24
Isa na Irkoy hugu beeroo kayriyanoo bayrandi
(Marku 13.1–2; Luka 21.5–6)
1 Waatoo kaŋ Isa goo ma fatta Irkoy hugu beeroo ra ka koy, nga taalibey man a ka hugey kaŋ goo Irkoy hugu beeroo ra cebe a se.
2 A nʼi zaabi ka nee: «War ga dii woo kul? Cimoo ne kaŋ ay gʼa har war se, tondi foo si cindi affoo boŋ kaŋ si kaa ka kayra.»
Isa na gurzugawey sintinoo bayrandi
(Marku 13.3–13; Luka 21.7–19)
3 Woo banda ga, kaŋ Isa goro Zaytuɲaŋey tondi hondoo boŋ, nga taalibey man a jere ga ka nee: «Waatoo har ir se kaŋ a ga tee, de mo macin ti ni kaayanoo nda zamanoo benantaa tammaasaa?»
4 Isa nʼi zaabi ka nee: «Wa hawgay boro kul masi war darga,
5 zama boro booboyaŋ ga kaa ay maaɲoo ga ka nee kaŋ ngi ti Almasihu, de mo i ga boro boobo darga.
6 War ga kaa ka maa wonguyaŋ nda wongu alhabaryaŋ, wa war boŋ hawgay war masi hunbur. Kala wey ma teendi, amma hala sohõ manʼti benantaa no.
7 Ganda foo ga tun ka ganda foo wongu, laama foo ga tun ka laama foo wongu. Herayyaŋ nda labu jijiriyaŋ ga tee nongu boobo ra.
8 Wey kul manʼti kala sintinoo, i ga hima nda hayyan kuubi jina-jinawey.
9 Waatoo woo, i ga war nondi zarabiyan se, i ga war wii, gandawey kul ga konna war ay maaɲoo sabbu se.
10 Alwaatoo woo, boro boobo ga murti, i ga cere nondi, i ga konna cere.
11 Taari annabi boobo ga tun ka boro boobo darga.
12 Goy futu teeyanoo booboyanoo se, boro boobo bajoo ga yee ganda.
13 Amma boro kaŋ gaabandi hala benantaa ga, a ga hallasi.
14 LaamaaAlhabar Boryaa woo ga waazandi aduɲɲa kul ra ka seedetaray tee gandawey kul se. Woo banda ga, benantaa no.»
Isa na zarabi beeroo waatoo bayrandi
(Marku 13.14–23; Luka 17.23–24, 37; 21.20–24)
15 «Waati kaŋ war ga dii ‹haya harramantaa› kaŋ annabi Daniyel nʼa har ga goro nongu henanantaa ra. Boro kaŋ gʼa caw ma faham!
16 Waatoo din borey kaŋ goo Žude gandaa ra ma zuru ka koy tondi hondey ra.
17 Boro kaŋ goo sooro boŋ masi zunbu ka hayey zaa kaŋ goo nga hugoo ra.
18 Boro kaŋ goo faarey ra masi yee ka koy nga burmusoo zaa.
19 Woyey bone kaŋ ga tee boro hinka nda wey kaŋ ga naanandi haney din.
20 Wa Irkoy ŋaaray hala war zuruyanoo masi tee jiyaw ra wala hunanzam zaari hane.
21 Zama waatoo din zarabi beeri ga tee kaŋ cine mana bay ka tee za aduɲɲa sintinoo ga hala sohõ. Šikka sii nga cine si yee ka tee.
22 Nda a gar haya nka mana kumandi zaarey din ra, boro kul si hallasi. Amma Irkoy boro suubantey maaganda se haya ga kumandi zaarey din ra.
23 Nda boro nee war se: ‹Almasihu ne, ne ra› wala: ‹Nga ne›, war masi naanay.
24 Zama taari almasihuyaŋ nda annabiyaŋ ga tun. I ga tammaasa beeriyaŋ nda kayfiyaŋ tee hala, nda a ga hin ka tee, ngi ma Irkoy boro suubantey mo darga.
