16
Pablo gbi kage chada giti daba Chubenu
ulita una Romamu alin
1 Muinga kada Febe che ibotea Jesucristo giti, ama kwian Chubenu ulita chudaboanga una Cencreage, ama be joge chke baske.
2 Cha takalin ba ama gai ngwange no che Chugagwalla Jesucristo giti, ama no Jesucristo ole. Ba daba na nu Jesucristo gaba ulia gai ngwange no kare ba muinga ai gai ngwange no ta ene ole, ba ama chudaboi no ulita ama takalin kare, ama daba na chudaboanga tanre no, kaire ama cha chudabo tanre, ene ba ama chudaboale kaire.
3 Ba gbi kade cha alin onbre kada Aquilage kaire ama muiralla kada Priscage, ama boke cha chudaboanga no no lle boi Jesucristo alin,
4 ama biri jogeda cha giti age cha alin, malen cha gerule no no ama ole ama agedu giti cha alin, me cha alin gerule no ene ama ole, kaire daba Chubenu ulita me israelita gerule no ama ole, nga suga no daba me israelitadi Prisca giti Aquila giti ama agedu giti cha alin, ene cha giti Jesucristo gerua ñadu joge chke kwian me israelitaske.
5 Daba ulita Chubenu kle mo lite Jesucristo geruadi Prisca Aquila ullage, ba gbi kade cha alin ama ulitage.
Ba gbi kade cha alin Epenetoge, ama cha skatemanalla no no, cha no no ama ole, ama kledu nga kweri Asiage, cha jo chke geru Cristo giti dbe nga ege ama Cristo gerua gau ngeru kwian na ulitage.
6 Ba gbi kade cha alin Maríage, ama lle bo tanre agedu tanre no che ulita alin.
7 Ba gbi kade cha alin Andrónicoge kaire Juniage, ama boke cha bitalla chuda giti, ama kledu skage ule cha ole, ama kle mo ta gbe no diali Cristo gerua ole malen kwian Jesucristo gerua ketanga ulita gerule no no ama boke giti, ama geru Cristo giti gau ulia ma ngeru chage.
8 Ba gbi kade cha alin Ampliatoge, ama cha skatemanalla no no che Chugagwalla Cristo giti, cha no no ama ole.
9 Ba gbi kade cha alin Urbanoge, ama lle boanga ule che ole Cristo alin.
Ba gbi kade cha alin Estaquige, ama cha skatemanalla no no, cha no no ama ole.
10 Ba gbi kade cha alin Apelege, ama boidu tanre daga ngwale Cristo gerua giti agwa ama mo ta gbu no chage ngerugu Cristo ole.
Ba gbi kade cha alin kwian ulitage kle toi Aristóbulo ullage.
11 Ba gbi kade cha alin Herodiónge, ama cha bitalla chuda giti.
Ba gbi kade cha alin Narciso bitalla ulitage bai kaire nu mo ta gbaba che Chugagwalla Cristo gai ulia.
12 Ba gbi kade cha alin Trifenage kaire Trifosage, ama bonate lle boanga che Chugagwalla Cristo alin.
Ba gbi kade cha alin Pérsidage, muinga e lle boanga no no che Chugagwalla Cristo alin, cha no ama ole.
13 Ba gbi kade cha alin Rufoge, ama kle mo ta gbe no no diali age no che Chugagwalla Cristo takalin kare daba Chubenu na gwa giti.
Ba gbi kade cha alin Rufo chebiage, Rufo chebia cha alin cha chebia kare, cha no no ama ole mo chebia kare, ama no no cha ole mo kirolla kare.
14 Ba gbi kade cha alin Asíncritoge Flegontege Hermege Patrobage Hermage kaire kwian Chubenu na kle ama ulita ole ba gbi kade cha alin ama ulitage.
15 Ba gbi kade cha alin Filólogoge Juliage Nereoge Nereo iboteage Olimpage kaire kwian Chubenu na kle ama ulita ole kle mo ta gbe Jesucristo geruadi, ba gbi kade cha alin ama ulitage.
16 Ba ulita gbi kade no no moge ta no ole dabage ulita.
Daba ulita Cristo gerua gaba aini tanre gbi kage ba ulita alin.
