6
Hoyrayyaŋ garaw here
1 Ay izʼaroo, nda nʼna ni boŋ tee tolme
ni cinaa maaganda kaŋ na garaw zaa,
nda nʼna kabe kar boro waani kabe ra nga sabboo se,
2 nda ni miɲoo šenney na ni daŋ kumsay ra,
ni miɲoo šenney na ni dii,
3 hayaa ne kaŋ mʼa tee, ay izʼaroo: ni boŋ wiri,
zama ni kaŋ ni cinaa kaboo ra.
Koy ka ni cinaa suurandi a ma ni taŋ.
4 Masi naŋ jirbi ma huru ni moɲey ra,
ni moɲey masi dusungu.
5 Ni boŋ kaa sanda jeeri kaŋ hun hookaw kaboo ra,
sanda ciraw kaŋ hun kumsay hirrikaw kaboo ra.
Mooru fuyyantetaray
6 Fuyyantaa, koy ntandaa guna,
koy nga takaa guna ma duu lakkal.
7 A sii nda boŋkoyni,
wala goy juwalkaw, wala jinehun,
8 a ga nga ŋaahayaa soolu kaydiyaa waati,
hegaa waati, a ga nga ŋaahayaa fanji.
9 Fuyyantaa, hala waati foo nʼga cindi ka kani?
Hala waati foo no nʼga tun ni jirboo ra?
10 Ka jirbi kayna, ka dusungu kayna,
ka kabe koli ka kani kayna,
11 talkataray ga kaŋ ni ga sanda yaara-yaarakaw,
jaŋay ga kaa ni ga sanda komakaw.
Zanbante kokoroo si boori
12 Boro yaamu, goy futu teekaw no,
a mma yaara de ka taari.
13 A ga moo kar ka zanba,
ka šelaŋ nda nga cewey nda nga kabey,
14 ilaala goo binoo ra,
waati kul a ga ifutu biiri,
a ga yenje tunandi.
15 Woo se dogoo din da, bone ga kaŋ a boŋ,
a ga jirsi ka say, safari sii a ra.
Hayaa kaŋ Irkoy si bagʼa
16 Haya iddu goo no kaŋ Abadantaa ga konna ey,
haya iyye kaŋ ga tee a se almuhal:
17 Ka moo daabu borey ga, nda deene kaŋ ga taari,
nda kabe kaŋ ga boro kaŋ mana haya kul tee kuroo mun,
18 nda bine kaŋ ga dabari futuyaŋ miile,
nda boro kaŋ cewey ga cahã ka zuru ifutu bande,
19 nda seedezooru kaŋ ga taari šenni har,
nda boro kaŋ ga yenje tunandi armayaŋ game.
Zuru zinaa se
20 Ay izʼaroo, ni baaba yaamaroo dii,
masi ni ɲaa cawandoo naŋ.
21 I haw ni binoo ga waati kul,
i guli ni jindoo ga.
22 Nda nʼga dira, i ga fondaa cebe ma ne,
i ga ni hawgay waati kaŋ nʼga kani,
i ga šelaŋ ma ne waati kaŋ ni tun jirboo ra.
23 Zama yaamaroo manʼti kala fitilla,
cawandoo manʼti kala gaay,
kašetawey nda aladaboo ti hunayan fondaa.
24 I ga ni hallasi woy futu ra,
ka ni hallasi woy kaŋ nʼsʼa bay šenni kaaney ra.
25 Nga booroo masi tee ma ne bine-ibaayi,
masi naŋ moɲey ma duu ni.
26 Zama woykuuru ga kate ma tee sanda loomo foo,
wande waani ga kumsay hirri hundi se kaŋ bisa haya kul.
27 Boro ga hin ka nuune daŋ nga ziibaa ra
bila nda nga bankaarawey ma ton wala?
28 Boro ga hin ka dira denji boŋ
bila nda cewey ma ton wala?
29 Takaa din da ti aru kaŋ hanga nga cinaa wandoo bande.
Boro kul kaŋ tuku a ga,
boraa si diyandi boro kaŋ mana haya kul tee.
30 Boro si zay naŋ kaŋ zay
ka duu ŋaayan, zama heray bara a ga,
31 nda i duu a, a ga nga hayoo bana cee iyye,
a ga haya kul kaŋ goo nga hugoo ra noo.
32 Boro kaŋ na zinaa tee nda woy, koyoo sii nda lakkal.
Boro kaŋ ga baa nga ma nga boŋ halaci de no ma woo tee.
33 Boraa si duu a ra haya kul kala dori nda haawi,
nga kaynandoo si ben.
34 Zama canseyan ga aru binoo tunandi,
a si boro kul kaa han kaŋ a ga nga boŋ faasa.
35 A si yadda banaw kul,
a si yadda haya kul ga, ba nda nʼnʼa noo sufuray boobo.