Batagaa kaŋ sanbandi Eberewey se
Citaaboo fahamandiroo
Batagaa woo mana hantumandi kala dumoo kaŋ se i ga nee Ebere, Izirayel borey maa foo no. I ga nee i se mo Alyahuudu. Boraa kaŋ na batagaa woo hantum, sohõ ir si maaɲoo bay. Boraa kaŋ nʼa hantum ga Alyahuudey ašariyaa bay.
Alyahuudey kaŋ naanay Isa, kaŋ goo gurzugay ra, ngi no batagaa woo hantumkaa ga biney daŋ kʼi hoyray i ma duumi Isa naanaa ga. I masi hanga Alyahuudey alaadawey, a si haya kul hanse. A gʼi cebe mo kaŋ Isa bisa almalaykey, a bisa annabey, a bisa sargari juwalkey jineborey, Isa ti sargari juwalkaw beeroo kaŋ na sargari follokaa tee kaŋ ga wasa alwaatey kul se. A nʼi bayrandi kaŋ i ma gaabandi ba nda i ga zarabi, i ma Ibirahima nda Irkoy ganakaw beerey jerey guna ka tee.
1
Irkoy na nga Izʼaroo ka šelaŋ ir se
1 Cee boobo nda taka boobo, waati jinaa Irkoy šelaŋ ir baabey se annabey bande,
2 amma zaarey din kaŋ ti zaari korawey, a šelaŋ ir se nda Izʼaroo kaŋ a nʼa kayandi a ma tee haya kul tubukaa. Nga mo nda a na aduɲɲawey tee.
3 Izʼaroo din manʼti kala Irkoy daržaa nereyanoo, nga ti hayaa kaŋ ti Irkoy zaati. A ga haya kul dii nda nga šenni gaabantaa. Waatoo kaŋ a na adamizey henanandi ngi zunubey ra ka ben, a goro Jerantaa kabe hennaa ga beene nongey ra.
Irkoy Izʼaroo bisa almalaykey
4 Izʼaroo bisa almalaykey sanda takaa kaŋ nda a duu maa kaŋ bisa ngi waney.
5 Koyne mo almalaykey ra, may se Irkoy bay ka nee:
«Ay Izʼaroo ti ni,
hõ ay na ni hay»?
A mana bay ka nee mo:
«Agay, ay ga tee a se baaba,
nga, a ga tee ya ne izʼaru.»?
6 Amma waati kaŋ a ga nga Izʼaru jinaa sanba aduɲɲa ra koyne, a ga nee:
«Irkoy almalaykey kul ma sujudu a se.»
7 Almalaykey here a nee:
«A ga hewoo tee nga dontokey,
a ga nuune deenewey tee nga goykey.»
8 Amma Izʼaroo here a nee:
«He Irkoy, ni kokoy gorodogoo ga cindi abada hala abada.
Ni laamaa goboo manʼti kala gobu kaŋ ga šerre.
9 Šerretaray no ma kan ma ne,
nʼna ifutu konnay.
Woo se Irkoy, ni Koyoo
na ni yon nda ɲaali jii,
ka baa ni ka bisa ni cerey kul.»
10 Irkoy nee koyne:
«Ni ir Koyoo ka laboo gorandi za sintinoo ga.
Beenawey manʼti kala ni kabe teegoyoo.
11 I ga halaci, amma ni, nʼga cindi.
I kul ga žen sanda bankaaray.
12 Nʼgʼi taabu sanda gumtaafa.
I ga barmay.
Ni, nʼga cindi taka follokaa ga,
ni zaarey sii nda kaydoo.»
13 Almalaykey ra, may se Irkoy bay ka nee:
«Goro ay kabe hennaa here,
hala waati kaŋ ra ay na ni iberey tee taari
kʼi daŋ ni cewey cire»?
14 Almalaykey, manʼti hundiyaŋ no kaŋ ga goy Irkoy se wala? Manʼti i nka sanbandi hala i ma goy borey se kaŋ na hallasiyan tubu wala?