2
Almasihu na nga boŋ yeeti ganda ka duu beeray
Sohõ, nda binekanay ga duwandi Almasihu bande, nda bineyaynay goo kaŋ hun baji ra, nda war nda Irkoy Hundoo tee affoo, nda hinneyan nda tamalla goo, wʼay ɲaaloo tabatandi ka tee bine foo, ka tee baji foo, ka tee affoo, ka tee honguyan foo. War masi haya kul tee nda alhaasiditaray, wala nda foomataray, amma boŋ yeeti gandayan ma kate war affoo kul ma nga ceroo guna sanda boro kaŋ bisa nga. War masi war boŋ guna, amma boro foo kul ma borey jerey [mo] guna. Wa honguyanoo woo dii war game kaŋ goo Almasihu Isa mo se,
nga kaŋ nga nda Irkoy ga hima,
a mana ceeci nga ma sawa nda Irkoy nda gaabi.
Amma a nka nga boŋ tee yaada
ka hima nda tam,
ka nga boŋ himandi adamize,
a garandi mo kaŋ adamize no.
A na nga boŋ yeeti ganda
ka haŋajer hala buuyanoo ga,
kanjandibundoo buuyanoo.
Woo maaganda se Irkoy hanse kʼa jer*
kʼa noo maa kaŋ bisa maaɲey kul,
10 hala beenaa hayey, nda laboo boŋ hayey, nda laboo cire hayey kul
ma kanje sonbu Isa maaɲoo se.
11 De mo deene kul ma nee kaaray
kaŋ nga Koyoo ti Isa Almasihu
ka Baaba Irkoy beerandi.
Hayaa kaŋ ganakey ga hima kʼa tee
12 Adiši, ay baakey, war kaŋ hanga fondaa waati kul, manʼti waati kaŋ ay goo war game hinne, amma sohõ kaŋ ay sii war game war ma hanse ka hanga a ka tonton. Wa war hallasiroo goyoo tee nda hunburay nda jijiriyan, 13 zama Irkoy no ma goy war ra ka war noo anniyaa nda takaa kaŋ nda war mʼa tee nda woo kaŋ ga kan a se. 14 Haya kul kaŋ war gʼa tee wʼa tee bila ŋuunuŋuunu bila kakaw. 15 War ma duu ka tee boroyaŋ kaŋ ga taali sii, boroyaŋ kaŋ ga henan, Irkoy izeyaŋ kaŋ ga laybu sii zamankasinay golbante ra kaŋ ga Irkoy hoo kaŋ gamey ra war ga tee sanda gaayyaŋ kaŋ ga dii aduɲɲa ra 16 ka hunayan šennoo har i se. Woo ra ay ga fooma nda war Almasihu zaaroo hane. Ay mana gaarandi yaada, ay mana taabi yaada.
17 Ba nda ay tee sanda haya hari-hari ka munandi ka tee sargari hari-hari kaŋ ga doori sargaroo boŋ kaŋ ti war naanaa goyoo, a ga tee ya ne ɲaali, ay ga ɲaali war kul bande. 18 Taka follokaa, war mo ma ɲaali, war ma ɲaali ay bande.
Timote nda Epafrodit ga sanbandi Filipi koyraa ra
19 Ay naataa goo ir Koyoo Isa ra kaŋ ne nda kayna ay ga Timote sanba war do hala war alhabarey mʼay binoo daŋ. 20 Ay sii nda boro kul kaŋ agay nda a ga tee lakkal foo ka alhuzun nda cimi war misoo se nda manʼti nga hinne. 21 Borey jerey kul, ngi boŋ nda i ga alhuzun, manʼti Isa Almasihu hayey. 22 War hunday ga bay kaŋ Timote na nga laadirtaraa cebe, a goy ay bande Alhabar Boryaa se sanda ize kaŋ ga goy baaboo se. 23 Ay ga tammahã yʼa sanba war do za ay dii ay misoo takaa. 24 Amma ay ga naanay ir Koyoo ka bay kaŋ ne nda kayna agay hunday ga kaa.
25 Ay dii kaŋ a ga hima ya agʼarmaa Epafrodit yeeti war ga, ay goykasinaa no, ay hangasinoo no tangamyanoo ra. War nʼa donto ay do a mʼay noo hayey kaŋ ga ay ga too. 26 A ga hanse ka faaji war se, binoo maray kaŋ a maa kaŋ war maa nga wircoo. 27 Cimi no a wirci hala nongu kaŋ ra a baa ka buu, amma Irkoy hinna a ga, manʼti nga hinne se a hinna, a hinna agay mo ga, hala binemarayyan masi koy tonton ay binemaraa ga. 28 Ay goo mʼa sanba nda cahãyan hala nda war dii a, a ma tee war se ɲaali, haya ma hun ay binemaraa ra. 29 Wʼa kubay nda ɲaali timmante ir Koyoo albarkaa ra, wa borey wey dumey beerandi, 30 zama Almasihu goyoo maaganda se a baa ka buu, a na nga hundoo farratandi ka kate ya ne hayaa kaŋ war si hin kʼa ka too ay do.
* 2:9 2.9 Ezayi 52.13; 53.12. 2:11 2.10–11 Ezayi 45.23. 2:16 2.16 «ka hunayan šennoo har i se», Grek šenni ra, almaganaa faa ti «ka gaabu hunayan šennoo ga».