16
1 Adamize ga haya kayandi nga binoo ra nga mʼa tee,
amma zaaboo kaŋ Abadantaa miɲoo nʼa noo no ma teendi.
2 Adamize ga hongu kaŋ nga fondawey kul ga henan,
amma Abadantaa ma haya bay kaŋ goo hundi ra.
3 Ni teegoyey talfi Abadantaa ga,
nga ra ni goyey ga boori.
4 Haya kul kaŋ Abadantaa nʼa tee goo nda addalil,
ba boro futu, a manʼa tee kala bone zaari se.
5 Binebeeritaray kul manʼti kala almuhal Abadantaa do,
šikka kul sii kaŋ a si goro a mana zukandi.
6 Borohennataray nda cimi ga kate laybu ma yaafandi,
Abadantaa hunburaa ga kate boro ma mooru ifutu.
7 Nda Abadantaa yadda boro fondawey ga,
a ga kate ba nga iberey ma waafaku nda a.
8 Duuray kayna nda šerretaray baa
duuray boobo nda šerretaray jaŋay.
9 Adamize binoo no ma nga fondaa hanse,
Abadantaa no ma nga diraa gongu.
Kokoyey šennoo
10 Kokoy šenni ga hima nda gunandi šenni,
a si dere ciiti ra.
11 Neešihaya henna nda nga jinawey manʼti kala Abadantaa wane,
neeši tondey kul manʼti kala nga almuraadoo.
12 Boro laaley teegoyey manʼti kala almuhal kokoyey se,
zama šerretaray no ma kokoytaray tabatandi.
13 Šenni šerrante ga kan kokoyey se,
i ga baa boro kaŋ ga šelaŋ nda cimi.
14 Kokoy futayyanoo manʼti kala buuyan dontokaw,
lakkalkoyni ga kokoyoo binoo kanandi.
15 Nda kokoyoo ndumoo ga feeri, hunayan no,
nga alhormaa ga hima nda ncirɲi henna duula.
16 Boro ma duu lakkal baa wura,
boro ma duu fahamay baa nzorfu kaaray.
17 Boro šerrantey fondaa ti ka hibi ifutu ga,
boro kaŋ ga lakkal daŋ nga fondaa se
ga nga hundoo hawgay.
18 Binebeeray banda ga, halaciyan ga kaa,
bolsay banda ga, kaŋyan ga kaa.
19 Boro ma nga boŋ yeeti ganda
ka bara borey kaŋ ga ngi boŋ yeeti ganda bande,
bisa ma alganiima zamna binebeeriyaŋ bande.
20 Boro kaŋ ga faham hayey se ga duu gomni,
boraa duu gomni kaŋ ga nga naanaa daŋ Abadantaa ra.
21 Bine lakkalkoyni no i gʼa cee fahamante,
šenni henna mo ga bayray tonton.
22 Boro kaŋ goo nda fahamay
goo nda haya kaŋ ga hunayan noo,
saama, nga saamataraa no mʼa gooji.
23 Lakkalkoyni binoo gʼa waanandi šenni,
nga šenney ra boro ga dii kaŋ nga bayraa tonton.
24 Šenni kaana ga hima nda yuu,
kaani no kormollo se, safari no gaaham se.
25 A ga hin ka tee adamize ma tammahã
kaŋ nga goo fondo šerrante ga,
ka gar kokoroo ti fondo kaŋ ga koy buuyan here.
26 Heray ga goykaw gaabi a ma goy,
ŋaayan boonay gʼa tusa.
27 Boro yaamu ga bone soolu,
nuune ciray bara deenoo ga.
28 Zanbante ga yenje tunandi,
almunafiki ga boro maanayaŋ fay.
29 Anniya futukoyni ga nga cinaa zanba,
a gʼa daŋ fondo ra kaŋ si boori.
30 Boro kaŋ ga nga moɲey daabu ka dabarifutay,
ka nga miɲoo ɲama na ifutu tee ka ben.
31 Hinbiri kaaray ga hima nda kokoy fuula daržante,
šerretaray fondaa ga a ga duwandi.
32 Boro kaŋ ga suuri baa wongaari,
boro kaŋ ga hin nga boŋ baa boro kaŋ na koyra dii.
33 Alkurra ga karandi ka dii,
amma zaaboo si hun kala Abadantaa do.