10
1 Hamni bukawyaŋ ga turaari hansekaa jiyoo funbandi kʼa moorandi,
lakkal jaŋantetaray kaccu ga tiŋ nda lakkal nda darža,
a ga hin kʼi hasara.
2 Lakkalkoyni binoo mmʼa ka koy kabe guma here,
lakkal jaŋante binoo mmʼa ka koy kabe waawa here.
3 Nda hollokom kaŋ ga dira nga fondaa ra,
takaa kaŋ nda a sii nda lakkal,
a mma nee kaŋ boro kul ti hollokom.
4 Nda boraa kaŋ ga laama futu ni ga,
masi hun ni dogoo ra, zama suuri ga zunubu boobo ganji.
5 Haya futu foo goo no kaŋ ay dii a waynaa cire
kaŋ ti boŋkoyni kaŋ dere.
6 Lakkal jaŋante ga hin ka jer beene,
ka gar almankoyney yeetandi ganda.
7 Ay dii baɲɲayaŋ bariyaŋ boŋ,
ka gar boŋkoyniyaŋ goo cewey ga sanda baɲɲayaŋ.
8 Boro kaŋ na guusu fanši ga kaŋ a ra,
boro kaŋ na fun kaa cete ra, gondi gʼa ɲama.
9 Boro kaŋ ga tondi kaa, tondey gʼa maray,
boro kaŋ ga tuuri kayri goo farrati ra.
10 Nda guuru miɲoo buu, de boro manʼa kaanandi,
boraa ga hima ka tonton ka gaabi daŋ ka goy nda a,
lakkal nafaa manʼti kala goyey ga boori.
11 Nda boro mana gondi kanji hala a na boraa ɲama,
macin nafaw bara boraa se a mʼa kanji koyne.
Lakkalkoyni hoyray tanayaŋ
12 Lakkalkoyni miɲoo ga too nda šenni alhormante,
lakkal jaŋante miɲoo gʼa halaci.
13 Nga šenney šintinoo manʼti kala saamataray,
nga šenney benantaa manʼti kala hollay.
14 Hollokom šenney ga boobo.
Adamize si bay haya kaŋ ga kaa ka tee,
may no ma haya bay kaŋ ga tee nga dumaa ga?
15 Goy kayna ga lakkal jaŋante farandi
hala nongu kaŋ ra a si koyraa fondaa bay.
16 Ni bone, gandaa kaŋ kokoyoo ti zanka,
de nga boŋkoyney ga biya ka ŋaa.
17 Ni duu gomni, gandaa kaŋ kokoyoo ti borcin,
de nga boŋkoyney ga ŋaa waati ga,
ka duu gaabi kaŋ manʼti suuyan.
18 Nda goykey ga fuyye, hugoo beeneheroo ga kaŋ,
boro kaŋ kabey si baa goyyan,
hugoo ga fun ka hari loti ganda.
19 Ŋaayan teendi daame se,
alaneb hari mooro ga hunayan ɲaalandi,
nooru ga haya kul hanse.
20 Masi kokoy danga, ba ni lakkaloo ra,
ni kanihugoo ra masi almankoyni danga,
zama beenaa cirawey ga koy nda ni šennoo,
haya kaŋ goo nda fata mʼa deede.