7
1 Maa henna baa hew kaana kaŋ ga boro yon.
Buuyan zaari baa hayyan zaari.
2 Boro ma koy beray hugu ra
baa ma koy hugu kaŋ ra ŋaayan hoyandi goo,
zama woo din ti adamize kul kokoroo,
baahunante ga hima ka miile a ga.
3 Dooray baa haaray,
zama ndum kaŋ ga hẽe ga boori bine se.
4 Lakkalkoyney biney sii kala beray hugoo ra,
lakkal jaŋantey biney sii kala hugu ra kaŋ ra ɲaali goo.
5 Boro ma haŋajer lakkalkoyni tejeyaney se
baa boro ma haŋajer lakkal jaŋantey doonoo se.
6 Lakkal jaŋantey haaraa ga hima nda
karjiyaŋ kaŋ ga ton kusu cire ka hẽe.
Woo mo sii nda addalil.
7 Tooɲe ga lakkalkoyni tee hollokom,
binedaymi ga boŋ bere.
8 Haya benantaa baa nga šintinoo,
suuri baa hundi beeray.
9 Masi cahã ka futu,
zama lakkal jaŋante, waati kul a mma cahã ka futu .
10 Masi nee: «Macin se cee jinaa waatey baa sohõ da waney?»
Zama manʼti lakkal no ma kate ma hãayanoo woo tee.
11 Lakkal goo nda alkadar sanda tubuhaya,
haya henna no borey se kaŋ ga dii waynaa.
12 Zama takaa kaŋ nda nooru ga boro sutura,
takaa din da nda lakkal ga boro sutura,
nafaa kaŋ goo lakkal ra manʼti kala
a mma borey kaŋ goo nda lakkal noo aloomur.
13 Irkoy teegoyoo guna:
may ma hin ka haya šerrandi kaŋ Irkoy nʼa golbi.
14 Gomni zaari hane, ma binekaanay,
bone zaari hane, ma haya foo bay kaŋ ti:
ihinkaa kul Irkoy kʼi tee,
hala adamize masi haya kul bay kaŋ ga kaa ka tee nga ga.
15 Ay dii woo kul ay zaari yaadawey ra.
Šerrante goo no kaŋ nga nda nga šerretaraa kul, a ga buu,
nda boro futu kaŋ nga nda nga futuroo kul,
a ga duu aloomur kuku.
16 Masi šerre hala ma bisa,
masi cebe kaŋ nʼga hanse ka bara nda lakkal:
macin se nʼga ni boŋ halaci?
17 Masi futu hala ma bisa,
masi tee hollokom:
macin se nʼga buu za ni waatoo mana too.
18 A ga boori ma haya hinkaa woo dii i masi hun ni ra,
zama boro kaŋ ga hunbur Irkoy ga duu fattadoo hayey wey kul ra.
19 Lakkal ga lakkalkoyni noo gaabi
ka bisa boŋkoyni woy (10) kaŋ goo koyra ra.
20 Adamize šerrante sii laboo ga
kaŋ ga ihenna tee bila zunubu.
21 Masi šenney kul kaŋ ga harandi daŋ assal,
masi koy maa ni tamoo kaŋ ga ni danga,
22 zama ni binoo ga bay kaŋ cee booboyaŋ nʼna boroyaŋ danga.
23 Woo kul ay na lakkal kʼa sii.
Ay nee kaŋ ay ga duu lakkal,
amma a goo ya ne nongu mooro ra.
24 Hayaa kaŋ ga bara sohõ da ga mooru,
a ga guusu ka guusu,
may ma hin ka duu a?
25 Ay yee kʼay boŋ gaabi ka bay, ka dii,
ka lakkal nda haya kaŋ ga boori ceeci,
ka bay kaŋ borofututaray ti saamataray,
saamataray manʼti kala hollay.
26 Ay dii haya kaŋ ga hottu nda buuyan:
woy kaŋ manʼti kala kumsay,
binoo manʼti kala sankay, kabey ti karfu.
Boro kaŋ ga kan Irkoy se ga hun a ra,
amma zunubantey ga kaŋ kaboo ra.
27 Waazukaa nee: «Nga ne, hayey ne kaŋ ay dii ey
kʼi laasaabu affoo-foo ka dii cimoo.
28 Woo kaŋ ay hundoo goo mʼa ceeci koyne, ya na duu a jina ti:
ay duu aru foo aru zenber (1.000) game,
amma woyey kul game ya na duu ba woy folloku.
29 Woo kul hayaa kaŋ ay duu a ne:
Irkoy nka adamizey tee i ga šerre,
amma ngi, i na šenday boobo ceeci.»