5
Debora baytoo
Zaaroo woo, Debora nda Barak, Abinoyam izʼaroo na doonoo woo don cere bande ka nee:
«Albarka ma bara Abadantaa se,
Izirayel, boŋkoyney yadda ka huru i jine,
jamaa yadda ka koy nda ngi boŋ ka wongu.
Kokoyey, wa maa,
boŋkoyney, wa haŋajer!
Agay, Abadantaa se, nhuu, agay, ay ga bayti don.
Ay ga zabur don Abadantaa, Izirayel Koyoo se.
 
Abadantaa, waati kaŋ ni fatta Seyir,
waati kaŋ za Edom gandaa ra ni man,
laboo jijiri, beenawey doo,
duulawey na hari doori.
Tondi hondey žititi Abadantaa jine,
Sinay wanoo mo jijiri Abadantaa, Izirayel Koyoo jine.
 
Šamgar, Anat izʼaroo zamanoo ra,
Yayel waatey ra,
fondo beerey goo koonu,
naarukey na fondo šendey zaa,
koyra kanbey naŋandi Izirayel ra,
i dere,
hala waatoo kaŋ agay, Debora tun,
ay tun sanda ɲaa Izirayel se.
I nka koy taagayaŋ suuba,
aywa, wongoo goo koyrawey miɲey ga.
Wongu-ize zenber woytaaci (40.000) Izirayel ra
kaŋ boro si dii ba ngi affoo kone koray foo wala yaaji foo.
 
Ay binoo goo Izirayel boŋkoyney se,
ay binoo goo jamaa borey kaŋ na ngi boŋ noo se.
Wa albarka daŋ Abadantaa se.
10 War kaŋ ga kaaru farkey woy kaarayyaŋ ga,
war kaŋ ga goro gaariyaŋ ga,
war kaŋ ga dira fondaa ra, wa miile.
11 Hari gurkey, ngi dooney,
ga Abadantaa teegoy šerrantey deede,
teegoyey kaŋ Boŋkoynoo nʼi tee Izirayel koyra kanbey se.
Waatoo din no Abadantaa jamaa zunbu koyrawey miɲey ga.
 
12 Tun, tun jirboo ra, Debora!
Tun, tun ka bayti don!
Tun Barak!
Abinoyam izʼaroo, kate ni baɲɲey.
 
13 Borey kaŋ cindi i mana buu zunbu ka koy borciney do,
Abadantaa jamaa zunbu sanda wongaariyaŋ.
14 Efrayim mana hun kala nongoo kaŋ ra Amalek borey cindi.
Ngi dumaa ga, Benžameŋ hun.
Bonkoyniyaŋ zunbu ka hun Makir,
borey kaŋ ga kokoytaraa goboo dii zunbu ka hun Zabuloŋ.
15 Isakar boŋkoyney goo Debora bande.
Isakar nda Barak tee affoo,
a cahã ka zunbu ka koy ganganoo ra.
Rubeŋ hugey hanse ka bine-bine.
16 Macin ka kate ma cindi kaley ra ka maa kurkey laati karyanoo se?
Rubeŋ hugey hanse ka bine-bine.
17 Galad goro Žurdeŋ isaa se banda bila nda i koy.
Macin se Dan ga waati tee harihiyey jere bila nda i ma koy?
Ašer goo ma goro teekoo miɲoo ga,
a cindi nga gurawey ga.
18 Amma Zabuloŋ manʼti kala jama kaŋ na buuyan tangam,
Neftali mo na buuyan tangam wongoo farroo ra.
 
19 Kokoyey kaa, i wongu.
Kanaŋ kokoyey wongu Tanak,
Megido harey jere,
i mana duu alganiima, i mana duu nzorfu kaaray.
20 Za beenaa ra handarawey wongu,
ngi fondaa ra i na Sisera wongu.
21 Kišoŋ haroo nʼi tuusu,
Kišoŋ haroo kaŋ gay a ga bara.
Yala ya dira ay fondaa ra nda hini!
22 Woo ra baryey ceekorey na laboo kar,
i ga hanse ka zuru nda ngi kobsey.
23 Wa Meroz koyraa danga, Abadantaa almalaykaa kʼa har,
wa nga gorokey danga,
zama i mana kaa ka Abadantaa faaba,
ka tonton wongaarey ga ka Abadantaa faaba.
 
24 Albarka ma huru Yayel ra woyey kul ra,
Yayel, Heber, Keni boraa wandoo,
woyey ra kaŋ ga huna hukkum cire, albarka ma huru a ra.
25 Sisera na hari wiri, Yayel nʼa noo waa,
borciney potoo ra a kate waahoonu.
26 A na kabe ka sukahayaa dii,
a na nga kabe gumaa ka goykey ndarkaa zaa,
a na Sisera kar, a na boŋoo kayri-kayri,
a nʼa kayri, a na lakkaloo fun.
27 Sisera kunkuni Yayel cewey cire,
Sisera kaŋ, a kani.
A na nga boŋ kunkuni cewey cire, a kaŋ,
nongoo kaŋ ra a na nga boŋ kunkuni nga ra a kaŋ, a halaci.
 
28 Sisera ɲaa ga honnay nda funeetaraa fun-funey, a kaati ka nee:
‹Macin se nga bari torkaa si kaa hala sohõ?
Macin se ay si maa torkawey jindey?›
29 Lakkalkoyney kaŋ goo boŋkoyni woyey ra nʼa zaabi.
Nga hunday mo zaabi ka nee:
30 ‹Šikka sii kaŋ alganiimaa kaŋ i duu a nga no i goo mʼa zamna.
Hondiyaw woy foo wala ihinka wongu-ize foo kul se.
Alganiima kaŋ ti bankaaray caarantey, wey kaŋ i nʼi taa,
icere-cerantey, nda bankaaray hinka kaŋ kayandi borey kaŋ hin jindey se.›
31 Abadantaa, yala ni iberey kul ma dere takaa woo da,
borey kaŋ ga baa ni ma tee sanda waynaa
waati kaŋ a fatta nda nga gaaboo.»
 
Gandaa yay jiiri woytaaci (40).