20
Man ra Isa duu nga hinoo?
(Matiyu 21.23–27; Marku 11.27–33)
Zaarey din affoo, Isa goo ma jamaa cawandi Irkoy hugu beeroo ra, a ga Alhabar Boryaa toonandi kaŋ sargari juwalkey jineborey, nda Citaaboo baykey, nda boro beerey kaa a do. I šelaŋ a se ka nee: «Hinoo har ir se kaŋ nda nʼga wey tee, wala mo, may no ka ni noo hinoo woo?» A nʼi zaabi ka nee: «Agay mo ga war hãa nda haya foo. Wa tuuru ya ne: Yehiya batizeyanoo, beenaa ra a hun wala adamizey do?» I šelaŋ-šelaŋ cere game ka nee: «Nda ir nee: ‹Beenaa ra›, a ga nee: ‹Macin se war mana naanay a?› Nda ir nee mo: ‹Adamizey›, alžamaa kul ga tondi kʼir warra kʼir wii. Zama i ga naanay ka bay kaŋ Yehiya manʼti kala annabi.» I nʼa zaabi ka nee: «Ir si bay nongu kaŋ ra a hun.» Isa nee i se: «Agay da si hinoo har war se kaŋ nda ay ga wey tee.»
Alaneb faaroo beerikey filla yaasayantaa
(Matiyu 21.33–46; Marku 12.1–12)
Woo banda ga, Isa yee ka sintin ka filla yaasayantaa woo deede jamaa se. A nee: «Aru foo na alaneb faari tee. A nʼa naŋ beerikawyaŋ kone, de a naaru ka waati kuku tee. 10 Waatoo kaŋ hegaa too, a na tam foo sanba beerikey do hala i mʼa noo faari-izey ra. Amma beerikey nʼa kar, kʼa gaaray a ma koy kabe koonu. 11 A yee koyne ka tam foo sanba. Nga mo, i nʼa kar, kʼa kaynandi, kʼa gaaray a ma koy kabe koonu. 12 A yee ka ihinzantoo sanba. Nga mo, i nʼa maray, i nʼa warra taray. 13 Faaroo koyoo nee: ‹Macin no ay gʼa tee? Ay gʼay izʼaroo, ay baakaa sanba. A ga hin ka tee, i ma nga hunday beerandi.› 14 Amma kaŋ beerikey dii a, i šelaŋ-šelaŋ cere game ka nee: ‹Woo ti tubukaa. Ir mʼa wii hala tubuhayaa ma tee ir wane.› 15 I nʼa warra taray kʼa kaa faaroo ra, i nʼa wii. Sohõ macin no faaroo koyoo gʼa tee i se? 16 A ga kaa ka beerikey wey halaci ka faaroo yeeti itanayaŋ se.» Waatoo kaŋ haŋajerkey maa woo, i nee: «Jam!»
17 Amma Isa na moo fur i ga, a nee: «Macin ti šennoo kaŋ hantumandi Citaaboo ra maanaa kaŋ ga nee:
‹Tondoo kaŋ cinakey nʼa fur,
nga no ka tee hugoo kanjoo tondoo›*?
18 Boro kul kaŋ kaŋ tondoo din boŋ ga say.
Boro kaŋ ga a kaŋ ga motti.»
19 Citaaboo baykey nda sargari juwalkey jineborey ceeci ngi mʼa dii alwaatoo din da, amma i hunbur jamaa. I bay kaŋ filla yaasayantaa woo kaŋ a nʼa deede, ngi ga a goo.
Alkaasoo kaŋ ga banandi kokoy beeroo se
(Matiyu 22.15–22; Marku 12.13–17)
20 I ga Isa koroši. I na korošikaw almunafiki fooyaŋ kaŋ ga ngi boŋ tee boro šerranteyaŋ, sanba a do, i mʼa dii nda nga meešennoo hala ngi mʼa nondi hinoo nda goforneroo se. 21 Kaŋ i too a do, i nʼa hãa ka nee: «Alfagaa, ir ga bay kaŋ fondaa nda nʼga šelaŋ, nʼga cawandi. Nʼsi ndum guna, ni mma Irkoy fondaa cawandi nda cimi. 22 A ga hima ir ma alkaasi bana kokoy beeroo se wala a si hima?» 23 Isa bay ngi carmaa ga, a nee i se: 24 «Wʼay cebe nzorfu kaaray tamma foo. Boraa kaŋ biyoo nda maaɲoo goo a ga, may no?» I nee a se: «Kokoy beeroo.» 25 A nee i se: «Adiši wa kokoy beeroo hayey noo kokoy beeroo se, Irkoy waney, war mʼi noo Irkoy se.» 26 I mana hin ka šenni futu dii miɲoo ra jamaa jine. Nga zaaboo na boŋey haw, i dangay.
