Zaburey citaaboo
Citaaboo fahamandiroo
Zaburey citaaboo šenney manʼti kala Irkoy ŋaarayyan, nda saabuyan, nda dooni. Citaabu no kaŋ ga Izirayel gandaa haya bisantey bayrandi ir se, ka haya beerey har kaŋ Irkoy nʼi tee i se. Annabey šenney mo goo a ra. Zaburey booboyaŋ ga šelaŋ Almasihu ga kaŋ ga hima ka kaa.
Citaabu beeri no Amaana Žeenaa ra. Hala hõ a ga hanse ka cawandi, borey gʼa tee dooni. Zabur boobo ra boro ga dii nga hantumkaa maaɲoo wala takaa kaŋ nda hooray jinawey kaŋ nda a ga doonandi. Zaburey citaaboo ga Irkoy beeraa nda nga hinoo cebe ir se, de mo a ga nga jamaa hawgay, a ga haŋajer i se. Zaburey citaaboo ra boro ga dii kaŋ adamize ga hin ka nga lakkaloo, wala nga torroyaney, wala nga yalaafuyanoo, wala nga binemarayyaney kul har Irkoy se, zama a ga tuuru borey se kaŋ gʼa cee.
Zaburey citaaboo ga hin ka zamnandi citaabu guu:
Citaabu jinaa: Zabur 1—41
Citaabu hinkantoo: Zabur 42—72
Citaabu hinzantoo: Zabur 73—89
Citaabu taacantoo: Zabur 90—106
Citaabu guwantoo: Zabur 107—150
1
CITAABU JINAA
(Zabur 1—41)
Gomni cimi-cimoo
1 Boraa duu gomni
kaŋ si dira boro futu hoyraa bande,
kaŋ si kay zunubantey fondaa ga,
a si goro ɲooɲokey bande.
2 Amma a mma baa Abadantaa ašariyaa,
de a ga miile a ga cijin nda zaari.
3 A ga hima nda tuuri kaŋ dumandi hari bisadooyaŋ miɲey ga,
a ga ize tee nga waatoo ga, fitawey si kogu,
haya kul kaŋ a gʼa tee ga boori.
4 Amma manʼti takaa woo no boro futawey se,
i ga hima nda kokoši kaŋ hewoo gʼa zaa.
5 Woo se boro futawey si duu cimi ciitoo ra,
takaa din da zunubantey sii nda doo boro šerrantey margaroo ra.
6 Zama Abadantaa ga boro šerrantey fondaa hawgay,
amma boro laaley fondaa gʼi ka koy halaciyan ga.