5
Irkoy ga nga hunburkey faaba
1 Donkey boŋkoynoo ka woo don. Dooni kaŋ bande laati hooray jinawey goo. Woo ti Dawda zabur foo.
2 Abadantaa, haŋajer ay šenney se,
maa ay ŋuunuŋuunuyanoo!
3 Lakkal daŋ ay kaatiyanoo se, ay Kokoyoo, ay Koyoo!
Ni no ay ga ni ŋaaray.
4 Abadantaa, subbaahi nʼga maa ay šennoo se,
subbaahi ay ga soolu ka ni batu.
5 Zama ni manʼti Koy kaŋ ga baa ifutu,
ifutu sii nda doo ni jeroo ga.
6 Borey kaŋ ga ngi boŋ beerandi si kay ni jine,
nʼga konna borey kaŋ ga šerretaray jaŋay tee.
7 Nʼga taariharkey halaci.
Abadantaa ga wanga kuri munkey nda zanbantey.
8 Amma agay, ni borohennataray beeroo albarkaa ra
ay huru ni hugoo ra,
ni hunburay ra,
ay ga sujudu ma ne ni hugu henanantaa here.
9 Abadantaa, ay gongu ni šerretaraa ra agay iberey maaganda,
ni fondaa kanandi ay jine.
10 Zama haya kayante kul sii miɲey ra.
Biney ga too nda hasaraw,
miɲey ga hima nda saaray kaŋ ga feera,
deeney mma meekaanay.
11 Irkoy, i zukandi!
Yala hayey kaŋ i gʼi kayandi mʼi kaŋandi!
I fur ngi zunubu boobey maaganda,
zama i ture ni ga.
12 Borey kul kaŋ ga ngi boŋ talfi ni ga, ma ɲaali,
waati kul i ma kaati nda ɲaali.
Borey kaŋ ga baa ni maaɲoo ga yafarhã nda ni. Nʼgʼi hawgay.
13 Zama ni, Abadantaa, nʼga albarka daŋ boro šerrante ra,
nʼgʼa kuubi kʼa bere nda alhormo sanda koray beeri.