dage kwiange kwian gau mo alin, ama me kwian gau kwian agedu gweale no giti. Chube nu kwian israelita mneite gaba mo alin, kwian ene mo ta blitu Chube ole, kwian ene ulita chegu trate Chube gwage. Agwa kwian israelita na ulita tañachugu ama age gweale no, e giti ama chege no trate Chube gwage, agwa me ñadu chege no trate ama tañachugu kare, ama ulita ta kledu bate Chubege, ama mo chuga gbu mno me mo ta blite Chube ole. Chube gerua degaba unsuialin gerule kwian ene giti, chada e gerule:
“Kwian me tadu mo ta blitakalin Chube ole, malen Chube ama ta gbu me suge geru ulia giti, ene geru ulia chku ama ologe agwa ama me ñadu geru keruchuge no, geru me ñadu suge trate ama tale, ama chegu kwian olo me kare kwian gwagwa me kare.”
Boidu ene unsuialin Chube gerua degaba unsuialin gerule kare, kaire kle boi ene nege tangle kwian israelita ole. Unsuialin Chube David ta gbu gerule kwian israelita me mo ta blite Chube ole giti:
“Kwian lle tanre molen, kwian kle toi no kle tañachuge lle ngle molen alin giti, kwian me kle tañachuge Chube giti, malen cha takalin Chube ji gbe kweri ama alin.
10 Cha takalin kwian ene ta chege me suge geru ulia giti, kaire cha takalin kwian ene chege boi tanre daga ngwale ta olire ole diali chui tangle.”
David geru e degu unsuialin kwian israelita giti.
11 Kwian israelita agedu tanre me no Chube dollale, ¿e giti Chube ama chugu ngwadi sugekare diali? Me ene ulia, Chube ama chugu ngwadi sugeti alin ene Chube mo ta gbu kwian me israelita chudaboi, Chube takalin geru Jesucristo giti chke uñale kwian me israelitage ene kwian me israelita ñage Jesucristo gai mo jwanngale siere. Ene chke uñale kwian israelitage Chube kle age no kwian me israelita alin, ene kwian israelita be takalin Chube age no ama alin naskuni Chube kle age no kwian me israelita alin kare, ene kwian israelita be ta mo ta blitakalin Chube ole. 12 Kwian israelita agedu tanre me no Chube dollale, ama me geru mo jwannga siere Jesucristo giti gau ulia, kwian israelita me geru e gau ulia, malen geru e jo chke nga na ulitage kwian me israelitaske, ene kwian me israelita ñadu Jesucristo gai ulia mo jwanngale siere. E no no, agwa ma no chui be chke gire kwian israelita ulita be mo ta blite Jesucristo ole be Jesucristo gai ulia mo jwanngale siere kwian me israelita Jesucristo gau ulia kare.
13 Cha gerule ba kwian me israelita ulita ole, Chube cha gbu geru amanu dbe ba ulita kwian me israelitaske, Chube gerua dbe giti ba ulitaske e giti nga suga no no chadi lle boi ene, cha ta mo ta gbakalin lle e boi no diali. 14 Cha kwian israelita, geru dbe giti kwian me israelitaske e giti cha takalin cha bitallage suge me no ama alin cha kle geru dbe ba ulita kwian na me israelitaske, ene ama be ta geru Jesucristo giti keruchugakalin, ene ama ñage Jesucristo gai ulia mo jwanngale siere ba kwian me israelita Jesucristo gau ulia kare. 15 Kwian israelita geru Jesucristo giti keruchugu, agwa ama me geru gau ulia, e giti Chube kwian ene chugu ngwadi sugekare moge sugeti alin, ene geru Jesucristo giti jo kwian na nga ulitageske, ene kwian na nga ulitage mo ta gbu no Chube ole Jesucristo giti. Chui be chke gire kwian israelita bai kaire kle bate Chubege be tachke Chubege be mo ta blite Jesucristo gai ulia, kwian kle bate Chubege ama jaba kare, gire ama tachkeni Chubege, e salengwli jaba chkeni gwade kare.
