3
Irkoy šerretaraa
Adiši macin ti alyahuudutaray nafaa, wala mo macin no hurubanguyan gʼa hanse? Nga nafaa ga beeri nongoo kul here. Haya jinaa, Alyahuudey ga Irkoy na nga šenney talfi. Adiši macin? Nda boro fooyaŋ i ra si laadir, ngi laadir jaŋaa ga Irkoy laadirtaraa kaa wala? Abada! Ma bay kaŋ Irkoy ga diyandi cimi, adamize kul ti taariharkaw, sanda takaa kaŋ nda a hantumandi Citaaboo ra ka nee:
«Hala ni šenney ma tee cimi,
nda i na ciiti dunbu, ma duu cimi.»*
Amma nda ir šerretaray jaŋaa ga Irkoy šerretaraa cebe, macin no ir ma nee? Irkoy nka si šerre waati kaŋ a ga nga futayyanoo doori? – Adamize takaa nda ay ga šelaŋ. – Abada! Nda Irkoy si šerre, taka foo nda a ga aduɲɲa ciiti? Nda Irkoy cimoo ga diyandi kaaray ay taaroo ra ka darža daŋ Irkoy ga, macin se ay ga ciitandi sanda zunubante? Aywa woo ra, takaa foo ra ir si nee: «Ir ma goy futu tee hala goy henna ma hun a ra.» Boroyaŋ gʼir wow ka nee ir no ma woo har. I ga hima nda ngi zukandoo.
Boro šerrante sii no
Adiši macin koyne? Ir kaŋ ti Alyahuudu, ir nka bisa borey jerey? Kalaa, kalaa, zama ir nʼa har ka bisa kaŋ Alyahuudu kul nda Grekey kul sii kala zunubu cire, 10 sanda takaa kaŋ nda a hantumandi Citaaboo ra ka nee:
«Boro šerrante sii no, ba boro foo.
11 Lakkalkoyni sii no,
boro kul sii no kaŋ ga Irkoy ceeci.
12 I kul mooru fondaa,
i tee boro kaŋ sii nda nafaw.
Boro kul sii no kaŋ ga goy henna tee, ba boro foo.»
13 «Ngi kormollawey ga hima nda saaray kaŋ ga feera.
I ga borey darga nda ngi deeney.
Gondi naaji bara ngi meetuwey cire.Ȥ
14 «Miɲey ga too nda dangayan nda laalay.»*
15 «Cewey ga cahã kuri munyan ra.
16 Halaciyan nda bone goo ngi fondaa ga.
17 I si alaafiya fondaa bay.»
18 «Irkoy hunburay kul sii i ra.»
19 Ir ga bay kaŋ haya kul kaŋ ašariyaa gʼa har, a sʼa har kala borey se kaŋ goo ašariyaa hinoo cire, hala borey kul miɲey ma daabandi, aduɲɲa kul ma bay kaŋ ngi ti zunubante Irkoy jine. 20 Woo se ašariyaa diiyanoo si boro kul tee šerrante Irkoy jine, ašariyaa no ma boro bayrandi zunubu.
Takaa kaŋ nda Irkoy ga boro tee boro šerrante
21 Sohõ Irkoy na takaa cebe kaŋ nda nga ga boro dii boro šerrante bila ašariyaa. Ašariyaa nda annabey ga seedetaray tee a ga. 22 Woo manʼti kala takaa kaŋ nda Irkoy ga boro dii boro šerrante Isa Almasihu naanaa albarkaa ra borey kul se kaŋ ga naanay. Fay-fayyan sii no, 23 zama borey kul na zunubu tee, i mooru Irkoy daržaa. 24 Irkoy anneemaa kʼi tee boro šerrante bila nda i ma haya kul tee, Isa Almasihu nʼi feeri kʼi kaa zunubu ra. 25 Nga no Irkoy nʼa kayandi kʼa sanba kuroo ma tee sargari borey se kaŋ ga naanay a. A nʼa tee sargari ka nga šerretaraa cebe, zama zunubey kaŋ teendi ka bisa, a manʼi kabu 26 nga suuroo maaganda se. A nʼa tee sargari ka nga šerretaraa cebe waatoo woo ra, hala nga šerretaraa ma cindi, ka boro kaŋ naanay Isa tee boro šerrante.
27 Man bolsiyan addaliloo? A sii no! Macin se a sii no? Teegoy henney kʼa kaa wala? Kalaa, kalaa, naanaa kʼa kaa. 28 Ir ga laasaabu kaŋ naanaa albarkaa ra adamize diyandi boro šerrante bila ašariyaa ganayanoo. 29 Wala Irkoy manʼti kala Alyahuudey hinne Koyoo? Manʼti dumey jerey mo Koyoo no wala? Šikka sii kaŋ dumey jerey mo Koyoo no, 30 zama Irkoy folloku no ma borey kaŋ hurubangu tee boro šerrante naanaa albarkaa ra, ka borey kaŋ ti jofoloyaŋ mo tee boro šerrante naanaa albarkaa ra. 31 Adiši ir mma ašariyaa tee yaada naanaa maaganda se wala? Abada! Ir mma ašariyaa kayandi.
* 3:4 3.4 Zabur 51.6. 3:9 3.9 Zamnaa 1.16. 3:12 3.10–12 Zabur 14.1–3; 53.2–4. § 3:13 3.13 Zabur 5.10; 140.4. * 3:14 3.14 Zabur 10.7. 3:17 3.15–17 Ezayi 59.7–8. 3:18 3.18 Zabur 36.2.