Waazukaa citaaboo
Citaaboo fahamandiroo
Citaaboo woo šenney mana hun kala boro lakkalkoyni do, Izirayel kokoy izʼaru no. Boraa kaŋ nʼa hantum mma nga boŋ cee «Waazukaa». Zama de Sulaymaana ga bayrandi Izirayel lakkalkoyni, de mo Dawda ize no, nda mo citaaboo hantum takaa nda nga šenney ga, boro boobo ga hongu kaŋ kokoyoo Sulaymaana kʼa hantum. A ga hima nda boro beeri kaŋ goro ka miile nga waati bisantey ga. A duu a ra cawyan beeri, nda fahamay, nda lakkal. A na nga dira takaa kul guna aduɲɲa ra ka laasaabu kaŋ haya kul ga bisa sanda hew: a ma tee bayray, wala alman, wala hayey kaŋ borey ga bagʼey, i kul sii nda addalil sanda hew gaarandiyan. Waazukaa faham haya foo se kaŋ ti adamize si hin ka duu haya kul nda manʼti woo kaŋ Irkoy nʼa noo a se. Citaaboo woo gʼir bayrandi haya foo kaŋ adamize kul ga hima kʼa tee kaŋ ti: «Ma hunbur Irkoy, ma nga yaamarey dii» (zamnaa 12.13). A ga cebe kaŋ aduɲɲa haya kul, a ma tee alman, wala maa, wala jamaa, wala hayey kaŋ boro ga bagʼey, i kul manʼti baffoo nda mana duu Irkoy.
Citaaboo kanje beerey ti:
1. Aduɲɲa manʼti haya kul 1—2
2. Haya kul nda nga waatoo 3.1–8
3. Haya beeriyaŋ ga tee aduɲɲa ra 3.9—11.6
4. Ka hunbur Irkoy bisa haya kul 11.7—12
1
Haya kul sii nda addalil
1 Žerizalem kokoyoo Dawda izʼaroo kaŋ ti waazukaw šenney ti wey.
2 Yaada nda yaadayaŋ, waazukaa nee: «Yaada nda yaadayaŋ,
haya kul sii nda addalil!»
3 Farayanoo kul kaŋ nda adamize ga nga boŋ farandi waynaa cire,
macin ti nafaa kaŋ a ga duu a a ra?
4 Zaman foo borey ga koy, zaman tana borey ga kaa,
laboo ga bara hala abada.
5 Waynaa ga fatta, waynaa ga kaŋ,
a ga cahã ka koy nga dogoo ra
hala nga ma fatta koyne.
6 Hewoo ga hẽe ka koy gurma here,
ka bere ka koy hawsa here,
a ga kuubi-kuubi ka nga fondaa zaa.
7 Isawey kul mma zuru ka koy teekoo ra, amma teekoo si too.
Nongoo kaŋ ra isawey ga zuru ka koy, i si fay nda ka koy a ra.
8 Šenney kul ga šendi, boro kul si hin kʼi kul har,
moo si kungu nda gunayan,
haŋa si fara nda maayan.
9 Hayey kaŋ bisa, ngi no ma kaa koyne,
hayey kaŋ bay ka tee, ngi no ma tee koyne,
haya kul sii no kaŋ ti itaaga waynaa cire.
10 Ba nda boro nee: «Haya taagaa woo guna.»
Haya no kaŋ gay a ga bara za ir mana kaa.
11 Boro si hongu hayey kaŋ bisa,
hayey kaŋ ga kaa ka tee mo, boro si hongu ey,
borey kaŋ ga kaa mo si hongu borey kaŋ dumawey ga ngi kaa.
Adamize lakkaloo sii nda addalil
12 Agay kaŋ ti waazukaa, ay tee Izirayel kokoyoo Žerizalem.
13 Ay kayandi ka ceeci nda lakkal ka haya kul bay nda ka faham haya kaŋ ga tee beenaa cire, goy yaamu no kaŋ Irkoy gʼa daŋ adamizey ga kʼi taabandi.
14 Ay dii teegoyey kul kaŋ ga teendi waynaa cire, i kul sii nda addalil sanda hew gaarandiyan.
15 Haya kaŋ golbi si hin ka šerrandi,
haya kaŋ sii no si hin ka kabandi.
16 Ay nee ay boŋ se: «Nga ne, ay duu lakkal ka bisa kokoyey kul kaŋ goro Žerizalem kokoytaraa ra za ya na tee kokoy. Ay duu lakkal beeri nda bayray.»
17 Ay kayandi hala ya lakkal bay, hala ya saamataray nda hollokomtaray bay, ay dii kaŋ nga mo manʼti kala sanda hew gaarandiyan.
18 Boro kaŋ goo nda lakkal beeri goo nda dooray beeri,
boro kaŋ tonton nga bayraa ra, mma tonton nga zaraboo ga.