Linžiloo kaŋ Matiyu nʼa hantum
Citaaboo fahamandiroo
Isa Almasihu taaliboo kaŋ maaɲoo ti Matiyu, i ga nee a se mo Lewi no ka citaaboo woo hantum. Nga goyoo manʼti kala alkaasidiiyan, a nʼa naŋ ka hanga Isa. Waatoo kaŋ Isa koy beenaa ra banda ga, Matiyu na Isa teegoyey hantum ka Alyahuudey bayrandi boro kaŋ ti Isa Almasihu.
Za zaman Alyahuudey ga boraa kaŋ Irkoy nʼa suuba kaŋ ti ngi Hallasikaa batu. Za gayyan Irkoy diyawey na Hallasikaa kaayanoo silbawey bayrandi. Matiyu citaaboo ga cebe kaŋ zanka taanaa kaŋ maaɲoo ti Isa kaŋ hayandi Betelehem koyraa ra ti Hallasikaa.
Matiyu ga cebe mo kaŋ Isa ti Alyahuudey kokoyoo kaŋ na Irkoy Laamaa sintin laboo ga. A na tammaasa kayfanteyaŋ tee ka nga hinoo cebe.
Matiyu citaaboo ga Isa cawandoo zamna zamna guu:
1. Tondi hondoo boŋ waazoo.
2. Hayey kaŋ Isa nʼi har borey se kaŋ ga hima ka Irkoy Laamaa šennoo waazu.
3. Irkoy Laamaa sirrey.
4. Takaa kaŋ nda Irkoy Laamaa borey ga huna cere ra.
5. Takaa kaŋ nda boro ga Irkoy Laamaa hinoo batu.
Citaaboo woo ra ir ga dii kaŋ Isa buuyanoo nda nga tunyanoo ga cebe kaŋ a goo nda hini zunubu nda buuyan ga.
1
Isa Almasihu kaagey
(Luka 3.23–38)
1 Isa Almasihu assiloo taarikoo ti woo. Isa manʼti kala Dawda Haamaa, Dawda mana hun kala Ibirahima ga.
2 Ibirahima na Isiyaka hay. Isiyaka na Yakuba hay. Yakuba na Žuda nda nga armey hay.
3 Žuda na Peres nda Zera hay Tamar ga. Peres na Hesroŋ hay. Hesroŋ na Aram hay.
4 Aram na Aminadab hay. Aminadab na Nahišoŋ hay. Nahišoŋ na Salmuni hay.
5 Salmuni na Bowazu hay Rahab ga. Bowazu na Obed hay Rutti ga. Obed na Yišay hay.
6 Yišay na Dawda hay kaŋ ga kaa ka tee kokoy.
Dawda na Sulaymaana hay Uri wandoo ga.
7 Sulaymaana na Roboham hay. Roboham na Abiya hay. Abiya na Azaf hay.
8 Azaf na Žozafat hay. Žozafat na Žoram hay. Žoram na Oziyas hay.
9 Oziyas na Yotam hay. Yotam na Akaz hay. Akaz na Ezekiyas hay.
10 Ezekiyas na Manase hay. Manase na Amoŋ hay. Amoŋ na Žosiyas hay.
11 Žosiyas na Žožakin nda nga armey hay Babiloŋ koyyanoo waati.
12 Babiloŋ koyyanoo banda ga, Žožakin na Šaltiyel hay. Šaltiyel na Zorobabel hay.
13 Zorobabel na Abihud hay. Abihud na Eliyakim hay. Eliyakim na Azor hay.
14 Azor na Sadok hay. Sadok na Ašim hay. Ašim na Eliyud hay.
15 Eliyud na Eleyazar hay. Eleyazar na Mataŋ hay. Mataŋ na Yakuba hay.
16 Yakuba na Isufi hay. Isufi ti Maryama kurɲoo. Maryama ga Isa hun kaŋ se i ga nee Almasihu.
17 Zamaney kul, kʼa dii za Ibirahima ga ka koy Dawda ga manʼti kala zaman woy cindi taaci (14). Za Dawda ka koy hala Babiloŋ koyyanoo ga manʼti kala zaman woy cindi taaci (14). Babiloŋ koyyanoo hala Almasihu ga manʼti kala zaman woy cindi taaci (14).
Isa Almasihu hayyanoo
(Luka 2.1–7)
18 Takaa ne kaŋ nda Isa Almasihu huru aduɲɲa ra. Maryama kaŋ ti ɲaŋoo, kurɲe wiroo ti Isufi. I mana gorokasinay kaŋ a na gunde zaa Hundi Henanantaa hinoo ra.
19 Isufi, nga kurɲe wiroo manʼti kala boro šerrante, a si baa nga ma moo kayandi a ga, woo se a baa nga mʼa naŋ tuguyan ra.
20 A goo ma miile kaŋ ir Koyoo almalayka foo ne ka bangay a se handiri ra ka nee a se: «Isufi, Dawda haamaa masi hunbur ka Maryama zaa, a ma tee ma ne wande, zama gundoo kaŋ a nʼa zaa, Hundi Henanantaa hinoo kʼa tee.
21 A ga izʼaru hay, de ma maaɲoo daŋ Isa (maanaa ‹ir Koyoo ti hallasiyan›), zama nga no ma nga jamaa hallasi ngi zunuboo ra.»
22 Woo kul teendi hala hayaa kaŋ ir Koyoo na annaboo donto a mʼa har ma tabati, a nee:
23 «Nga ne, hondiyaa ga gunde zaa, a ga izʼaru hay,
i ga maaɲoo daŋ Emanuwel»
kaŋ maanaa ti «Irkoy goo ir gamey ra».
24 Kaŋ Isufi tun jirboo ra, a nʼir Koyoo almalaykaa yaamaroo tee ka nga wande wiroo dii.
25 A mana gorokasinay nda a hala a na izʼaroo hay, a na maaɲoo daŋ Isa.