89
Irkoy ga allaahidu too
1 Woo ti Etaŋ, Ezra boraa, bayti dooni foo.
2 Ay ga Abadantaa borohennataraa don waati kul,
zaman ka kaa zaman ay ga ni laadirtaraa har.
3 Ay gʼa har: ni borohennataraa ga goro hala abada,
ni laadirtaraa ga tabatandi beenaa ra.
4 Ni nee: «Ay na amaana daŋ agay nda boraa kaŋ ay nʼa suuba game,
ay žee Dawda, ay tamoo se ka nee:
5 ‹Ay ga ni hayroo gorandi kokoytaraa ra hala abada,
ay ga ni kokoytaraa tabatandi zaman ka kaa zaman.›»
Kay-kayna
6 Abadantaa, beenaa ga ni kayfey saabu,
cimi no, a ga ni laadirtaraa har boro henanantey margaroo ra.
7 Duulawey ra, may no ma hin ka nga boŋ kar Abadantaa?
Koyey izʼarey ra, may no ma hima nda Abadantaa?
8 Irkoy ga hunburandi boro henanantey margaroo ra,
a ga beeri, hunburhaya no borey se kaŋ gʼa kuubi kʼa bere.
9 Abadantaa, Irkoy Aduɲɲakoyoo, may no ma gaabi sanda ni, Abadantaa?
Ni laadirtaraa no ma ni dum.
10 Ni no ka hin teekoo bolsaa,
waatoo kaŋ nga bondawey tun, ni kʼi kanandi.
11 Ni no ka teekoo adabba laalaa motti sanda bukaw,
nʼna ni iberey say nda ni kabe albarkantaa.
12 Ni wane beenaa, ni wane mo laboo,
ni no ka aduɲɲa nda haya kul kaŋ goo a ra gorandi.
13 Ni no ka hawsa nda gurma taka,
Tabor nda Hermoŋ tondi hondey ga kaati ka ni maaɲoo cee.
14 Ni bara nda kabe albarkante,
ni kaboo ga gaabi, ni kabe gumaa ga jer.
15 Šerretaray nda cimi ti ni kokoytaraa asaasoo.
Borohennataray nda laadirtaray ga dira ni jine.
16 Jamaa duu gomni kaŋ ga ni šifa!
Abadantaa, ni ndumoo gaayoo ra i ga dira.
17 Ni maaɲoo ra i ga ɲaali zaaroo kul,
ni šerretaraa no mʼi jer.
18 Zama ni ti ngi daržaa nda ngi hinoo,
ni sabboo ra ir boŋey ga jer.
19 Zama ir koraa sii kala Abadantaa kone,
Izirayel Koy Henanantaa wane nda ir kokoyoo.
20 Waatoo din nʼga šelaŋ ni ganakey se bangayyan ra,
nʼga nee: «Ay na wongaari faaba,
ka zankaaru jer jamaa game.
21 Ay duu ay tamoo Dawda,
ay nʼa yon nda ay jii henanantaa.
22 Nga no ay kaboo gʼa tabatandi,
ay kaboo gʼa noo gaabi.
23 Nga iberoo sʼa zanba a mana bay,
boro laala sʼa šiita.
24 Ay ga nga torrokey motti a jine,
ay ga borey kar kaŋ ga konna a.
25 Ay laadirtaraa nda ay borohennataraa ga cindi a bande,
ay maaɲoo sabbu se boŋoo ga jer.
26 Ay ga teekoo daŋ kaboo ra,
ka isawey daŋ kabe gumaa ra.
27 Nga, a gʼay cee ka nee: ‹Ni ti ay Baabaa,
ay Koyoo, ay hallasiroo Tondoo.›
28 De agay, ay gʼa tee izʼaru jinaa,
kʼa jer beene laboo kokoyey kul boŋ.
29 Ay ga naŋ ay borohennataraa ma cindi a bande hala abada,
agay amaanaa tabatantaa mo ga cindi a bande.
30 Ay ga nga hayroo gorandi waati kul,
ka nga kokoytaraa gorandi kullihinne beenaa goo dogoo ra.
31 Nda nga izey na agay ašariyaa naŋ,
de i mana hanga ay hantumey kaŋ kayandi,
32 nda i nʼay hantumey kaynandi,
i manʼay yaamarey dii,
33 gobu nda ay ga ngi hooyanoo bana i ra,
barzu mee nda ay ga ngi layboo bana i ra.
34 Amma ay sʼay borohennataraa bere a se,
ay sʼay laadirtaraa kaa a here.
35 Ay si agay amaanaa dunbu,
de mo ay si hayaa barmay kaŋ fatta ay miɲoo ra.
36 Ay žee cee foo ka ben nda ay henanyanoo,
kaŋ šikka sii kaŋ ay si taari Dawda se.
37 Nga hayroo ga cindi hala abada,
nga kokoytaraa ga bara ay jine kullihinne waynaa ga bara,
38 sanda takaa kaŋ nda handoo ga bara waati kul,
kaŋ ti seede laadirantaa duulawey ra.»
Kay-kayna
39 Ka gar, ni, ni wanji a ga,
ni futu ni suubantaa kaŋ yonandi ga.
40 Nʼna ni tamoo amaanaa dunbu,
nʼna nga kokoytaray fuulaa kaŋandi ganda kʼa žiibandi.
41 Nʼna fun kaa nga cetewey kul ra,
nʼna nga cinari gaabantey kayri.
42 Fondaa bisakey kul na nga hayey kom,
nga taalammey se a tee haarayhaya.
43 Nʼna nga torrokey kabe gumaa jer,
nʼna nga iberey kul ɲaalandi.
44 Nʼna nga takubaa miɲoo wii,
manʼa faaba yenjaa ra.
45 Nʼna nga dawlaa benandi,
nʼna nga kokoytaray gorodogoo warra laboo ra.
46 Nʼna nga soogataraa zaarey kaccandi,
nʼnʼa daabu nda haawi.
Kay-kayna
47 Ya Abadantaa, hala waati foo no
nʼga fay nda ka ni boŋ tugu?
Hala waati foo no ni futuroo
kaŋ ga wiiya sanda nuune ga ben?
48 Hongu kaŋ ay sii nda aloomur,
nʼna adamizey taka kʼi tee haya yaadayaŋ.
49 May ti boraa kaŋ ga huna a si dii buuyan?
May no ma hin ka nga hundoo kaa buuyan karfey ra?
Kay-kayna
50 Ay Koyoo, man ni cee jinaa borohennataraa?
Wey kaŋ ni laadirtaraa ra nʼnʼi žee Dawda se?
51 Ay Koyoo, hongu kaynandiyanoo kaŋ duu ni tamey,
Jamaa boobaa jeejaa kul sii kala ay boŋ.
52 Abadantaa, hongu kaŋ agay iberey gʼay kaynandi,
i ga ni suubantaa kaŋ yonandi kaynandi nongu kul here.
53 Albarka ma bara Abadantaa se hala abada!
Amin! Amin!