16 Unsuialin Chube kwian israelita enusulian Abraham gau mo alin Chube Abraham gbu lle boi mo alin, Abraham mo ta gbu Chube gai ulia ene Abraham chegu no trate Chube gwage, Abraham giti kwian israelita chudalla chegu Chube alin. E ulita gli kare, Abraham glichuga dbige no kare, Abraham chudalla israelita ulita glinanga no kare. Abraham kwian no, ama mo ta gbu Chube gai ulia no, ene kaire ama chudalla israelita ulita mo ta gbadale Chube gai ulia Abraham Chube gau ulia kare. 17 Agwa Abraham chudalla israelita gweale me Chube gau ulia, Chube kwian israelita ene chugu ngwadi sugekare, gire Chube ba kwian me israelita gau gbu israelita tanege mo alin. E salengwli kwian gli mananga glinanga me no me gbachie tkenga mlienga kare, gire kwian gli mananga glinanga chudea na gai gbe glinanga tkunga taneage, ene gli chege gdaitre alin. Chube agedu ene ba alin, ba kwian na chudalla me gaba mo alin, Chube ba gau mo alin ene ba chegu Chubenu. 18 Chube ba gau kwian israelita taneage mo alin, ba me tañachugadale mo giti ba ma no kwian israelitage ba Chube gau ulia giti, ba tañachuge ba ma no kwian israelitage ba Chube gau ulia giti ba tachkedale e me ba enusuliannu giti ba Chubenu, kwian israelita enusulian giti ba Chubenu. E salengwli glinanga tkabanga taneage glinanga chudea na jo gbaba gli ege, glinanga chudea na e me ma no glinanga jo tkabangage, me ñage suge glinanga e ulita me kle gli ulita gbe tige, glichuga dbige giti kle gli ulita gbe tige. 19 Ba gweale tañachuge mo tale mo giti: “Cha ma no kwian israelitage, malen Chube kwian israelita chugu ngwadi sugekare gire Chube cha gau mo alin israelita tanege.” 20 Ba kle tañachuge ene ba me kle tañachuge no, Chube kwian israelita chugu ngwadi sugekare glinanga tkabanga mliabanga kare kwian israelita me mo ta gbu Chube ole Chube gai ulia giti. Ba mo ta gbu Chube gai ulia, e alin giti Chube ba gau mo alin, e me gerule ba kwian no age no giti, me ene, Chube ba gau ba mo ta gbu ama ole gai ulia giti. Ba me ñage tañachuge mo gai dage mo giti kwian israelitage, ma no ba mo ta gbe chage ta giti Chube ole Chube gai ulia diali. 21 Chube kwian israelita chudalla ulita gaba mo alin, kwian e me mo ta gbu Chube ole Chube gai ulia, e giti Chube kwian e chugu ngwadi sugekare, ene kaire ba kwian na chudalla Chube me gaba ngeru mo alin, ba me mo ta gbe ama gai ulia diali Chube be ba chuge ngwadi sugekare ma blike ama kwian israelita chugu ngwadige. 22 Suge bage Chube no kwian ulita ole, agwa kaire Chube me no age me no ole, Chube takalin kwian mo ta dbadale ama gai ulia ama gai dage diali. Kwian israelita me agedu ene, malen Chube ama chugu ngwadi sugekare. Agwa ba kwian me israelita mo ta gbu Chube ole ama gai ulia, e giti Chube agedu no ba kwian me israelita alin, ba mo ta gbadale chage no ama ole diali age ama takalin kare, ene ama be age no ba alin diali, agwa ba mo ta gbe chage nganake sugekare amage ama be ba chuge ngwadi sugekare ama kwian israelita chugu ngwadi kare. 23 Kwian israelita me Chube gau ulia, agwa ama ulita bai kaire mo ta bliteni Chube ole Chube gai ulia, Chube be kwian ene gai ngwangeni naskuni mo alin, ama Chube, ama ñage age ene. 24 Ba me kwian israelita chudalla, Chube ba gau mo alin gbu kwian israelita me Chube gau tanege salengwli gli mananga glinanga chudea na gbe glinanga na tkabanga taneage kare, Chube agedu ene ba kwian me israelita alin, kaire me mno Chube alin kwian amanu ama nu chugaba ngwadi sugekare gai naskuni mo alin, ene Chube age kwian israelita ole kwian israelita bai kaire mo ta gbe no naskuni Chube ole.