Hãayan bukawey tunyanoo ga
(Matiyu 22.23–33; Marku 12.18–27)
27  Sadusiyeŋey kaŋ ga nee tunyan si bara, boro fooyaŋ i ra man Isa kʼa hãa 28 ka nee: «Alfagaa, Musa na yaamar hantum ir se ka nee: ‹Nda aru kaŋ goo nda wande buu, woyoo mana duu a se ize, aroo armaa ga hima ka hiiji woyoo hala a ma duu bukaa se ize.› 29 Nga binde, arma iyye bay ka bara kaŋ ijinaa hiiji, a buu bila ize. 30 Arma hinkantoo hiija woyoo, 31 ihinzantoo hiiji a. Takaa din da, iyyaa kul hiija woyoo affoo-foo, i buu, i mana ize naŋ. 32 Woo banda ga, woyoo mo buu. 33 Adiši woyoo woo, tunyanoo hane, iyyaa ra, may se a ga tee wande? Zama ngi boro iyyaa hiiji woyoo ka bisa.»
34 Isa nee i se: «Zamanoo woo arey ga hiiji, woyey ga nondi hiijay. 35 Amma wey kaŋ ga hima ka dii zamanoo kaŋ goo kaa nda bukawey tunyanoo, wey din si hiiji, woyey si nondi hiijay. 36 I si hin ka buu koyne, zama ngi nda almalaykey kul ga sawa. I ga tee Irkoy izeyaŋ, zama i ga tun. 37 Bukawey ma tun, woo ti hayaa kaŋ Musa nʼa bayrandi saabayɲaŋoo ga, waatoo kaŋ a gʼir Koyoo cee ka nee a se: ‹Ibirahima Koyoo, Isiyaka Koyoo, Yakuba Koyoo.› 38 Irkoy manʼti bukawey Koyoo, baahunantey Koyoo no, zama nga se, borey kul ga huna.» 39  Citaaboo baykey affooyaŋ na šennoo zaa ka nee: «Alfagaa, ni šelaŋ ka boori.» 40 I mana yadda kʼa hãa nda haya kul koyne.
Dawda yadda Almasihu ga sanda nga Koyoo
(Matiyu 22.41–46; Marku 12.35–37)
41 Isa yee ka nee i se: «Taka foo nda i ga nee Almasihu manʼti kala Dawda Haamaa? 42 Dawda hunday bayrandi Zabur citaaboo ra ka nee:
‹Ir Koyoo nee ay Koyoo se:
“Goro ay kabe hennaa here,
43 hala waati kaŋ ra ay na ni iberey tee taari
kʼi daŋ ni cewey cire.”›§
44 Adiši Dawda gʼa cee nda Koy, taka foo nda a ga tee a se Haama?»
Wa hawgay Citaaboo baykey ga
(Matiyu 23.1–36; Marku 12.38–40)
45 Waatoo kaŋ jamaa kul goo ma haŋajer Isa se, a nee nga taalibey se: 46 «Wa war boŋ hawgay Citaaboo baykey ga kaŋ ga baa kaayi beeri daŋyaŋ ka yaara. I ga baa borey ma ngi foo nda beeray farrey ra. I ga baa mo jine gorodogey margahugey ra nda ŋaadogey ra. 47 I ga woyey kaŋ kurɲey faati kabey koonandi. Nda i ga Irkoy ŋaaray, i si cahã ka ben hala borey ma dii ngi. Ngi zukandoo ga hanse ka boobo.»
* 20:17 20.17 Zabur 118.22. 20:28 20.28 Alhukumoo 25.5–6. 20:37 20.37 Fattaroo 3.6, 15. § 20:43 20.43 Zabur 110.1.