25 Nga ne, ay na war haŋa žiibey kaa.
26 Adiši nda i nee war se: ‹Nga ne saajoo ra›, war masi koy, ‹Nga ne hugoo kunehere›, war masi naanay.
27 Zama takaa kaŋ nda meloo ga dii waynahunay ka koy hala waynakaŋay, takaa din no Boraa kaŋ tee Adamize kaayanoo hane.
28 Nongoo kaŋ ra bukaa goo, no din ra dutaley ga marga.»
Boraa kaŋ tee Adamize kaayanoo
(Marku 13.24–27; Luka 21.25–28)
29 «Dogoo din da zaraboo haney din banda ga,
waynaa ga tee kubay,
handoo si nga gaayoo noo,
handarawey ga kaŋ ka hun beenaa ra,
beenaa hayey ga jijiri.
30 Waatoo din Boraa kaŋ tee Adamize tammaasaa ga bangay beenaa ra. Aduɲɲa alkabiilawey kul ga binehẽenay, de i ga dii ‹Boraa kaŋ tee Adamize ga kaa duulawey ga ka hun beenaa ra› nda gaabi nda darža beeri.
31 A ga nga almalaykey sanba nda laati beeri hẽeni beeri hala i ma nga boro suubantey marga ka hun gandaa kanje taacaa kul ga aduɲɲa boŋ foo ga ka koy boŋ faa ga.»
Bayraa kaŋ jeejayɲaŋoo gʼa noo
(Marku 13.28–31; Luka 21.29–33)
32 «Wa faham bayraa se kaŋ jeejayɲaŋoo gʼa noo. Za tuuroo kabey subey ban, i na fita taagayaŋ tee, war ga bay kaŋ konnoo waatoo man.
33 Takaa din da, war mo, nda war dii hayey wey kul, war ma bay kaŋ a man, a goo koyraa miɲoo ga.
34 Cimoo ne kaŋ ay gʼa har war se, zamanoo woo borey si ben hala hayey wey kul ma teendi.
35 Beenaa nda gandaa ga dere, amma ay meešenney si dere abada.»
Wa hanna cijin nda zaari
(Marku 13.32–37; Luka 17.26–30, 34–36; 21.34–36)
36 «Boro kul si hanoo wala waatoo bay kaŋ hayey wey ga kaa ka tee. Almalaykey kaŋ goo beenaa ra sʼa bay, Izʼaroo sʼa bay, Baaba Irkoy hinne no ma waatoo bay.
37 Hayaa kaŋ tee Nuhu zaarey hane, takaa din da no ma tee Boraa kaŋ tee Adamize kaayanoo ga.
38 Haney kaŋ hari beeroo mana kaa, borey ga ŋaa i ga haŋ, i ga hiiji i ga ngi izey hiijandi hala hanoo kaŋ Nuhu huru sunduku beeroo ra kaŋ tee harihii.
39 I mana haya kul bay hala waatoo kaŋ ra hari beeroo kaa kʼi kul tuusu. Takaa woo da cine no ma tee Boraa kaŋ tee Adamize kaayanoo ga.
40 Waatoo woo, boro hinka kaŋ goo faari ra, affaa ga zandi, affaa ga naŋandi.
41 Woy hinka kaŋ ga fufu fufutondi ga, affaa ga zandi, affaa ga naŋandi.
42 Adiši wa hanna cijin nda zaari, zama war si bay han kaŋ no war Koyoo ga kaa.
43 War ma haya foo bay kaŋ ti, nda a gar hugukoy ga bay waatoo kaŋ ga zayoo ga kaa, a ga hanna, a si naŋ a ma nga hugoo kayri.
44 Woo se war mo ma soolu, zama waatoo kaŋ war sʼa hongu ra Boraa kaŋ tee Adamize ga kaa.»
Tam dumi hinkaa
(Luka 12.41–48)
45 «May ti tam laadirante lakkalkoynoo kaŋ nga koyoo gʼa daŋ nga borey jine hala a mʼi noo ŋaayan waatoo ra kaŋ ga hima?
46 Tamoo din duu gomni kaŋ nga koyoo kaayanoo ga, a gʼa gar a ga takaa woo tee.
47 Cimoo ne kaŋ ay gʼa har war se, a gʼa daŋ nga almaanoo kul jine.
48 Amma nda tam laala no, a nee nga binoo ra: ‹Ay koyoo ga gay›,
49 nda a sintin ka nga tam hangasiney kar, ka ŋaa ka haŋ harifutu haŋkey bande,
50 tamoo woo koyoo ga kaa zaari kaŋ a sʼa hongu ra nda waati kaŋ a sʼa bay ra.
51 A gʼa zukandi futu ka nga nda almunafikey tee affoo. No din ra hẽeni nda hiɲekaamayan ga tee.»