3
Isa bisa Musa
1 Woo maaganda se, agʼarma henanantey kaŋ goo nda baa ciyayanoo ra kaŋ hun beenaa ra, wa Isa guna kaŋ tee diyaw a tee sargari juwalkey jineboro ir naanaa fondaa kaŋ ir gʼa har ra.
2 Isa ga laadir boraa here kaŋ nʼa gorandi goyoo ra, sanda takaa kaŋ Musa na tee Irkoy hugoo [kul] goyoo ra.
3 Isa duu darža ka bisa Musa, sanda takaa kaŋ nda hugu cinakaw goo nda beeray ka bisa hugoo.
4 Hugu kul, boro kʼa cin, amma haya kul cinakaa manʼti kala Irkoy.
5 Musa manʼti kala goykaw, a tee laadirante Irkoy hugoo ra, hala hayaa kaŋ ga kaa ka harandi, a ma nga seedetaraa too.
6 Amma Almasihu manʼti kala Irkoy Izʼaroo, a tee laadirante ka Irkoy hugoo juwal. Ir ti nga hugoo nda ir ga naanaa nda naataa kaŋ nda ir ga fooma dii ka boori.
Hunanzamoo kaŋ jisandi Irkoy borey se
7 Woo maaganda se, sanda takaa kaŋ nda Hundi Henanantaa ga nee:
«Hõ, nda war maa Irkoy jindoo,
8 war masi war biney šendandi sanda tureyanoo waati,
siiyanoo zaaroo hane saajoo
9 kaŋ ra war baabey nʼay sii kʼay guna,
i dii ay teegoyey
10 jiiri woytaaci (40).
Woo maaganda se ay futu zamanoo din borey ga.
Ay nee: ‹Ngi biney ra, i ga dere waati kul,
i manʼay fondawey bay.›
11 Ay futuyanoo ra ay žee ka nee: ‹Ir ga dii wala i ga huru ay hunanzamoo ra!›»
12 Agʼarmey, wa war boŋ hawgay, boro kul war ra masi bara nda bine futu nda naanay jaŋay ka Irkoy hunantaa naŋ.
13 Wa cere kunahennay zaari kul, kullihinne ir goo waatoo woo ra kaŋ se i ga nee «hõ», boro kul war ra masi binešenday ka naŋ zunubu ma nga darga.
14 Zama ir mana tee kala Almasihu hangasineyaŋ, nda a gar ir gaabu ir sintinoo naanaa ga hala benantaa ga.
15 Citaaboo nee:
«Hõ, nda war maa Irkoy jindoo,
war masi war biney šendandi sanda tureyanoo waati.»
16 May ti borey kaŋ ture Irkoy meešennoo maayanoo banda ga? Manʼti borey kul no kaŋ Musa nʼi fattandi Misira wala?
17 Mayyaŋ ga Irkoy futu jiiri woytaaci (40)? Manʼti borey no kaŋ na zunubu tee, de kunturey kaŋ ka buu saajoo ra wala?
18 Mayyaŋ ga a goo kaŋ a žee kaŋ i si huru nga hunanzamoo ra? Manʼti borey kaŋ mana haŋajer a se ga a goo wala?
19 Ir dii kaŋ i mana hin ka huru hunanzamoo ra ngi naanay jaŋaa maaganda se.