10
1 Kagu kahao, yogu henuwalakilaki yo yogu tapwalolo Yaubada unai Isalaela hesabadi ede taba kabihemauli se hai.
2 Gonowana ya hededehemasalahadi meta Yaubada se henuwakaliliyei, iyamo nige nuwatulobaina hesau kalidiyena.
3 Tolehedudulai Yaubada unai ye laoma ne nige se nuwatulobai na se kaipate bena se bom se tolehedudulaiꞌuyoidi, na nige se modelau Yaubada yona tolehedudulai unai.
4 Laugagayo yona kabagehe ede Keliso. Unai ede tausunuma maudoidi gonowana tolehedudulai se hai.
5 Mose ye hededehemasalaha meta idohagi kabo tolehedudulai ta hai laugagayo debanaena, ye wane,
“Kaiteya laugagayo maudoidi ta ye miyawataninamwanamwaeidi kabo mauli ye hai.” (Lewitikasi 18:5)
6 Na tolehedudulai sunuma debanaena wa kulikuli tabuna hedehededena ye hedede ye wane,
“Tabu nuwamyena ku wane, ‘Kaiteya kabo ye sae galewa’ ”
bena kabo Keliso ye hai na ye dobiyeiyama?
7 Yo,
“tabu ku wane, ‘Kaiteya kabo ye dobi tanoubu gunimolosina ne unai’ ” (Dutelonomi 30:13)
na tauboiboita udiyedi Keliso ye baheisiniyama?
8 Na hage, saha ye hedede?
“Hedehedede wa iya ede dedekam ne unai. Iya ede kawam ne unai yo nuwam ne unai.” (Dutelonomi 30:14)
Teina hedehedede ta meta sunuma wasana, iya ede ka hewahewasaꞌusei ta.
9 Kaniyona ede, ena taba kawamyena ku hedede ede Yesu iya Guiyau, na nuwamyena ku kawamamohoi meta tauboiboita udiyedi na Yaubada ye hetoloꞌuyoi, kabo ye gilihaigo.
10 Kaniyona ede nuwamyena meta ku kawamamohoi na tolehedudulai ku hai, na kawamyena ku hededehemasalaha na gilihai ku lobai.
11 Doha kulikuli tabuna ye wane,
“Kaiteya Guiyau ye sunumaei meta taba nige ye hemwadine.” (Aisaiya 28:16)
12 Kaniyona ede Dius yo Dagela tamowaidiyao meta nige yodi udoi hesau. Guiyau kesegana ne meta maudoidi yodi Guiyau, na tauyogasae iya unai maudoidi ne ye kainauyakaliliyeidi.
13 Doha kulikuli tabuna ye wane,
“Kaiteyadi se kaibwada sagu hesabana Guiyau unai meta kabo ye gilihaidi.” (Yoela 2:32)
14 Na idohagi kabo se yogasae iya unai ena nige se sunumaei? Na idohagi kabo iya se sunumaei ena wasana nige se lapui? Na idohagi kabo wasana se lapui ena nige tamowai hesau ye lauguguya kalidiyena?
15 Na idohagi kabo se lauguguya kana siga ena Yaubada ye hetamalidi? Doha kulikuli tabuna unai se kuliyako se wane,
“Huyana wasa namwanamwana se baheiyama meta ta hailobaidi ma gwauyalada.” (Aisaiya 52:7)
16 Iyamo nige Isalaela tamowaidiyao maudoidi wasa namwanamwana ta se kawakabiyei. Doha Aisaiya ye wane,
“Guiyau, kaiteya meta yoma wasa ta ye kawamamohoiyei?” (Aisaiya 53:1)
17 Unai, sunuma yona kabalaoma ede wasa namwanamwana lapuina unai, na wasa namwanamwana yodi kabalapuina ede ena tamowai hesau Keliso wasana ye hededehemasalaha kalidiyena.
18 Kabo ya henamai, Dius tamowaidi wasa ne se lapui e nige? Se lapuiyako! Doha kulikuli tabuna unai se kuliyako se wane,
“Kalinadi ye laoko tanoubu maudoina unai
na yodi hedehedede meta tanoubu tehagehegehena ne udiyedi se lapuiyako.” (Same 19:4)
19 Kabo ya henamaiꞌuyo, nuwana Isalaela nige se nuwatulobai? Se nuwatulobai! Mose ye hededeyako ye wane,
“Boda hekadi siya nige yogu tamowai kabo ya saguidi na unai ya sinaligomiu,
na namwa saha kalidiwai ne kabo kwa kaipatebayao bena hinage kwa hai,
yo tamowai hekadi, siya nige nuwatulobai kalidiyena, na yogu kabi se namwa udiyedi
na unai kabo ya hekouyalayalagomiu na kwa kouyalayalaeigau.” (Dutelonomi 32:21)
20 Yo Aisaiya ma nuwabayaona na [Yaubada kalinana] ye hededehemasalaha ye wane,
“Tamowai nige se waseneigau, iyamo se lobaigau.
Nige se kaibwada bena se kitagau, iyamo ya bom ya hemasalahaꞌuyoigau kalidiyena.” (Aisaiya 65:1)
21 Na kabo Isalaela hedehedededi hesau Aisaiya ye hededehemasalaha ye wane,
“Mayadai maudoina nimagu ya helelelaedi tamowai kalidiyena,
iyamo se kawayagala yo nuwadi se kwailolokalili.” (Aisaiya 65:2)