Linžiloo kaŋ Luka nʼa hantum
Citaaboo fahamandiroo
Luka manʼti Alyahuudu. Nga goyoo manʼti kala lotokortaray. A ga naanay ka bay kaŋ Isa manʼti kala Irkoy Izʼaroo.
Luka ga cebe kaŋ Isa ga baa borey kul bila fay-fayyan. A ga baa ba yawey, nda nga iberey, nda zankey, nda wircikoyney, nda woyey kaŋ kurɲey buu.
Linžiloo kaŋ Luka nʼa hantum ga šelaŋ boroyaŋ se kaŋ si hanse ka haya bay Izirayel kaniroo ra. Nga alhuzunoo manʼti kala nga ma hayey fahamandi i se kaŋ se i si faham. Boro kaŋ na Linžiloo woo caw ka boori, boraa ga dii kaŋ Isa ti aduɲɲa Koyoo nda nga Hallasikaa.
Isa Almasihu buu, jirbi hinza banda ga, a tun, a koy beenaa ra. A bayrandi nga taalibey se kaŋ i ma hayaa kaŋ ti allaahidoo kaŋ nga nʼa zaa i se batu kaŋ ti Hundi Henanantaa kaayanoo. Woo ti haya kaŋ ga diyandi Luka citaabu hinkantoo kaŋ a nʼa hantum ra kaŋ ti Diyawey teegoyey citaaboo.
1
Luka hantum Tewofil se
1 Boro booboyaŋ goro ka hayey kaŋ tabati ir moɲey cire fillawey hantum,
2 takaa kaŋ nda seedewey kaŋ za sintinoo ga, i maa, i dii, de i nʼi ka too ir do. Ngi no ma huga nda Irkoy meešennoo haryanoo.
3 Agay mo, ay dii kaŋ a ga boori ya ceeci ka fuuni ka hayey kul bay kaŋ tee za sintinoo ga. Yʼi fesufesu kʼi hantum affoo-foo cere bande ma ne, ir aru beeroo Tewofil,
4 hala ma cawyanoo kaŋ nʼduu a alfaydaa bay.
Almalayka na Yehiya kaŋ ti batizekaa hayyanoo bayrandi
5 Zamanoo kaŋ ra Herod ti Žude gandaa kokoyoo, boro foo goo no kaŋ ti sargari juwalkaw, maaɲoo ti Zakarya. A sii kala boraa kaŋ se i ga nee Abiya sargari juwalkey ra. Wandoo maaɲoo ti Elizabet, Haruna hayroo no.
6 Ngi boro hinkaa kul ti boro šerranteyaŋ Irkoy jine. I ga dira nda cimi ir Koyoo yaamarey nda nga ašariyawey bande.
7 Amma i sii nda ize, zama Elizabet manʼti kala woy gun, koyne mo ngi boro hinkaa kul jiirey boobo.
8 Han foo Zakarya goo ma nga sargari juwalyan goyoo tee Irkoy jine, hanoo din, nga borey goyoo zaaroo no.
9 Sargari juwalkey alaadaa ra, alkurraa kaŋ a ga, a huru ir Koyoo hugoo ra ka dugoo diinandi.
10 Jamaa kul cindi taray, i ga Irkoy ŋaaray waatoo kaŋ dugoo ga diinandi.
11 Dogoo din da ir Koyoo almalayka foo kaŋ ga kay dugu diinandidogoo caraw hennaa here, bangay Zakarya se.
12 Kaŋ a dii a kul, a jiti, a hunbur.
13 Amma almalaykaa nee a se: «Masi hunbur, Zakarya, zama ni ŋaarayroo taandi. Ni wandoo Elizabet ga duu ma ne izʼaru, nʼga maaɲoo daŋ Yehiya.
14 A ga tee ma ne haya kaŋ ga ni ɲaalandi ka ni binoo kaanandi, de boro boobo ga ɲaali nda nga hayyanoo.
15 A ga kaa ka tee boro beeri ir Koyoo jine. A si alaneb hari moora haŋ, a si harifutu haŋ. A ga too met nda Hundi Henanantaa za ɲaŋoo gundoo ra.
16 A ga Izirayel ize booboyaŋ yeeti ngi Koyoo Irkoy ga.
17 A ga tee dontokaw kaŋ ga dira Irkoy jine. Hundoo nda gaaboo kaŋ goo Ilyasu se goo a bande hala a ma baabey biney yeeti kate izey se, a ma taka tee kaŋ ra wey kaŋ ture ma miile sanda takaa kaŋ nda boro šerrantey ga miile. A ma jamaa kaŋ lilandi soolu ir Koyoo se.»