17 Cha daballa cha ibotea Jesucristo giti, ba geru ulia jun tanre, kwian Jesucristo gerua ketanga ba tku tangle no geru ulia Jesucristo gitige, ba ulita geru e gau ulia, nege kwian gweale kle chage baske geru nganake dbe, ba mo lingadale siere kwian enege, ama takalin ba ulita kira bate modi geru giti kaire ama takalin ba joge siere geru uliage, cha gerule trate trate ba ulita ole cha takalin ba kledale ta giti kwian ene ulitage.
18 Kwian ene chage geru nganake ole me kle mo ta gbe che Chugagwalla Jesucristo ole me kle age che Chugagwalla Jesucristo takalin kare, agwa ama kle age me no ama agali tañachuge kare, ama tale ama kwian me no me no ama kwian anblitanga agwa ama gerule no kwian na ole ta no giti, ene kwian na tañachuge ama gerule ulia, ene kwian na me tachke mo giti mo anblitange amage.
19 Uñale chage kwian ulita Chubenu nga na ulitage kle gerule no ba ulita giti ba kle mo ta gbe giti chage no Chube ole diali ba ulita kle age Chube takalin kare, e giti chadi nga suga no no ba ulita giti, cha takalin ba ulita mo ta gbe suge age no diali Chube takalin kare, agwa ba me mo ta gbale nganake age me no.
20 Ba ulita mo ta gbadale chege Chube gai ulia diali age no ama takalin kare, ene Chube ta suga no mauña be ba gbe kirachke blike Satanádi, ene dolla Satanás me ñage ba ta gbe age nganake me no. Cha takalin che Chugagwalla Jesu ba ulita manade no age no ba ulita alin diali.
21 Timoteo lle boanga Jesucristo alin ule cha ole gbi kage chada ai giti ba ulita alin, kaire Lucio kaire Jasón kaire Sosípater ama gdamai kle cha gatedi, ama cha bitalla chuda giti, ama gbi kage chada ai giti kaire ba ulita alin.
22 Cha kada Tercio, cha chada ai degu Pablo alin Pablo kle gerule kare kagadale ba ulita alin, cha kaire che Chugagwalla Jesucristo gau ulia, Chugagwalla Jesucristo giti cha gbi kage chada ai giti ba ulita alin.
23 Cha Pablo kle toi daba kada Gayo ullage, daba Gayo gbi kage chada ai giti ba ulita alin, ama kle daba Chubenu ulita gai ngwange no mo ullage kle daba Chubenu ulita chudaboi no.
Kaire daba Erasto ama igi mananga una aige, ama gbi kage chada ai giti ba ulita alin.
Kaire daba kada Cuarto gbi kage chada ai giti ba ulita alin.
24 Cha takalin che Chugagwalla Jesucristo ba ulita manade no no age no ba ulita alin diali. Ene nobi.
Pablo daba Chubenu una Romamu ulita jige Chube kote
25-26 Cha kle ba jige Chube kote, ama ñage ba kira gbe mo ta gbe kiraske diali geru uliage cha ba tku tangle kare Jesucristo giti. Chube me boi, ama chege gwade diali chui tangle, unsuialin Chube kwian tanre Chube gerua ketanga ta gbu chada dege be boi Jesucristo ole giti, boidu ene ulita Chube kwian ta gbu mo gerua dege kare. Ngeru Chube nga dodaduge Chube mo ta gbu Jesucristo kage nga dba ai giti kwian jwanle siere ji chugege age me no gdale, geru e chegu ogaba kare skwlenre ba kwian me israelitage, agwa nege geru e chku uñale bage kaire kwian na nga ulitage, ene kwian nga ulitage ñage mo ta gbe Chube gai ulia mo Chubeale Jesucristo giti age Chube takalin kare.
27 Chube alin allabi gdaitre alin, ama ta ngle molen, ama agedu tanre no che ulita alin Jesucristo giti, che ulita gerudale no no Chube ole e giti diali chui tangle. Ene nobi.
Geru ai ene ulita cha Pablo chada degangu ba ulita kwian Chubenu una Romage alin. Che kle meni.