25 Cha daballa cha ibotea Jesucristo giti, cha takalin Chube mo ta gbabage unsuialin chkedale uñale trate bage nege, ene ba me ñage tañachuge mo giti ba ma no kwian israelitage malen Chube ba gau, me ene, kwian israelita me Chube gau ulia giti Chube kwian israelita chugu ngwadi sugeti, ene geru ulia amanu Jesucristo giti ñadu chke ba kwian me israelita ulitaske. Kwian me israelita ulita bai kaire be geru Jesucristo giti gai ulia, 26-27 kwian ene geru gai ulia gire Chube be kwian israelita gaini naskuni, ene geru Jesucristo giti be joge naskuni kwian israelitaske, ene kwian israelita be ñage mo ta blite Jesucristo gai ulia mo jwanngale siere, Chube mo ta gbu ene unsuialin kwian israelita alin, Chube gerua degaba unsuialin gerule e giti, chada e gerule:
“Chube gerudu unsuialin kwian israelita enusulian ole: ‘Cha be kwian jwannga siere gdaite kage kwian israelita alin, ama giti cha be kwian israelita jwen siere ji chugege age me no gdale.
Kwian jwannga siere e be chie kwian israelita chudallaske, ama be kwian israelita ta gbe joge siere kle age me noge.’ ”
Chube gerua degaba unsuialin gerule ene.
28 Kwian israelita me geru Jesucristo giti gau ulia, e giti ama Chube dollale, e giti Chube mo ta gbu no ba kwian me israelita ole, ene geru Jesucristo giti chku ba kwian me israelitaske ene ba ñage geru e gai ulia. E me gerule Chube mo ta blitu me no kwian israelita chudalla ole, me ene, unsuialin Chube israelita enusulian gau mo alin, e giti Chube no kwian israelita chudalla ulita ole. 29 Unsuialin Chube gerudu kwian israelita enusulian ole: “Cha ba oindalla ulita gau mo alin, ba kwian chanu, cha be age no ba alin kaire ba oindalla ulita alin.” Chube gerudu ene, Chube age ulita ama gerudu kare, Chube me mo ta blite ama gerule kare. 30 Ngeru ba kwian me israelita bebi Chube uñe gire ba ulita me Chube gau dage me agedu Chube tadukalin kare, agwa nege kwian israelita mo ta blitu me Chube gai dage salengwli ba kledu age ngeru kare. Kwian israelita me kle Chube gai dage giti Chube mo ta gbu no ba kwian me israelita ulita ole Chube taidu dage ba ulitage, Chube ba ta gbu ama gai ulia. 31 Nege kwian israelita me kle Chube gai dage me kle age Chube takalin kare salengwli ba kledu age ngeru kare, ba ene gire Chube taidu dage bage Chube ba ta gbu ama gai ulia, ene kaire Chube be tai dage kwian israelitage, Chube be kwian israelita ta gbe Chube gai naskuni Chube taidu dage ba kwian me israelitage kare. 32 Kwian ulita israelita me israelita chagedu age me no Chube dollale me Chube gau ulia, e giti ama ulita chegu jiske Chube gwage, ama agali me ñadu mo ta gbe trate Chube gwage. Kwian ulita ene, Chube tai dage ama ulitage israelita me israelita.
33 Chube agedu tanre no kwian agenga me no alin, kwian me ama gau ulia agwa Chube taidu dage amage, ni kwian gdaitege suge mineade Chube mo ta gbu no ene kwian agenga me no ole. Ulia Chube no no, ama ta ngle molen, ulita uñale amage, ni kwian gdaitege suge Chube talla mine ulita, ni kwian gdaite ñage Chube talla ulita trage, Chube age no ulita me suge ni kwian gdaitege. 34 Chube gerua degaba unsuialin gerule e giti, chada e gerule:
“¿Chema che Chugagwalla Chube talla ulita uñe? ¿Chema ama ta gbe ama age giti? Ni kwian gdaite.
35 ¿Chema lle gweale ketu Chubege ngeru, ene Chube lle ketadaleni kwiange gau ñanale? Chube me jiske ni kwian gdaitege lle giti.”
Chube gerua degaba unsuialin gerule ene Chube giti. 36 Chube mo kirallaske kwian ulita lle ulita nga ulita dodadu, Chube kle e ulita gbe tige kle e ulita manade, Chube e ulita dodadu mo alin. Chube no no, ama alin kweri, ama alin ñage age kwian alin no, ama alin giti kwian gerudale nobi diali chui tangle, enebi no ama alin.