18 Zakarya nee almalaykaa se: «Taka foo nda ay ga bay kaŋ woo ga kaa ka tee? Zama aru žeena ti agay, ay wandoo mo jiirey boobo!»
19 Almalaykaa nʼa zaabi ka nee: «Agay ti Žibirila kaŋ ga kay Irkoy jine. Ya nka sanbandi hala ya duu ka šelaŋ ma ne ka alhabar boryaa woo har ma ne.
20 Nga ne, nʼga tee benbaw. Nʼsi yee ka hin ka šelaŋ kala han kaŋ hayey wey tee, zama mana naanay ay šenney kaŋ ga tee waatoo kaŋ a kayandi ra.»
21 Woo kul kaa ka gar jamaa goo ma Zakarya batu, boŋey haw nda haya kaŋ nʼa gayandi Irkoy hugoo ra.
22 Waatoo kaŋ a fatta, a mana hin ka šelaŋ i se. Borey faham kaŋ haya ka bangay a se Irkoy hugoo ra. Kaboo nda a ga šelaŋ i se, a cindi a ga benbaw.
23 Hanoo kaŋ nga goyoo zaarey ben, a willi nga hugoo do.
24 Woo banda ga, nga wandoo Elizabet tee boro hinka. A na handu guu tee a ga tugu, a ga nee nga boŋ se:
25 «Alhormo no kaŋ ir Koyoo nʼa tee ya ne, kaŋ a ɲeli ay ga kʼay haawoo benandi adamizey game.»
Almalayka na Isa hayyanoo bayrandi
26 Handu idduwantoo ra, Irkoy na almalaykaa Žibirila sanba Galile gandaa koyra foo ra kaŋ se i ga nee Nazaret,
27 woysoogo foo do kaŋ si aru bay, kurɲe wiroo maaɲoo ti Isufi kaŋ ti Dawda hugoo boro. Woysoogaa maaɲoo ti Maryama.
28 Almalaykaa huru a do, a nee a se: «Ay ga sallam ni ga, ni kaŋ duu alhormo, ir Koyoo goo ni bande.»
29 Maryama hanse ka alaabiina nda šennoo woo. A na nga boŋ hãa wala fooyan dumi foo ti woo.
30 Amma almalaykaa nee a se: «Maryama, masi hunbur, alhormo no kaŋ nʼduu a Irkoy do.
31 Nga ne, nʼga kaa ka tee boro hinka, nʼga izʼaru daŋ aduɲɲa ra, ma maaɲoo daŋ Isa (maanaa ‹ir Koyoo ti hallasiyan›).
32 A ga tee boro beeri, i ga nee a se Jerantaa Izʼaroo. Ir Koyoo Irkoy gʼa noo nga kaagaa Dawda kokoy fuulaa.
33 A ga Yakuba hugoo laama hala abada, de mo nga laamaa sii nda kaydoo.»
34 Maryama nee almalaykaa se: «Taka foo nda woo ga hin ka tee, zama ay si aru bay?»
35 Almalaykaa nʼa zaabi ka nee: «Hundi Henanantaa ga kaa ni ga, Jerantaa gaaboo ga nga biyoo ka ni gum. Woo se ize henanantaa kaŋ ga hayandi ga ciyandi Irkoy Izʼaroo.
36 Nga ne, ni baaba-izoo Elizabet mo tee boro hinka, a ga duu ize, ba kaŋ se a žen. Nga kaŋ se i ga nee woy gun, a sii kala nga handu idduwantoo ra,
37 zama haya kul sii no kaŋ ga mongu Irkoy se.»
38 Maryama nee: «Ay manʼti kala ir Koyoo koŋŋaa. Yala hayaa kaŋ nʼnʼa har ay ga ma tee.» Woo banda ga, almalaykaa koy.
Maryama naaru ka koy Elizabet do
39 Jirbey din da ra, Maryama tun ka koy nda cahãyan tondi hondey koyra foo ra kaŋ goo Žude gandaa ra.
40 Kaŋ a too koyraa ra, kul a huru Zakarya hugoo ra, a na Elizabet foo.
41 Za kaŋ a maa Maryama fooyanoo, izoo kaŋ goo gundoo ra sar, de Hundi Henanantaa na Elizabet too.
42 Elizabet na jinde jer ka kaati ka nee: «Albarka huru ni ra ka bisa woyey kul, izoo kaŋ goo ni gundoo ra mo duu albarka.
43 May ti agay hala nongu kaŋ ra ay Koyoo ɲaa ma kaa ay do?
44 Guna, waatoo kaŋ ay maa ni sallamyanoo, izoo kaŋ goo ay gundoo ra sar nda ɲaaliyan.
45 Nʼduu gomni, ni kaŋ naanay, zama hayey kaŋ ir Koyoo nʼi har ma ne ga tee.»
Maryama na Irkoy saabu
46 Woo banda ga, Maryama nee:
«Ay hundoo gʼir Koyoo jer,
47 ay binoo ga ɲaali ay Hallasikaa Irkoy se,
48 zama a na moo fur nga koŋŋaa yaada ga kaŋ ti agay.
