24
1 Balam dii kaŋ a ga kan Abadantaa se nga ma gaara Izirayel jamaa se. A mana koy sanda cee jinawey kaŋ a ga nee nga mma koy gunandi. A bere ka saajoo tenje.
2 Balam na nga boŋoo jer, de a ga dii Izirayel borey ga goro alkabiila nda alkabiila. Waatoo din Irkoy Hundoo kaa Balam ga.
3 Balam na nga yaasay šennoo har ka nee:
«Balam, Bewor izʼaroo šennoo ti woo,
aroo kaŋ moɲey hay šennoo ti woo.
4 Boraa kaŋ ga maa Irkoy šenney, šennoo ti woo,
boraa kaŋ ga dii Hini-kul-koyoo bangayyanoo,
boraa kaŋ ga sujudu, de moɲey ga feera.
5 He Yakuba, ni hukkumey ga boori,
ni gorodogey ga boori, Izirayel.
6 I ga koy ni mma nee hari beeri bisadoo,
sanda saddiŋayaŋ kaŋ goo isa mee ga,
sanda alowe dumariyaŋ kaŋ Abadantaa nʼi duma,
sanda sedere tuuriyaŋ kaŋ goo haroo miɲoo bande.
7 Hari no ma doo ka hun nga sowey ra,
nga dumiyoo, hari beeriyaŋ no mʼa haŋandi.
Nga kokoyoo goo kokoyoo Agag se boŋ,
nga laamaa goo ma duu gaabi.
8 Irkoy nʼa fattandi Misira gandaa ra,
a ga hima nda ganjihaw hilley.
A goo ma nga nkuwawey gandawey derandi,
a goo ma birey kayri,
a goo mʼi hay nda nga birawey.
9 A ga gunguma, a ga kani sanda ganjihayla aru, sanda ganjihayla woy.
May no ma yadda kʼa tunandi?
Albarka ma huru boraa ra kaŋ ga gaara ma ne,
boraa ma laali kaŋ ga ni danga.»
10 Balak futu Balam ga. A na nga kabey kar cere ga ka nee Balam se: «Ya nka ciya ma ne hala mʼay iberey danga, amma ni ne ka gaara i se kaaray hala cee hinza.
11 Sohõ zuru ka koy ni do, ay nee kaŋ ay ga beeray doori ni boŋ, amma Abadantaa na daržaa woo ganji ma ne.»
Balam na daržaa har kaŋ Izirayel borey ga kaa ka duu a
12 Balam nee Balak se: «Ay mana šelaŋ ni dontokey se kaŋ nʼnʼi sanba ay do ka nee:
13 ‹Ba nda Balak nʼay noo nga hugoo mee foo nzorfu kaaray nda wura, ay si hin nda ay boŋ ka Abadantaa yaamaroo hoo ka ihenna wala ilaala tee. Haya kaŋ Abadantaa nʼa har, nga no ay gʼa har.›
14 Sohõ ay ga koy ay jamaa here. Kaa, ay a ga hayaa har ma ne kaŋ jamaa woo ga kaa kʼa tee ni jamaa se waatey kaŋ ga kaa ra.»
15 Balam na nga yaasay šennoo har ka nee:
«Balam, Bewor izʼaroo šennoo ti woo,
aroo kaŋ moɲey hay šennoo ti woo.
16 Boraa kaŋ ga maa Irkoy šenney, šennoo ti woo,
boraa kaŋ ga Jerantaa bayraa bay,
boraa kaŋ ga dii Hini-kul-koyoo bangayyanoo,
boraa kaŋ ga sujudu, de moɲey ga feera.
17 Ay ga dii a, amma manʼti sohõ da,
ay gʼa gaaya, amma manʼti nda maanay.
Handaray fatta Yakuba ra,
kokoy gobu fatta Izirayel ra.
A ga Mowab borey kar lakkaley ga kʼi say,
a ga Seti izey kul kar boŋkurunbey ga kʼi say.
18 A hin Edom gandaa kʼa tee nga wane,
a hin nga iberoo kaŋ ti Seyir gandaa kʼa tee nga wane.
Izirayel ga gaabi beeri fattandi.
19 Boraa kaŋ fatta Yakuba ra no ma goro hinoo ra.
Koyraa baahunantey kaŋ cindi, a gʼi halaci.»
Balam na Izirayel jamaa iberey halaciroo har
20 Balam dii Amalek, a na nga yaasay šennoo har ka nee:
«Amalek bisa gandawey kul,
amma nga kokoroo manʼti kala a ma dere.»
21 Balam dii Keni borey, a na nga yaasay šennoo har ka nee:
«Ni gorodogoo ga gaabi,
ni tejoo sii kala tondi boŋ.
22 Amma Keni borey ga tonandi ka tee boosu
waati kaŋ Ašur ga ni daŋ baɲɲataray.»
23 Balam na nga yaasay šennoo har ka nee:
«Woo ti bone. May no ma huna waati kaŋ Irkoy na woo tee?
24 Amma harihii beeriyaŋ ga kaa ka hun Kitim gandaa ra,
i ga žigi ka koy Asiri borey ga,
i ga žigi ka koy Eber borey ga,
ngi mo ga dere.»
25 Woo banda ga, Balam tun ka koy, a willi nga do, Balak mo na nga fondaa zaa ka koy.