26
Abadantaa, ay feeri
1 Woo ti Dawda zabur foo.
Abadantaa, ciiti ya ne, zama ay dira laadirtaray ra!
Ay ga talfi Abadantaa ga,
ay si hun ay dogoo ra.
2 Abadantaa, ay tayni, ay sii,
ay gundoo hayey nda ay binoo hayey kul guna ka boori,
3 zama ay ga ni borohennataraa bay,
ay ga dira ka sawa nda ni cimoo.
4 Ya na goro zanbantey bande,
ya na hanga almunafikey bande.
5 Ay ga konna goy futu teekey margaroo,
ay si goro boro laaley bande.
6 Ay gʼay kabey ɲumay kʼay henanyanoo cebe,
ay ga ni sargari tonadogoo kuubi kʼa bere, Abadantaa,
7 ka albarka daŋ ma ne
ka ni teegoy kayfantey kul deede.
8 Abadantaa, nongoo kaŋ ra ni hugoo goo ga kan ya ne
nongoo kaŋ ra ni daržaa goo.
9 Masi agay nda zunubantey tee affoo,
masʼay hunaroo dii kuri munkey bande
10 kaŋyaŋ kabey na almunkar tee,
ngi kabe gumaa ga too met nda sufurawey kaŋ i nʼi taa tuguyan ra.
11 Agay, ay ga dira nda laadirtaray.
Abadantaa, ay feeri, hinna ay ga!
12 Ay ga dira fondo šerrantaa boŋ,
margarey ra, ay ga albarka daŋ Abadantaa se.