Hõ banda ga, zamaney kul izey ga nee kaŋ ay duu gomni,
49 zama Gaabikoyoo na haya beeriyaŋ tee ya ne.
Nga maaɲoo ga henan.
50 Zaman ka kaa zaman,
a ga hinna nga hunburkey se.
51 A na nga kaboo ka goy gaabanteyaŋ tee:
a na boro binebeerey say,
52 a na borey kaŋ kone hinoo goo kaa fuulaa ra,
de a na borey jer kaŋ na ngi boŋ yeeti ganda.
53 A na heraykoyney kungandi nda haya hennayaŋ
ka almankoyney naŋ kabe koonu.
54 A na nga tamoo Izirayel faaba,
a honga nga hinnaroo
55 sanda takaa kaŋ nda a na har ir hayragey,
Ibirahima nda nga hayroo se hala abada.»
56 Woo banda ga, Maryama cindi Elizabet do haya kaŋ ga too handu hinza, a duu ka yee nga do.
Yehiya kaŋ ti batizekaa hayyanoo
57 Waatoo kaŋ ra Elizabet ga hima ka duu nga boŋ too, a duu izʼaru.
58 Nga taalammey nda nga borey maa kaŋ ir Koyoo hanse ka hinna a ga, i ɲaali a bande.
59 Jirbi yaahantoo hane i koy zankaa daŋbangu. I na maaɲoo daŋ Zakarya kaŋ ti baaboo maaɲoo.
60 Amma ɲaŋoo zaabi ka nee: «Kalaa, kalaa! Maaɲoo si ciyandi nda kala Yehiya.»
61 I nee a se: «Boro kul sii ni borey ra kaŋ ga maaɲoo woo goo.»
62 I šelaŋ baaboo se nda kabe kʼa hãa wala maa foo no a ga baa a ma huru zankaa ga.
63 Zakarya nee i ma kate walha, a hantum a ga ka nee: «Maaɲoo ti Yehiya.» Borey kul boŋey haw.
64 Dogoo din da miɲoo feera, deenoo hun denjiyanoo ga, de a šelaŋ ka albarka tee Irkoy se.
65 Ngi taalammey kul hunbur, de mo Žude gandaa tondi hondey kul ra hayey kul harandi kaŋ teendi.
66 Borey kul kaŋ maa hayey nʼi dii ngi biney ra, de i ga nee: «Macin no zankaa woo ga ti a?» Ir Koyoo goo a bande.
Zakarya na Irkoy saabu
67 Zakarya, zankaa baaba too met nda Hundi Henanantaa, de a na hayey har kaŋ ga kaa ka tee, a nee:
68 «Albarka ma bara ir Koyoo se kaŋ ti Izirayel Koyoo,
zama a na nga jamaa hawgay, a nʼa sawal.
69 A na hallasikaw gaabante fattandi ir se
nga tamoo Dawda hugoo ra,
70 sanda takaa kaŋ a nʼa har za alwaatey kul ra
nda annabi henanantey miɲey,
71 kaŋ ir hallasiroo gʼir kaa ir iberey
nda borey kul kaŋ ga konna ir, kabey ra.
72 Takaa woo nda a hinne ir hayragey ga,
de a mana dirɲa nga amaana henanantaa,
73 zama a nka žee ir kaagaa Ibirahima se
kaŋ nga ga doonandi ir se,
74 ir ma nga gana bila hunburay,
waati kaŋ nga nʼir kaa ir iberey kabey ra.
75 Ir ma dira nga jine ir hunaroo kul ra
henanyan nda šerretaray ra.
76 Ni, zanka kaccaa, i ga nee ma ne annabi kaŋ hun Jerantaa do,
zama nʼga kaa ir Koyoo jine ka nga fondaa hanse,
77 hala ma nga jamaa bayrandi
kaŋ zunubey yaafaa ra hallasiyan goo.
78 Zama Irkoy hanse ka hinna ir ga,
woo se a ga gaay fattandi ir se
kaŋ ga hima nda waynaa
kaŋ ga fatta beenaa ra,
79 ka borey kaŋ goo kubaa ra
nda wey kaŋ goo buuyan fondaa ra noo gaay,
kʼir cee diraa gongu alaafiyaa fondaa ga.»
80 Zanka kaccaa ga beeri, de nga lakkaloo ga tonton. A cindi saajoo ra hala hanoo kaŋ ra a kaa ka nga boŋ bayrandi Izirayel se.